Deuteronomio 6

Tayta Dioslata kuyayänanpaq nishqan

1<<Tayta Diosninsimi mandamash mandamientunkunata, estatütunkunata y leyninkunata qamkunata wilapänäpaq. Chaskiyänaykipaq kaq nacionman chaykur say mandamientukunata cäsukur kawayanki. 2Tayta Diosta mansapakur wilapashqä lapan estatütunkunata y mandamientukunata imaypis cumplirqa qamkunapis, surikikunapis wilkaykikunapis aska watami kawayanki.

3<<Israel runakuna, kay nishqä leykunata cumpliyänaykipaq shumaq wiyayämay. Wiyakayämashpaykiqa unay ayllunsikunata Tayta Dios promitishqanno nacionnikicho ali kawayashpayki saysikaman mirayanki. Saychöqa lichipis abëjapa mishkinpis yakunöraqmi aska kaykan.

4<<Israel runakuna, shumaq wiyakuyay. Tayta Diosninsiqa juklaylami.#Mar. 12.29.

5<<Tayta Diosta kuyayanki lapan shonquykikunawan, lapan voluntänikikunawan y lapan kalpaykikunawan.#Mat. 22.37; Mar. 12.30; Luc. 10.27.

6<<Kanan junaq wilashqä leykunata shonquykikunacho imaypis yarparäyanki. 7Mana qonqaypa wamraykikunata yachasiyanki wayikikunachöpis, nänikunachöpis, punuyänaykipaq kamakarpis y punuyashqaykipita sharkurpis. 8Makikikunaman y urkuykikunaman watakurkur purisiyanki. 9Saynöla qelqayanki wayi punkupa quiciunninkunaman y marka yaykuna punkukunamanpis>>.#Deut. 11.18-20.

Tayta Diosta cäsukuyänanpaq nishqan

10<<Unay ayllunsi Abrahamta,#Gén. 12.7. Isaacta#Gén. 26.3. y Jacobta#Gén. 28.13. promitishqan nacionmanmi Tayta Dios chäsiyäshunki. Say nacionchöqa mana sharkasiyashqayki kuyaylapaq jatusaq markakunami listulana kaykäyan. 11Say markakunachöqa imatapis mana qoriykarmi wayi junta imaykatapis tariyanki. Yaku pözukunatapis uchkushlatanami tariyanki. Üvatapis olivostapis listu plantashlatanami tariyanki. Saykunata pacha junta mikur 12cuidä Egiptucho ashmay kayashqaykipita jorqamushuqniki Tayta Diosta qonqäyankiman.

13<<Tayta Dioslatami mansapakuyanki. Pay japalantami sirviyanki.#Mat. 4.10; Luc. 4.8. Jurarpis paypa jutilancho jurayanki. 14Juklä markakunacho taq runakuna adorayashqan dioskunata ama adorayankisu. 15Noqansiwan kaykaq Tayta Diosqa pay japalanta adorayänaykitami munan. Juk dioskunata adorayaptikiqa rabyar chipyaqmi ushakäsiyäshunki.

16<<Masahcho tentayashqaykino#Éxo. 17.1-7. Tayta Diosninsita ama tentayankisu.#Mat. 4.7; Luc. 4.12. 17Tayta Diosninsipa mandamientunkunata, leyninkunata y estatütunkunata wilapashqäta lapanta cumpliyanki. 18Tayta Dios munashqannöla imaypis kawayanki. Saynöpami unay ayllunsikunata Tayta Dios promitishqan nacionman yaykur kushish kawayanki. 19Saynöpis promitishqannölami lapan contraykikunata qarqur Tayta Dios ushakäsinqa.

20<<Waray warantin surikikuna <¿imapaqtaq Tayta Diosninsi kay leykunata, estatütukunata mandamientukunata qomashkansi?> nir tapuyäshuptiki 21kayno tantiyasiyanki: <Egiptucho Faraónpa ashmaynin kashqansipitami Tayta Dios munayninwan jorqamarqansi. 22Jorqamänansipaq Faraónta y ayllunkunata Tayta Dios mansariypaq castigashqantami rikarqansi. 23Jorqarkamashpansimi pushamarqansi unay ayllunsita promitishqan nacionta qomänansipaq. 24Saymi Tayta Diosninsi nimarqansi payta mansapakur lapan estatütunkunata cäsukunansipaq kashqanta. Saynöpami kananyaq waran waran ali kawayta qoykämansi. 25Tayta Diosninsi munashqanno ali kawanansipaqqa yachasimashqansinöla lapan mandamientunkunata imaypis cumplishun> >>.

Currently Selected:

Deuteronomio 6: qvhB

Highlight

Copy

Compare