Deuteronomio 5

Chunka mandamientukuna

Éxodo 20.1-17

1Saypitanami Israel runakunata qayaykasimur Moisés nirqan: <<Israel runakuna, kanan wilanäpaq kaq estatütukunata y mandamientukunata shumaq chaskikuyay. Nishqanno kawayänaykipaq mana qonqaypa shumaq yachakuyay.

2<<Tayta Diosninsimi Horeb jirkacho noqansiwan pactuta rurarqan. 3Manami unay ayllunsikunawansu say pactuta rurarqan, saypa trukanqa noqansiwanmi. 4Horeb jirkacho nina rupaykaqpitami kikin Tayta Dios parlapämarqansi. 5Say rupaykaq jirkaman wisayta mansariyaptikimi noqalana wisarqä Tayta Dioswan parlamunäpaq. Kutiykamurmi wilarqä imata nimashqantapis. Say jirkachömi nimarqan:

6<< <Noqami Tayta Diosniki kaykä. Egiptucho ashmay kashqaykipitami jorqamushkä.

7<< <Juk dioskunamanqa ama yärakunkisu.

8<< <Ima ïdulutapis ama rurankisu jana pasacho kaykaq niraqta, kay pasacho kaykaq niraqta ni lamar rurincho kaykaq niraqtapis. 9Saykunaman ama qonqurpakunkisu ni adorankisu.#Lev. 26.1; Deut. 4.15-18; 27.15. Noqalami [munayyuq] Tayta Diosniki kaykä. Noqalata adoramänaykitami munä. Saymi mana cäsukamar ïdulukunata adoraqkunataqa castigashaq kikinta, surinta, wilkanta y shurukta wilkantapis. 10Noqata kuyamar mandamientükunata cumpliqkunatami isanqa waranqa (1,000) generación kayashqanyaq kuyapar yanapäshaq.#Éxo. 34.6-7; Núm. 14.18; Deut. 7.9-10.

11<< <Tayta Diosnikipa jutinta lutalaqa ama joqarinkisu.#Lev. 19.12. Jutinta lutala joqariq kaqtaqa castiganqami.

12<< <Tayta Diosniki nishushqaykinöla jamay junaq sagrädu kashqanta ama qonqankisu.#Éxo. 16.23-30; 31.12-14. 13Semänacho soqta junaq arushpayki lapan ruranaykipaq kaqkunata ruranki. 14Qanchis kaq junaqchöqa Tayta Diosnikita adorashpayki ama arunkisu.#Éxo. 23.12; 31.15; 34.21; 35.2; Lev. 23.3. Saynöpis ama arusinkisu olqutapis warmitapis surikikunata, olqutapis warmitapis ashmaynikikunata, töruykikunata, ashnuykikunata ni ima uywaykikunatapis ni nacionnikicho jäpa runakunatapis. Saynöpami olqupis warmipis ashmaynikikuna qamkunawan iwal jamayanqa. 15Yarpay Egiptucho ashmay kashqaykita. Sayno kaykaqtami Tayta Diosniki munayninwan jorqamushurqayki. Nirkurmi nishurqayki jamay junaqcho adorar jamanaykipaq.

16<< <Tayta Diosniki nishushqaykinöla mamaykitawan taytaykita ali rikanki.#Deut. 27.16; Mat. 15.4; 19.19; Mar. 7.10; 10.19; Luc. 18.20; Efe. 6.2. Saynöpami qoykushunaykipaq kaq nacioncho aska wata ali kawanki.#Efe. 6.3.

17<< <Runa mayikita ama wanusinkisu.#Gén. 9.6; Lev. 24.17; Mat. 5.21; 19.18; Mar. 10.19; Luc. 18.20; Rom. 13.9; Stg. 2.11.

18<< <Majaykita ama jarukunkisu.#Lev. 20.10; Mat. 5.27; 19.18; Mar. 10.19; Luc. 18.20; Rom. 13.9; Stg. 2.11.

19<< <Ama suwakunkisu.#Lev. 19.11; Mat. 19.18; Mar. 10.19; Luc. 18.20; Rom. 13.9.

20<< <Manakaqta pitapis ama tumpankisu.#Éxo. 23.1; Mat. 19.18; Mar. 10.19; Luc. 18.20.

21<< <Runa mayikipa warminta ama munapankisu.#Rom. 7.7; 13.9. Saynöpis wayinta, chakranta, warmi ashmayninta ni olqu ashmayninta, törunta, ashnunta ni imaykankunatapis duëñu tukunaykipaq ama yarpaylapis yarpankisu> >>.

Israel runakuna mansarir Moisésta ruwakuyashqan

Éxodo 20.18-26

22<<Jirka chakincho shuntaraykäyaptiki y jirkacho kaykaptïmi say mandamientunkunata Tayta Dios rupaykaq nina chawpinpita y yanawyaykaq pukutaypita sinchipa nimurqan. Saypitaqa say junaq manami mas imatapis parlamurqannasu. Nirkurnami ishkay parara rumiman qelqaykur entregamarqan.

23<<Yanawyaykaq sakaypita parlamushqanta wiyar y jirkacho nina rupaykaqta rikarmi cada trïbupa mandaqninkunawan mayor runakunapis shamur 24niyämarqan: <Tayta Diosninsimi nina rupaykaqpita parlamur pasaypa munayyuq kashqanta musyasimashkansi. Sayno parlamuptinpis manami wanurqansisu. 25Sayno kaptinpis mansariyämi. Kayjinanpa nina rupaykarqa noqakunatapis ruparchir ushayämanqa. Tayta Diosninsi parlamushqanta yapay wiyarqa wanuyäshaqchir. 26Kanan wiyaykashqansino nina rupaykaqpita imayyaqpis kawaq Tayta Dios parlamuqta wiyar manami pipis kawanmansu.#Heb. 12.18-19. 27Tayta Diosninsi imata nishqantapis wiyanaykipaq mejor kikilayki aywaykulay. Pay nishushqaykita wilayämaptiki lapantami cäsukur cumpliyäshaq>.#Éxo. 19.8; 24.3.

28<<Sayno niyämashqaykita wiyarmi Tayta Dios nimarqan: <Kay runakuna niyäshushqaykita wiyashkämi. Nishqäkunata cäsukur cumpliyänanpaq yarpäyashqan alimi kaykan. 29Alimi kanman kanan yarpäyashqannöla imayyaqpis mansapakamar mandamientükunata waran waran cumpliyaptin. Cumpliyashpan kikinkunapis surinkunapis kushishqami kawayanqa. 30Kay jirkapita kutiykur paykunata wilay toldunkunaman kutikuyänanpaq. 31Qam isanqa kayman yapay kutimuy lapan mandamientükunata, estatütükunata y leynïkunata wilapänäpaq. Saykunatami yachasinki qoykunäpaq kaykaq nacionman chaykur cäsukuyänanpaq> >>.

32 Tayta Dios sayno nishqanta yarparkasirmi Israel runakunata Moisés nirqan: <<Kananqa Tayta Diosninsi niyäshushqaykikunata lapanta cäsukuyay. 33Pay nishushqaykinöla lapanta cäsukuyay. Cäsukuyashpaykiqa qoyäshunaykipaq kaq nacioncho awkinyäyashqaykiyaq alimi kawayanki>>.

Currently Selected:

Deuteronomio 5: qvhB

Highlight

Copy

Compare