Deuteronomio 32

1<<Jana pasa, kanan cantashqäta wiyamay.

Kay pasa, imata nikashqätapis wiyamay.

2Yachasishqäkuna imayka tamyanömi runakunaman chanqa.

Wilakuynïqa shulyano, qewaman chaq chirapano y pashpata ushmaq chirapanömi kanqa.

3<<Tayta Dios munayyuq kashqantami wilakushaq.

¡Payta lapayki alabayay!

4Paymi imaykapitapis sapämansi.

Imatapis alilatami ruran.

Leyninkunapis alimi.

Manami imaypis lulakunsu.

Manami jusalikunsu.

Rasun kaqlatami parlanpis.

5<<Sayno kaptinpis jusasapa karmi Tayta Diosta rabyanaykäsiyanki.

Paypa wamran kaytapis manami merëciyankisu.

6Mana tantiyakuq upa runakuna, ¿imanirtaq mal agradecïdu kaykäyanki?

Tayta Dios ¿manaku Taytaykikuna kaykan?

Saynöpis ¿manaku kamayäshuqniki y kawayta qoyäshuqniki Dios kaykan?

7<<Unay Israel runakuna imano kawayashqantapis yarpäyay.

Musyayänaykipaq papänikikunata tapukuyay.

Wilapäyäshunaykipaq awiluykikunata tapukuyay.

8Runakunata nacionkunaman rakirmi poderyuq Tayta Dios lindërunkunata churaparqan.#Hech. 17.26.

Sayno churarqan Israel runakuna aykapis kayashqanman tupumi.

9Saymi paykunata kuyar yanapänanpaq akrarqan.

Jacobpita miraqkunatami paypa herencian kayänanpaq shuntarqan.

10Wayrala tumaykaq sunyaq jirkacho kaykaqtami paykunata tarirqan.

Kuyapashpan shuntarkurmi shumaq yachasirqan.

Nawi nïñuntanömi paykunata cuidarqan.

11Qeshun jananpa tumar pushapankuna pajayänanpaq#32.11 Wakin runakunaqa vuelayänanpaq niyanmi. anka yanapashqannömi paykunata imaypis yanaparqan.#Éxo. 19.4.

12<<Tayta Dioslami paykunata pushamurqan.

Juk dioskunaqa manami yanapäyarqansu.

13Lapanta vinciyänanpaq yanapashpanmi jalqakunapa pushamurqan.

Jirka jachakunapa wayuynintami mikuyänanpaq kamariparqan.

Paykunata qarananpaqmi mishkitapis aceititapis qaqapita yarqasimurqan.

14Quësutapis y cabrapa lichintapis kamariparqanmi.

Basán partichöpis wera carnikunata, uyshakunata y chïvukunatami kamariparqan.

Bendicionninta churaptinmi alinnin trïguta mikuyarqan.

Alinnin üvapita rurash vïnutami upuyarqanpis.

15<<Sayno kawarmi Jesurún runakuna#32.15 Jesurún ninanqa ali kawaq ninanmi. Sayno nirqan Israel runakunatami.#Deut. 33.5, 26; Isa. 44.2. seqaypa werayäyarqan.

Werayaylawanmi llushwaypa llushwäyarqanraq.

Sayno karmi kamaqnin Tayta Diostapis qonqakuykuyarqan.

Salvaqnin y sapaqnin kaptinpis manami cäsupäyarqansu.

16Juk dioskunata adorayashpanmi Tayta Diosta rabyanäsiyarqan.

17Sacrificiukunatapis supaykunapaq#1Cor. 10.20. y manakaq dioskunapaqmi rupasiyarqan.

Say dioskunataqa unay ayllunkunapis imaypis manami adorayarqansu.

18<<Israel runakuna, qamkuna qonqaykuyashkanki imaykapitapis sapämaqninsi Taytansitami.

Saynöpis qonqaykuyashkanki kawayta qomaqninsi Tayta Diostami.

19Sayno kayaptikimi Tayta Dios rabyakush.

Wamrankuna kaykarmi sayno rabyanäsiyashkanki.

20Saymi nirqan:

<Paykunata manami rikaytapis munäsu.

Mä imanöshi paykuna kawayanqa.

Wamräkuna karpis mana yärakuypaq mana ali runakunami kaykäyan.

21Manakaq dioskunata adorarmi rabyanäsiyäman.#1Cor. 10.22.

Ïdulukunaman yärakurmi ajanäsiyäman.

Saymi jäpa marka runakunatana yanapar paykunata ajanäsishaq.

Mana tantiyakuq runakunata chaskikurmi paykunata lakikasishaq.#Rom. 10.19.

22Imayka nina rupaqnöraqmi pasaypa rabyanaykä.

Rabyaynï chanqa pasa rurinyaq y jirkakunapa cimientunyaqmi.

Mikuy mana wayunanpaqmi chakratapis qachpayäsishaq.

23Paykunata tukuynöpami castigashaq.

Wakpita kaypitami flëchäkunatapis chäsishaq.

24Mikanayta, shanayta y pesti qeshyatami paykunata ushananpaq kachamushaq.

Fiyu uywakunata y venënuyuq culebrakunatami yurisimushaq.

25Cällikunachöpis espädawanmi wanusinakuyanqa.

Wayinkunachöpis fiyupami mansariyanqa.

Maqtapis, jipashpis, itipis awkinpis wanuyanqami.

26<< <Maysay nacionkunaman qarquytami yarpashkä.

Imaypis kawayashqanta pipis mana musyananpaqmi ushakäsiyta yarpashkä.

27Isanqa contrankuna kushipäyänanta manami munäsu.

Saynöpis manami munäsu contrankuna runa tukur:

<<Tayta Diosnin sapaykaptinmi ushakäsishkansi>> niyänanta>.

28<<Israel runakunapaqa yarpayninkunapis manami kansu.

Imata rurayashqantapis manami tantiyakuyansu.

29Kanan nishqäkunata ojalä tantiyakuyanman.

Ushakäyänanpaq kashqanta cuentata qokuyaptin alimi kanman.

30 Tayta Dios mana yanapaptinqa ¿imanöparaq juk runala waranqa (1,000) runakunata qatikachanman?

Saynöpis ¿imanöparaq ishkay runala chunka waranqa (10,000) runakunata qatikachäyanman?

Saynölami contrankunata Tayta Dios yanapaptin Israel runakunata qatikachar vinciyarqan.

31<<Contransi runakunapa diosninkunaqa manami Diosninsinösu kaykan.

Saytaqa paykunapis musyayanmi.

32Contransi runakunaqa Sodomacho y Gomorracho taq runakunanömi kaykäyan.

Pochquq y venënuyuq üvata wayuq chakranömi kaykäyan.

33Say üvapita rurash vïnupis culebrapa venënunnömi kaykan.

34<<Paykunapaqqa Tayta Dios kaynömi nin:

<Jusalikuyashqankunata manami qonqäsu.

Qonqaykunäpaq kashqantachi yarpaykäyan.

35Lutanta rurayashqanpita kikïmi juzgashaq.#Rom. 12.19; Heb. 10.30.

Mana kuyapaypa ushakäsinäpaqmi jusankuna aypaykämunna.

Höran chaykämunnami paykunata juzganäpaq>.

36<<Kuyashqan runakunataqa valornin ushakaptinpis Tayta Dios yanapanqami.

Payta sirviqkunataqa ushakäyänanpaq kaykaptinpis kuyapanqami.#Sal. 135.14.

37Saymi Tayta Dios ninqa:

<¿Maytaq imapitapis sapäyäshunaykipaq yärakuyashqayki diosnikikuna?

38Uywakunapa wiranta qarapäyashqayki y vïnuta jichapäyashqayki diosnikikuna ¿maychötaq kaykäyan?

¡Kanan sharkayämusun yanapäyäshunaykipaq!

¡Shayämusun washäyäshunaykipaq!

39Noqalami Tayta Dios kaykä.

Noqapita juk diosqa manami kansu.

Noqami munayyuq kaykä pitapis kawayta qonäpaq y kawayta qechunäpaqpis.

Noqami pitapis qeshyasï y aliyäsï.

Makïpita manami pipis qeshpinsu.

40Imayyaqpis kawaq Dios kashpämi makïta jana pasaman joqarkur jurar nï:

41Conträkunata juzganäpaq chipipiqtaraqmi espädäta afilashaq.

Chikimaqnïkunataqa jama jamaykurmi castigashaq.

42Paykunata ushaptï flëchäkunapis yawarlanami kanqa.

Espädäpis aysanta kusurmi ushanqa.

Saynömi wanuyanqa guërracho pelyarpis o prësu aywarpis.

Mandaqninkunapa umantapis espädämi roqunqa>.

43<<Maysay nacioncho taqkuna,

Tayta Dios kuyashqan runakunawan juntu kushikuyay.#Rom. 15.10.

Payta sirviq runakunata wanusiyashqanpita kikinkunatami ushakäsinqa.#Apoc. 19.2.

Kuyashqan runakunata perdonarmi nacionnintapis purificanqa>>.

Ushanan yäsikuykuna

44Say versutami Numpa surin Josuéwan aywaykur lapan Israel runakunata Moisés liyiparqan. 45Liyipayta ushaskirmi Israel runakunata 46nirqan: <<Kanan junaq tantiyasishqäta shumaq tantiyakuyay. Yachasishqä leykunata cumpliyänanpaq surikikunata yachasiyay. 47Kay leykunata manami walälapaqsu yachasishkä, saypa trukanqa saykunata cumplir ali kawayta tariyänaykipaqmi. Say leykunata cumplirqa Jordán mayuta simpaykur posisionta chaskir aska watami saycho kawayanki>>.

Tayta Dios promitishqan nacionta Moisés rikashqan

48Say junaqmi Moisésta Tayta Dios nirqan: 49<<Moab nacioncho kaykaq Abarim jirkakunapa aywar Nebo jirkaman wisay. Say kaykan Jericó marka simpanchömi. Say jirkapitami rikanki Israel runakunata qonäpaq kaykaq Canaánta. 50Hor jirkacho wawqiki Aarón wanur unay aylluykikunawan tinkuq aywakushqannömi qampis Nebo jirkacho wanushpayki unay aylluykikunawan tinkuq aywakunki. 51Israel runakunapa nawpancho wawqiki Aarónwan manami cäsukayämashkankisu. Meriba pukyucho kaykarpis manami respitayämashkankisu. (Say karqan Zin niyashqan sunyaq jirkacho kaykaq Cadeschömi.) 52Sayno kashqaykipitami Israel runakunata qoykunäpaq kaykaq nacionta karulapita rikanki. Sayman manami imanöpapis yaykunkisu>>.#Núm. 20.10-13; 27.12-14; Deut. 3.25-27.

Currently Selected:

Deuteronomio 32: qvhB

Highlight

Copy

Compare