Deuteronomio 33
33
Moisés bendicionta qoshqan
1Tayta Dios akrashqan runami Moisés karqan. Paymi manaraq wanukur Israel runakunata bendicionta qor 2nirqan:
<<Tayta Diosmi Sinaí jirkapita shamush.
Seirpita pasami aksipämashkansi.
Parán jirkapitami chipikyapämashkansi.
Chunka waranqa (10,000) angilninkunawanmi shamush.
Ninanöraqmi leyninpis aluq kaq makincho chipipïmush.
3Akrashqan runakunata Tayta Dios kuyanmi.
Pay munashqanno kawaq santu runakunata makinchömi sararan.
Diospa puntanmanmi paykuna qonqurpakuyan.
Saychömi tantiyasishqanta chaskikuyan.
4Diospa leyninkunatami Moisés wilapämashkansi.
Jacobpita miraq kashqami say leykunaqa herenciansino kaykan.
5Jesurún runakunapa#33.5 Jesurún ninanqa ali kawaq ninanmi. Sayno nirqan jukman jitaykular kikinkunapaqmi.#Deut. 32.15; Isa. 44.2. mandaqninkuna lapan trïbukunawan shuntakäyashpanmi Tayta Diosta chaskiyarqan mandaqnin rey kananpaq>>.
6Rubén trïbu runakunapaqmi Moisés nirqan:
<<Walkaqla karpis Rubén trïbu runakuna ama ushakäyäsunsu>>.
7Judá trïbu runakunapaqmi Moisés nirqan:
<<Tayta Dios, Judá trïbu runakuna manakuyäshushqaykita wiyaykulay.
Paykunataqa mashtakäyaptinpis shuntaykulay.
Podernikiwan sapaykulay.
Contrankunata vinciyänanpaq yanapaykulay>>.
8Leví trïbu runakunapaqmi Moisés nirqan:
<<Tayta Dios, Masahcho y Meribacho#Éxo. 17.1-7; Núm. 20.13. yaku pashtamushqanchömi Leví trïbu runakuna cäsukuyäshushqaykita o mana cäsukuyäshushqaykitapis musyayta munarqayki.
Nishqaykita wiyakuq kayaptinmi paykunata aptapashkanki Tumimnikita y Urimnikita.#Éxo. 28.30.
9Paykunaqa nishqaykita cäsukurmi pactu rurashqaykita cumpliyarqan.
Mamanta, taytanta, wawqinkunata y surinkunata kuyayashqanpitapis masmi qamta kuyayäshunki.#Éxo. 32.26-29.
10Nishqaykikunatapis Jacobpita miraq runakunatami tantiyasiyan.
Leynikikunatapis Israel runakunatami yachasiyan.
Nawpaykichömi inciensuwan qoshnisiyan.
Altar jananchömi rupasina sacrificiuta rupasiyan.
11 Tayta Dios, paykuna sirviyäshunaykipaq yanapaykulay.
Paykuna rurayashqan shonquykipaqno kaykuläsun.
Chikiqninkuna yarpäyashqankunata manakaqman churaykulay.
Contrankunapis amana sharkuyäsunnasu>>.
12Benjamín trïbu runakunapaqmi Moisés nirqan:
<<Paykunaqa Tayta Dios kuyashqanmi kaykäyan.
Diospa nawpancho kushishqami kawayan.
Paykunataqa imapitapis sapanqami.
Makilanchömi imaypis sararanqa>>.
13Josépita miraq trïbu runakunapaqmi Moisés nirqan:
<<Paykunapa chakrankunaman Tayta Dios bendicionninta churaykuläsun.#Gén. 49.22-26.
Shumaq ushmananpaq jana pasapita shulyaykasilämusun.
Parquyänanpaq yakutapis pasa rurinpita pashtaykasilämusun.
14Saynöpis intipa shanayninwan mikuyninkuna shumaq poquykuläsun.
Cosëchankunapis tiempulancho ali qeshpiykuläsun.
15Lömakunachöpis mikuy ali wayuykuläsun.
Jalqakunachöpis lasaqta cosechaykuyäläsun.
16Chakrankunapis ali chakra kaykuläsun.
Mikuyninkunapis ali wayuykuläsun.
Rupaykaq shirakacho yuripäkuq Tayta Dios paykunata kuyapaykuläsun.
Josétami lapan wawqinkunapita mandaq kananpaq akrarqan.
Josépita miraq trïbu runakunapaq kay bendicionkuna kaykuläsun.
17Qechpa töru kalpasapa kashqannömi kalpasapa kaykäyan.
Waqraq töru runakunata ashtir ushashqannömi maysay nación runakunatapis ushakäsiyanqa.
Saynömi kayanqa yupaytapis mana atipaypaq Efraín runakuna.
Saynömi kayanqa yupaytapis mana atipaypaq Manasés runakunapis>>.
18Zabulón trïbu runakunapaq y Isacar trïbu runakunapaqmi Moisés nirqan:
<<Zabulón trïbu runakuna maypapis purir kushikuyäsun.
Isacar trïbu runakuna toldunkunacho ali kawayäsun.
19Paykunaqa täyashqanlächo jirkamanmi juklä runakunata qayasiyanqa.
Saychömi Tayta Dios munashqanno sacrificiukunata rupasiyanqa.
Saynölami lamarcho aska pescädukunata sarir kushish kawayanqa.
Lamar kuchun aqusha rurincho tarishqankunawanmi rïcuyäyanqa>>.#Gén. 49.13.
20Gad trïbu runakunapaqmi Moisés nirqan:
<<Tayta Dios alabash kaykuläsun.
Paymi Gad trïbu runakunapa chakrankuna aska kayänanpaq yanaparqan.
Paykunaqa cäzaraq leonnömi kaykäyan.
Vinciyashqan runakunapa rikrankunatapis umankunatapis pakiriyanmi.
21Alinnin kaq chakrakunatami paykuna sariyash.
Chakrankunaqa soldädukunapa mandaqninkunapa alinnin kaq chakrannöraqmi kaykäyan.
Israel mayinkunata yanaparmi puntanta aywayarqan.
Lapantapis Tayta Dios tantiyasishqannölami cumpliyarqan.
Israel nacionchöpis Tayta Dios munashqantami rurayarqan>>.#Núm. 32.1-42.
22Dan trïbu runakunapaqmi Moisés nirqan:
<<Dan trïbu runakunaqa Basán partipita saltamuq malta leonnömi kaykäyan>>.
23Neftalí trïbu runakunapaqmi Moisés nirqan:
<<Neftalí trïbu runakunataqa Tayta Dios kuyanmi.
Paykunata aska bendicionninkunatami qosh.
Qocha kuchunpami chakrankunapis kaykäyan>>.
24Aser trïbu runakunapaqmi Moisés nirqan:
<<Aser trïbu runakuna wakinkunapita masraq bendicionta chaskiykuyäsun.
Paykunata Israel mayinkuna kuyaykuyäsun.
Chakinkunata ushmasiyänanpaqpis olïvu aceiti pusuy pusuy kaykuläsun.
25Marka yaykuna punkunpa trancankunapis fiërrupita y broncipita rurash kaykuläsun.
Kalpankunapis wanuyashqanyaq ama ushakaykuläsunsu>>.
26<<Manami ima diospis kansu Jesurúnpa#33.26 Jesurún ninanqa ali kawaq ninanmi. Sayno nirqan Israel runakunapaqmi. Diosninnöqa.
Payqa pukutay janalanpami yanapäyäshunaykipaq shamun.
27Imayyaqpis kawaq Tayta Diosmi imaykapitapis sapäyäshunki.
Makinchömi imaypis sararäyäshunki.
Paymi chikishuqnikikunatapis nawpaykikunapita qarqun.
Sayno qarquptinmi qatikachar ushakäsiyanki.
28Israel runakunaqa jawkalami kawayanqa.
Jacobpita miraqkunapis kushishqami kawayanqa.
Chakrankunacho trïgupis üvapis alimi wayunqa.
Tiempulanchömi tamyapis tamyamunqa.
29Israel runakuna, qamkunatami Tayta Dios kuyayäshunki.
Qamkunano kushish kawayta ¿piraq munanmansu?
Qamkunataqa Tayta Diosmi salvayäshushkanki.
Paymi imaykapitapis sapäyäshunaykipaq escüdu kaykan.
Paymi contraykikunata vinciyänaykipaq espäda kaykan.
Pay yanapäyäshuptikimi chikishuqnikikunatapis asulayanki.
Diosninkunata adorayänan altarninkunatapis juchusiyanki>>.
Currently Selected:
Deuteronomio 33: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
