Deuteronomio 3

Mandaq rey Ogta Israel runakuna vinciyashqan

Números 21.31-35

1<<Saypitanami Basán nacionman aywaq nänipa aywarqansi. Sayta musyaykurmi Basán nacionpa mandaqnin rey Og lapan soldädunkunawan Edreiman shayämurqan atacamänansipaq.

2<<Saymi Tayta Dios nimarqan: <Say runakunata ama mansaysu. Noqami yanapäshayki lapan soldäduntinta vincir nacionnintapis munaynikiman churayänaykipaq. Hesbóncho taq amorreo runakunapa mandaqnin rey Sehónta ushayashqaykinömi paykunatapis ushayanki>.

3<<Saynöpami Tayta Diosninsi makinsiman churamurqan Basán nacionpa mandaqnin rey Ogta y lapan nacionninta. Lapan soldädunkunata ushakäsishqami juklaylapis kawaykar qeshpirqansu. 4Saymi nacionnincho kaykaq lapan markakunata ni juktapis mana kachaypa sarikurkurqansi. Say markakunaqa Argob particho soqta chunkami (60) kayarqan. 5Lapan markakunapis altuyaq murallashqami kayarqan. Yaykuna punkunkunapis shumaq sigurashqami kayarqan. Saynölami muralläni aska markakunatapis sarikurkurqansi. 6Say markakunata ushakäsirmi runakunatapis, warmikunatapis y wamrakunatapis lapanta wanusirqansi. Hesbón markacho taq rey Sehónta y nacionninta ushakäsishqansinömi paykunatapis ushakäsirqansi. 7Paykunapa uywankunata y imaykankunatapis väliq kaqkunalatami apakurqansi.

8<<Saynöpami Jordán mayu simpan inti jeqamunan kaqlächo amorreo runakunapa ishkay mandaqnin reykunata vincir nacionninkunata sarikurkurqansi. Say sarikurkushqansikuna kaykäyan Arnón mayupita pasa Hermón puntayaqmi. 9(Hermón puntatami Sidón runakuna Sirión niyarqan. Amorreo runakunanami Senir niyarqan.) 10Saynöpis sarikurkurqansi pampacho kaq markakunata, Galaad partita y lapan Basán nacionta Salca markapita qalaykur Edrei markayaq. Saycho kaq markakunataqa rey Og munayninchömi sarararqan. Say markakunata lapantami qechurqansi>>.

11Basán nacionpa mandaqnin rey Ogqa jatunkaray refaíta runami karqan. Payta wanurasish manami mas refaíta runakuna kayarqannasu. Paypa catrinpis fiërrupitami karqan. Catrinpa larguyninpis chusku metrumi karqan. Anchuyninnami ishkay metruno karqan. Amonita runakuna taykäyashqan Rabá markachömi kananyaqpis catrin kaykanraq.

Rubén trïbu, Gad trïbu y pulan Manasés trïbu runakuna posisionninkunata chaskiyashqan

Números 32.1-42

12<<Sarikurkushqansi markakunata chakrantintami Rubén trïbu runakunata y Gad trïbu runakunata rikasirqä. Say markakuna kaykan Arnón mayu nawpan Aroer markapita qalaykur pulan Galaad jalqakunayaqmi.

13<<Saypita aywaraq Galaad jalqakunata y Og mandashqan Basán naciontami pulan Manasés trïbu runakunata rikasirqä. Basáncho kaykaq Argob partiqa refaíta runakunapami karqan. 14Argob partitami Manasés trïbu Jair jutiyuq runa sarikurkurqan Gesurpa y Maacapa lindërunyaq. Sarikurkurnami say partita kikin jutisirqan Havot-jair#3.14 Havot-jair ninanqa Jair sharkasishqan markakuna ninanmi. jutin kananpaq. Kananyaqpis say jutilami kaykan. 15Galaad partitanami Maquir ayllu runakunata rikasirqä.

16<<Rubén trïbu runakunata y Gad trïbu runakunatami rikasirqä pulan Galaad partipita hasta Arnón mayuyaq. Saymi lindërun kaykan Arnón mayupita Jaboc mayuyaq. Jaboc mayupitanami amonita runakuna täyashqan parti qalaykun. 17Saynöpis Cineret qochapita#3.17 Cineret qochaqa Galilea qochami kaykan. Arabá Lamaryaqmi paykunata rikasirqä Arabá pampata. Arabá Lamarqa Kachi Lamarmi kaykan. Inti jeqanan kaqläpa lindërun kaykan Jordán mayumi. Inti jeqamunan kaqläpanami Pisga niyashqan jirka kaykan.

18<<Say wisanmi Rubén trïbu, Gad trïbu y pulan Manasés trïbu runakunata nirqä: <Tayta Diosninsi kay partikunata qoykuyäshuptikipis armaykikuna apakurkur Israel mayikikunapa puntanta aywayay pelyäsiyänaykipaq. 19Noqa musyämi aypala uywaykikuna kashqanta. Saymi rikasishqä markakunacho warmikikunawan surikikunala uywaykikunata rikar quëdayanqa. 20Markaykikunaman ama kutiyämunkiraqsu Israel mayikikunata Jordán mayu simpancho posisionninkunata Tayta Diosninsi manaraq qoptinqa. Posisionnikikunata Tayta Dios qoyäshushqaykino paykunatapis qoptinraq kutiyämunki>.#Jos. 1.12-15.

21<<Josuétapis kaynömi nirqä: <Rikashkankimi Tayta Diosninsi say ishkay reykunata imano ushakäsishqantapis. Saynölami yaykunaykipaq kaq nacionkunacho taq runakunatapis ushakäsinqa. 22Tayta Diosninsimi qamkunapa favorniki pelyanqa. Sayno kaykaptinqa ama mansariyaysu>.

Canaánman Moisés mana yaykunanpaq tantiyasishqan

23<<Saypitami Tayta Diosta manakur nirqä: 24<Tayta Dios, munayyuq kashqaykitami tantiyaykäsimanki. Qampita mas munayyuqqa jana pasachöpis ni kay pasachöpis manami ima diospis kansu. Qam rurashqaykino ima milagrutapis rurananpaq manami mayqan diospis kansu. 25Taytay, kanan ruwakushayki. Kuyaylapaq jalqakunata y Líbanutapis rikaykunäpaq Jordán mayuta simpaykasilämay>.

26<<Sayno ruwakuptïpis Tayta Diosta rabyanäsiyashqaykipitami aywanäta mana munar nimarqan: <Sayta amana manakamaynasu. 27Saypa trukanqa Pisga niyashqan jirkaman wisarkur intërupa rikachakunki. Jordán mayutami isanqa simpankisu.#Núm. 27.12-14; Deut. 32.48-52. 28Say rikanaykipaq kaq nacionmanqa Josuénami Israel runakunata pushanqa. Sayno kaykaptinqa payta shakyäsinki say nacionta aypunanpaq>. 29Sayno nimaptinmi Bet-peor simpan pampalacho quëdakurqansi>>.

Currently Selected:

Deuteronomio 3: qvhB

Highlight

Copy

Compare