Deuteronomio 8

Sunyaq jirkacho Tayta Dios yanapashqanta yarpäsishqan

1Saypita mastapis Moisés nirqan: <<Kanan wilapashqä mandamientukunata cumpliyanki. Cumplirqa Abrahamta, Isaacta y Jacobta Tayta Dios promitishqan nacionman yaykuyashpayki askamanmi mirayanki y alimi kawayankipis.

2<<Chusku chunka (40) wata sunyaq jirkapa Tayta Dios purisishushqaykita ama qonqäyaysu. Saychömi nakasiyäshushpayki pruëbaman churayäshurqayki. Sayno rurarqan shonquykikunacho imata yarpäyashqaykitapis musyananpaq y mandamientunkunata cäsukuq o mana cäsukuq kayashqaykitapis musyananpaqmi.

3<<Pasaypa muchuyman churarkuyäshushpaykipis mikuyänaykipaq manátami kamaripäyäshurqayki. Say mikuyta manami unay ayllunsikunapis ni qamkunapis reqiyarqaykisu. Saynöpami Tayta Dios tantiyasiyäshurqayki kayno nishqanta: <Manami tantata mikularsu runa kawan, sinöqa Tayta Dios lapan nishqankunata cäsukurpis kawanmi>.#Mat. 4.4; Luc. 4.4.

4<<Chusku chunka watantin puriykäyaptikipis mödanaykikuna manami ushakarqansu, ni chakikikunapis manami pushlurqansu. 5Shumaq tantiyakuyay. Surinta taytan corrigishqannömi Tayta Diospis qamkunata corrigiyäshunki.#2Sam. 7.14; Sal. 89.32; Prov. 3.11-12; Heb. 12.5-11. 6Sayno kaykaptinqa Tayta Diospa mandamientunkunata cumplir payta mansapakuyay.

7<<Tayta Dios pushaykäyäshunki raqrakunacho y jalqakunacho aska yakuyuq y aska pukyuyuq nacionmanmi. 8Saychöqa trïgupis, cebädapis, üvapis, hïguspis, granädapis, olïvupis sellämami wayuykun. Saynölami olïvupita rurash aceitipis y abëjapa mishkinpis aska kaykan. 9Mikuy saysika kaptin muchuypis manami kanqasu. Qaqakunachöpis fiërrumi kaykan. Puntakunapitapis cobritami jorquyanki. 10Promitishqan nacionta qoyäshushqaykicho pacha junta kawarmi Tayta Diosta imaypis alabayanki>>.

Tayta Diosta mana qonqayänanpaq yäsishqan

11Saypita mastapis Moisés nirqan: <<Tayta Diosta ama qonqäyankisu. Kanan junaq wilapashqä mandamientunkunata, leyninkunata y estatütunkunata imaypis mana qonqaypa cumpliyanki. 12Imaykaykikunapis mana pishïyäshuptiki kushish kawayashpayki, ali wayicho täyashpayki, 13wäkaykikuna, uyshaykikuna y cabraykikuna askaman mirayaptin y qoriki, qellayniki y imaykaykikunapis aska kaptin 14Tayta Diosta ama qonqäyankisu. Paymi Egiptucho ashmay kaykäyaptiki jorqayämushushkanki. 15Saynöpis pushayämushurqayki pasaypa mansakuypaq sunyaq jirkapami. Saychömi wanusikuq culebrakunapis alacrankunapis aska karqan. Upuyänaykipaq yaku mana kaptinpis qaqapitami pashtasimurqan. 16Mikuyänaykipaq manátapis kamaripäyäshurqaykimi. Say mikuyta manami unay ayllunsikunapis reqiyarqansu. Nakasiyäshushpaykimi pruëbaman churayäshurqayki tantiyakur ali kawayänaykipaq.#Ose. 13.5-6. 17Sayno kaykaptinqa ama yarpäyankisu imaykatapis kikikikunapa kalpaykikunawan tariyashqaykita. 18Saypa trukanqa tantiyakuyanki lapan imaykata tariyänaykipaq Tayta Dios yanapäyäshushqaykita. Sayno yanapaykäyäshunki unay ayllunsikunawan pactu rurashqanta cumplirmi.

19<<Tayta Diosta qonqaykur juk dioskunata adorayaptikiqa lapaykitami ushakäsiyäshunki. 20Mana cäsukuyaptikiqa wakin nación runakunata ushakäsinanpaq kashqannömi qamkunatapis Tayta Diosninsi ushakäsiyäshunki>>.

Currently Selected:

Deuteronomio 8: qvhB

Highlight

Copy

Compare