Deuteronomio 31
31
Israel runakunata y Josuéta Moisés valurasishqan
1Saypitanami Israel runakunata yapay Moisés nirqan: 2<<Pachak ishkay chunka (120) watayuqna karmi qamkunata pusharayta puëdïnasu. Saynöpis Tayta Diosmi nimash Jordán mayuta manana simpanäpaq.#Núm. 20.12. 3Tayta Dios nishqanno Josuénami Jordán mayuta simpar pushayäshunki. Saynöpis kikin Tayta Diosmi puntaykikunata aywar say nacioncho taq runakunata ushakäsinqa. Saynöpami paykuna täyashqan markakuna qamkunapaqna kanqa.
4<<Amorreo runakunapa mandaqnin reykuna Sehónta y Ogta y mandayashqan runakunata ushakäsishqannölami yaykuyänaykipaq kaykaq nacioncho taykaq runakunatapis Tayta Dios ushakäsinqa.#Núm. 21.21-35. 5Say runakunata ushakäsiyänaykipaqqa#Deut. 7.23-25; 20.16-17. makikikunamanmi Tayta Dios churamunqa. Churamuptin noqa nishqänöla lapanta ushakäsiyanki. 6Mana mansariypa ushakäsiq yaykuyanki. Tayta Diosmi qamkunawan aywanqa. Manami kachaykuyäshunkisu ni qonqayäshunkisu. Sayno kaykaptinqa say runakunata ama mansayaysu>>.
7Nirkurnami Josuéta qayaykur lapan runakunapa nawpancho Moisés nirqan: <<Kananqa seqlaykita chachak wachkakurkur mana mansariypa kay runakunata pushay unay ayllunsikunata Tayta Dios promitishqan nacionman. Saynöpis qammi posisionninkuna aypunki. 8Kikin Tayta Diosmi nawpaykita aywar imaypis yanapäshunki. Manami kachaykushunkisu ni qonqashunkisu.#Jos. 1.5; Heb. 13.5. Sayno kaykaptinqa ama mansarinkisu>>.
Diospa leyninkunata liyimunanpaq nishqan
9Lapan kay tantiyasishqankunata qelqaykurmi Moisés entregarqan Pactu Babulta apaq Leví cürakunata y mayor runakunata. 10Entregaykurmi paykunata nirqan: <<Cada qanchis wata jaqakunata perdonayänan wata chämuptin#Deut. 15.1. Ramäda fiestacho#Deut. 16.13-15. 11Tayta Dios akrashqan sitiuman Israel runakuna shuntakäyanqa. Saycho lapanpis wiyayänanpaq kay leykunata liyipäyanki.#2Rey. 23.2; Neh. 8.1-8. 12Saychömi olqukunapis, warmikunapis, wamrakunapis y qamkunacho taq jäpa runakunapis shuntakäyanqa liyipäyashqaykita wiyar Tayta Diosninsita mansapakur yachakuyänanpaq y kay leykunacho lapan nishqankunata cäsukur kawayänanpaq. 13Saynöpami surikikunapis Tayta Diosta imaypis mansapakuyänanpaq yachakuyanqa. Jordán mayuta simparir chaskiyänaykipaq kaykaq nacioncho täyashpayki imaypis sayno liyipäyanki>>.
Moisésta y Josuéta Tayta Dios yäsishqan
14Saypitanami Moisésta Tayta Dios nirqan: <<Wanukunaykipaq walkalanami pishiykan. Sayno kaykaptinqa Josuéta pushakurkur Tinkunansi Tolduman shamuy. Saychömi payta yäsishaq imata rurananpaq kashqantapis>>.
Sayno niptinmi Moiséswan Josué Tinkuna Tolduman aywayarqan. 15Saychönami Tayta Dios paykunata yuriparqan ichiraykaq pukutaycho. Say pukutayqa Tinkuna Tolduman yaykuna punku jananchömi kaykarqan.
16Saypitami Moisésta Tayta Dios nirqan: <<Wanukur unay aylluykikunawan tinkuq aywakunaykipaq walkalanami pishiykan. Wanukuptiki Israel runakuna promitishqä nacionman yaykuyashpan saycho taq runakuna adorayashqan dioskunatami adorayanqa. Saynöpami qonqaykayämar paykunawan pactu rurashqätapis cumpliyanqanasu. 17Sayno mana cumpliyaptinmi noqapis fiyupa rabyakushpä rikaytapis munashaqsu. Saymi paykunata mana kuyapaypa castigaptï imayka desgraciakuna päsanqa. Saymi fiyupa nakar tantiyakuyashpan niyanqa: <Tayta Diosninsi manana yanapämashqami lapan kaykuna päsaykämansi>. 18Sayno tantiyakuyaptinpis lutankunata rurar juk dioskunata adorayaptinmi paykunapita witikushaq. 19Saymi kanan yachasishayki juk versuta qelqarkur Israel runakunata yachasinaykipaq. Say versuta cantarmi jusalikuykäyashqanta tantiyakuyanqa.
20<<Israel runakunatami kanan yaykasishaq unay ayllunkunata promitishqä nacionman. Saycho lichipis abëjapa mishkinpis yakunöraq aska kaptin pacha juntami mikuyanqa. Werayarnami juk dioskunata adorayashpan qonqaykayämanqa. Sayno rurarmi paykunawan pactu rurashqätapis cumpliyanqanasu. 21Sayno kaptinqa kay versuta paykunata yachasinki. Saynöpami paykunapita miraq surinkunapis mana qonqaypa cantayanqa. Saymi mana cäsukayämashqanpita imayka desgracia päsaptin lakikuyashpan kay yachasishqä versukunata cantar jusalikuykäyashqanta tantiyakuyanqa. Promitishqä nacionman manaraq yaykuptinpis maynami musyaykä imano kayänanpaq kashqantapis>>.
22Sayno niptinmi jinan höra versuta qelqarkur Israel runakunata Moisés yachasirqan.
23Saypitanami Nunpa surin Josuéta Tayta Dios nirqan:#Núm. 27.23. <<Qammi Israel runakunata promitishqä nacionman yaykasinki. Qamwan kaykaptïqa ama qelanaysu ni mansariysu>>.#Jos. 1.6.
Pactu Babul nawpanman leykunata churayänanpaq nishqan
24Lapan leykunata libruman Moisés qelqarkurmi 25Tayta Diospa Pactu Babulninta apaq levitakunata nirqan: 26<<Kay libruta churayay Tayta Diosninsipa Pactu Babulnin nawpanman. Kay librumi testïgu kanqa jusalikuyashqaykipita Tayta Dios juzgayäshunaykipaq. 27Noqa musyämi mana wiyakuq y mana tantiyakuq kayashqaykita. Kawaykaptïpis Tayta Diosta fiyupa rabyanaykäsirqa wanukuptï ¿imatanaraq rurayankipis?
28<<Kananqa lapan mayor runakunata y cada trïbupa mandaqninkunata pushamuy Tayta Dios nishqankunata tantiyasinäpaq. Paykunata tantiyasishqätaqa jana pasapis y kay pasapis testïgumi kayanqa. 29Musyänami wanukuptïqa Tayta Diosta mana cäsukushpayki tantiyasishqäkunata qonqaykuyänaykipaq kashqanta. Lutankunata rurar Tayta Diosta fiyupa rabyanäsiyashqaykipitami pasaypa nakayanki>>.
Versuta Moisés liyipashqan
30Sayno nirkurmi lapan Israel runakunapa nawpancho kay versuta qalaykunanpita ushananyaq Moisés kayno liyiparqan:
Currently Selected:
Deuteronomio 31: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
