Deuteronomio 7

Juk dioskunata mana adorayänanpaq nishqan

Éxodo 34.11-17

1Saypita mastapis Moisés nirqan: <<Täyänaykipaq kaq nacionman Tayta Dios chäsiyäshushpaykimi saycho taykaq aska nación runakunata ushakäsinqa.#Hech. 13.19. Say runakunami kayan heteo, gergeseo, amorreo, cananeo, ferezeo, heveo y jebuseo runakuna. Say qanchis nacionkunaqa qamkunapita mas aska y mas munayyuqmi kaykäyan. 2Sayno kaptinpis qamkunapa munaynikiman say runakunata Tayta Dios churamuptin paykunawan ima pactutapis ama rurayankisu. Saypa trukanqa mana kuyapaypa lapanta ushakäsiyanki.

3<<Paykunawanqa ama majasakäyankisu. Warmi surikikunata ni olqu surikikunatapis paykunawanqa ama majasayankisu. 4Surikikuna paykunawan majasakarqa Tayta Diosman manana yärakur juk dioskunatami adorayanqa. Juk dioskunata adorayaptinqa Tayta Dios fiyupa rabyashpan juklami lapaykita ushakäsiyäshunki.

5<<Say nación runakunapa sacrificiuta rupasikuyänan altarninkunata juchurasir adorayashqan wankakunatapis pakir ushayanki. Asera diösata adorayänanpaq jawiyashqan qerukunata mutuyanki y adorayashqan ïdulunkunatapis ninaman waykur ushayanki.#Deut. 12.3. 6Tayta Dios akrashqan santu runakunami qamkuna kaykäyanki. Maysay nación runakunapitami kuyashqan runakuna kayänaykipaq akrashushkanki>>.#Éxo. 19.5-6; Deut. 14.2; 26.18; Tito 2.14; 1Ped. 2.9.

Israel runakuna Tayta Diosta cäsukuyänanpaq nishqan

7Saypita mastapis Moisés nirqan: <<Manami askaq kashqansipitasu Tayta Dios akramashkansi, saypa trukanqa lapan nacionpita walkaqlaraq kaykashqami.#Juan 15.16; 1Juan 4.10. 8Kuyamashpansimi Tayta Dios sayno akramashkansi. Pay kuyamansi Abrahamta, Isaacta y Jacobta promitishqanta cumplirmi. Saymi Egiptucho Faraónpa munaynincho kaykashqansipita munayninwan jorqamashkansi. 9Sayno kaykaptinqa Tayta Dios rasunpaypa kaq Dios kashqanta shumaq tantiyakuyay. Payta kuyar mandamientunkunata cumpliqkunataqa imaypis kuyanqami. Saynölami pactu rurashqanta cumplir waranqa (1,000) generación kashqanyaq yanapanqa. 10Paypa contran sharkuqkunatami isanqa fiyupa castigar mana shuyaräsiylapa ushakäsinqa.#Éxo. 20.5-6; 34.6-7; Núm. 14.18; Deut. 5.9-10. 11Sayno kaykaptinqa kanan junaq wilapashqä mandamientunkunata, estatütunkunata y leyninkunata mana qonqaypa cumpliyay>>.

Cäsukur bendicionta chaskiyänanpaq kashqan

Levítico 26.3-13; Deuteronomio 28.1-14

12Saypita mastapis Moisés nirqan: <<Kay leykunata cäsukur cumpliyaptikiqa unay ayllunsikunata kuyapar pactu rurashqantami Tayta Dios imaypis cumplinqa. 13Saymi qamkunata kuyashushpayki unay ayllunsikunata promitishqan nacionman pushayäshunki. Saychömi paypa bendicionninwan wamraykikunapis askaq kayanqa. Chakraykikunapis shumaq wayuptinmi mikuynikikunapis aska kanqa. Vïnuykikunapis manami pishinqasu, aceitikikunapis ushakanqasu y wäkaykikuna, uyshaykikuna y cabraykikunapis saysikamanmi mirayanqa. 14Wakin nacionkunapitapis masmi bendicionninta qoyäshunki. Saymi olqupis ni warmipis qamkunacho qoluq kanqasu. Uywaykikunapis alimi mirayanqa. 15Imayka qeshyakunapitapis Tayta Diosmi sapäyäshunki. Egipto runakunata plägakunawan nakasishqanno qamkunata manami nakasishunkisu. Contrayki sharkuqkunatami isanqa say plägakunawan nakasinqa.

16<<Tayta Dios munaynikiman churamushqan runakunataqa mana kuyapaypami lapanta ushakäsiyanki. Paykuna adorayashqan dioskunata ama adorayankisu. Saykunata adorarqa lutan ruraykunamanmi ishkiyanki.#Deut. 11.13-17.

17<<Saycho taq runakunata rikar ama yarpäyankisu qamkunapita mas aska kayaptin mana ushakäsiyänaykipaq kashqanta. 18Askaq kayaptinpis ama mansayankisu. Saypa trukanqa yarpäyay Faraónta y Egipto runakunata Tayta Dios imano castigashqantapis. 19Saynöpis yarpäyay señalkunata, milagrukunata y espantaypaq kaqkunata rurar munayninwan Tayta Dios Egiptupita jorqamashqansita. Egiptupita yarqamunansipaq yanapämashqansinömi mansaykäyashqayki runakunata ushakäsiyänaykipaqpis yanapäyäshunki.

20<<Makikipita qeshpiqkunatapis pakakuqkunatapis Tayta Dios kikinmi qarqunqa. 21Lapanpaq munayyuq Tayta Dios yanapaykäyäshuptikiqa say runakunata ama mansayaysu. 22Say runakunata Tayta Dios manami juklasu qarqunqa, saypa trukanqa walka walkalami qarqunqa. Lapanta jukla qarquptinqa sunyaq rikakuptin jirka uywakuna mirarmi ushakäsiyäshunki.

23<<Tayta Diosmi yanapäyäshunki say runakunata ushakäsiyänaykipaq.#Éxo. 7.8—12.30; 14.23-31; 23.27-30. 24Mandaq reykunata wanusir ushayaptikimi paykunapa jutinkunapis qonqakäkunqana. Saymi qamkunata pipis ichipäyäshunkinasu. 25Paykunapa ïdulunkunatapis lapanta rupasir qoriwan qellaywan enchapayashqankunata ama quëdasikuyankisu. Quëdasikurqa lutan ruraykunaman churakarmi Tayta Diosta fiyupa rabyanäsiyanki. 26Sayno kaykaptinqa wayikikunaman say ïdulukunata ni enchapayashqan qorita ni qellaytapis ama apayankisu. Apayaptikiqa qamkunatapis Tayta Dios ushakäsishunkimi. Melanaypaq kaqta imatapis mana yatayashqaykino saykunatapis ama yatayankisu>>.

Currently Selected:

Deuteronomio 7: qvhB

Highlight

Copy

Compare