Deuteronomio 4

Tayta Diosta cäsukuyänanpaq Moisés nishqan

1Mastapis Moisés nirqan: <<Israel runakuna, yachasishqä estatütukunata y leykunata shumaq wiyakuyay. Saykunata cumpliyashpaykiqa unay ayllunsikuna yärakuyashqan Tayta Dios entregayäshunaykipaq kaq nacionman yaykur kushishqami kawayankipaq. 2Yachasishqäpitaqa juk leylatapis ama jorquyankisu ni imatapis yapayankisu.#Apoc. 22.18-19. Saypa trukanqa Tayta Diosninsipa mandamientunkunata lapanta cumpliyanki.

3<<Kikikikunami rikayashkanki Baal-peorcho Israel mayinsikunata Tayta Dios castigar ushakäsishqanta. Sayno ushakäsirqan saycho taq runakuna adorayashqan diosta paykunapis adorayaptinmi.#Núm. 25. 4Qamkunami isanqa Tayta Diosnilansita adorayashqaykipita kananyaqpis kawaykäyankiraq.

5<<Tayta Dios nimashqannölami estatütunkunata y leyninkunata yachasishkäna täyänaykipaq kaq nacionman char cäsukuyashpayki ali kawayänaykipaq. 6Sayno kaykaptinqa yachasishqäkunata mana qonqaypa cumpliyay. Cumpliyaptikimi wakin nacioncho taq runakuna tantiyakuyanqa yachaq y tantiyakuq kayashqaykita. Yachasishqä estatütukunata paykunapis musyarmi kushikuyashpan qamkunapaq niyanqa: <¡Say nacioncho taq runakuna shumaq tantiyakuqmi kayan!> >>

7Mastapis Moisés nirqan: <<Manami mayqan nacionpapis diosnin kansu manakuyaptin noqansipa Diosninsinöqa yanapänanpaq. 8Wakin nación runakunapa leyninkunapis manami noqansipa leyninsikunanösu kaykan. Qamkunata kanan yachasishqä leykunaqa paykunapa leyninkunapita mas alimi kaykan. 9Sayno kaykaptinqa cuidä qonqäyankiman Tayta Dios imano yanapämashqansitapis. Kawayashqaykiyaq waran waran mana qonqaypa surikikunatapis wilkaykikunatapis wilapäyanki>>.

Leyninkunata Horeb jirkacho Tayta Dios tantiyasishqan

10<<Horeb jirkacho Tayta Diospa nawpancho kaykashqami pay nimarqan: <Nishqäta wiyayänanpaq lapan runakunata shuntamuy. Wiyayashpanmi yachakuyanqa waran waran mansapakayämänanpaq y surinkunatapis yachasiyänanpaq>.

11<<Saymi jirka chakinman shuntakaykur rikayarqayki jirkapita nina rupar ciëluyaq sharkuqta y yanawyaykaq pukutay pasaypa saparaykaqta. 12Nina rupaykaq chawpinpita Tayta Dios parlapäyämushqaykita wiyarpis kikintaqa manami rikayarqaykisu.#Éxo. 19.16-18; Heb. 12.18-19. 13Mana rikayaptikipis Tayta Dios qamkunawan pactuta rurarmi chunka mandamientukunata ishkay parara rumikunaman qelqarqan mana qonqaypa cumpliyänaykipaq.#Éxo. 31.18. 14Saynöpis say junaqmi Tayta Dios nimarqan estatütunkunata y leyninkunata qamkunata shumaq yachasinäpaq.#Éxo. 21.1. Paymi munaykan täyänaykipaq kaq nacioncho tar leyninkunata imaypis cumpliyänaykita.

Ïdulukunata mana adorayänanpaq nishqan

15<<Horeb jirkacho nina rupaykaqpita Tayta Dios parlapäyämushushqayki junaq kikin imano kashqantapis manami rikayarqaykisu. Sayno mana rikaykarqa cuidä 16ima ïdulutapis rurayankiman.#Éxo. 20.4; Lev. 26.1; Deut. 5.8; 27.15. Ïduluta ama rurayankisu ni olqu niraqta, ni warmi niraqta, 17ni uywa niraqta, ni pishqu niraqta, 18ni qarachaypa puriq niraqta ni pescädu niraqtapis.#Rom. 1.23. 19Saynöpis intita, killata y qoyllarkunata rikar ama adorayankisu. Saykunataqa manami adoranansipaqsu Tayta Dios kamash, saypa trukanqa maysaychöpis taq runakunata asikyapänanpaqmi. 20Egiptucho pasaypa nakayashqaykipitami Tayta Dios jorqayämushurqayki paypa herencian kayänaykipaq.#Deut. 32.9; Sal. 33.12; 74.2; 135.4; Isa. 19.25; Jer. 51.19. Saynölami kanan herencian kaykäyanki.

21<<Sayno kaptinpis Tayta Diosta rabyanäsiyashqaykipitami pay nimash qoykuyäshunaykipaq kaykaq nacionman manana yaykunäpaq kashqanta ni Jordán mayutapis manana simpanäpaq kashqanta.#Núm. 20.12; 27.12-14. 22Saymi kaylachöna wanukushpä Jordán mayuta manana simpäshaqnasu. Qamkunami isanqa simpäyanki say ali nacioncho täyänaykipaq.

23<<Tayta Dios rurashqan pactuta mana qonqaypa cumpliyanki. Ïduluta mana rurayänaykipaq Tayta Dios nikaptinqa ima ïdulutapis ama rurayankisu. 24Tayta Diosqa pay japalanta sirvinansitami munan. Mana cäsukuqkunataqa nina rupar ushashqannömi ushakäsinqa.#Heb. 12.29.

25<<Chäyashqayki nacionchöna täyashpayki surikikuna y wilkaykikuna kayaptin cuidä Tayta Dios nishqanta qonqaykuyashpayki ïdulukunata rurar adorayankiman. Sayno rurayashpaykiqa Tayta Diosninsita fiyupami rabyanäsiyanki.

26<<Jana pasapis y kay pasapis testïgumi kaykan kanan junaq qamkunata nishqäta. Saymi nishqäkunata mana cäsukurqa Jordán mayu simpan nacionkunacho tarpis ushakäyanki. Imayyaqpis saycho täyänaykipa trukanqa manapis aykätami chipyaq ushakäyanki. 27Saymi juklä nacionkunaman mashiypa mashir Tayta Dios qarquyäshuptiki walkaqlana kawaykar quëdayanki. 28Juklä nacionkunacho tarnami qerupita y rumipita rurayashqan ïdulukunata adorayanki.#Deut. 28.36; 2Rey. 17.6; 25.11. Say ïdulukunaqa manami rikayansu ni wiyayansu ni mikuyansu ni jämaytapis kachayansu.

29<<Lapan shonquykikunawan y voluntänikikunawan Tayta Diosta ashirmi isanqa tariyanki.#2Crón. 15.1-15; Jer. 29.13; Mat. 7.7-8. 30Say nacionkunacho fiyupa nakar lakikuyashpayki Tayta Diospa leyninkunata yarpar cäsukuyaptikiqa 31kuyapäkuq kashpanmi kachariyäshunkisu ni ushakäsiyäshunkisu. Unay ayllunsikunawan pactu rurashqantaqa mana qonqaypami lapanta cumplinqa.

32<<Runata kamashqanpita pasa manami imaypis ni maychöpis qamkunata yanapäyäshushqaykinöqa Tayta Dios pitapis yanapashsu. 33Manami mayqan nación runakunapis nina rupaykaqpita Tayta Dios parlamushqanta wiyar qamkunano kawaykar quëdayashsu. 34Musyashqansinöpis Egiptucho fiyupa nakaykashqami milagrukunata, guërrata y espantaypaq kaqkunata rurashpan kikinpa kanansipaq Tayta Diosninsi jorqamarqansi. Pay yanapämashqansinöqa manami mayqan diospis may nación runakunatapis yanapashsu. 35Sayno jorqamashqansita rikarmi musyansi Tayta Diosnilansi rasunpaypa Dios kashqanta. Paypita mas juk diosqa manami kansu.#Éxo. 20.2-3; Isa. 43.10-13; Mar. 12.32.

36<<Leyninkunata yachasimashpansimi jana pasapita Tayta Dios parlapämarqansi. Kay pasachöpis nina rataykaqpita parlapämashqansitami wiyarqansi. 37Unay ayllunsikunata kuyarmi akramashpansi munayninwan Egipto runakunapa makinpita jorqamashkansi. 38Qamkunapita mas kalpasapa runakunatapis paymi ushakäsirqan nacionninkuna qamkunapaqna kananpaq.

39<<Sayno kaykaptinqa imaypis ama qonqayaysu Tayta Diosnilansi jana pasachöpis y kay pasachöpis Dios kashqanta. Manami paypita mas juk diosqa kansu. 40Kanan yachasishqä estatütunkunata y mandamientukunata cumplirqa qamkunapis surikikunapis Tayta Dios qoykuyäshunaykipaq kaq nacioncho imayyaqpis alimi kawayanki>>.

Amparakuyänan markakunata akrayashqan

41Nirkurnami Jordán mayu simpan inti jeqamunan kaqlächo kimsa markakunata Moisés akrarqan runakuna amparakuyänanpaq. 42Say markakuna karqan pipis mana yarpaypa runa mayinta wanupakur amparakunanpaqmi. 43Say markakuna karqan Beser, Ramot y Golánmi. Beser marka karqan Rubén trïbu runakuna täyashqan sunyaq jirka pampachömi. Ramot marka karqan Gad trïbu runakuna täyashqan Galaadchömi. Golán markanami karqan Manasés trïbu runakuna täyashqan Basáncho.#Jos. 20.8-9.

Chunka mandamientukunata Moisés wilashqan

44Kaychömi qelqaraykan Israel mayinkunata Moisés yachasishqankuna. 45Paykunatami Tayta Diospa leyninkunata, estatütunkunata y mandamientunkunata yachasirqan Egiptupita yarqur 46Bet-peor nawpanman chaykur. Bet-peor partiqa Jordán mayu simpan inti jeqamunanlächömi kaykan. Nawpataqa say parti karqan amorreo runakunapa mandaqnin rey Sehónpa makinchömi. Payqa Hesbón markachömi tarqan. Payta y say particho taq runakunatami Egiptupita shamur Israel mayinkunawan Moisés vincirqan. 47Saynölami Basán nacionpa mandaqnin rey Ogtapis vinciyarqan. Amorreo runakunapa ishkay mandaqnin reykunata vincirkurmi nacionninkunaman Israel runakuna yaykuyarqan. Say nacionkunaqa Jordán mayu simpan inti jeqamunan kaqlächömi karqan.

48Saymi Israel runakunapaqna karqan Aroer marka nawpancho kaq Arnón mayupita qalaykur Sirión puntayaq. Say puntapa jukaq jutin kaykan Hermón. 49Arabá pampapis Israel runakunapaq karqan Arabá Lamaryaqmi.#4.49 Arabá Lamarqa Kachi Lamarmi kaykan. Say pampakuna kaykan Jordán mayu simpan inti jeqamunan kaqlächömi. Arabá Lamarpis Pisga niyashqan punta chakinchömi kaykan.

Currently Selected:

Deuteronomio 4: qvhB

Highlight

Copy

Compare