Deuteronomio 2

Sunyaq jirkapa Israel runakuna aska wata puriyashqan

1<<Saypita Tayta Dios nimashqannömi Puka Lamarpa aywaq nänipa#Núm. 21.4. sunyaq jirkaman aywarqansi. Seir jalqakuna kinraypami aska wata purirqansi. 2Sayno puriykashqami Tayta Dios nimarqan: 3<Aläpanami kay jalqakunapa puriykäyanki. Kananqa norti kaqläpana aywayay. 4Sayno kaptinqa Israel mayikikunata ninki: <<Seir jalqakunapita yarqunansipaq Jacobpa wawqin Esaúpita miraq runakuna täyashqanpanami päsashun.#Gén. 36.8; Núm. 20.14-21. Paykuna fiyupa mansamashqapis alcäbula päsashun. 5Esaúpita miraqkunatana Seir jalqakunata qoykush kaykaptïqa paykunawan ama pelyayaysu. Paykunapa nacionnincho kaykaq chakranta manami ni juk pedäzulatapis qoyäshaykisu. 6Paykunapa mikuynintapis qellaywanmi rantiyanki. Yakunta upuyänaykipaqpis pägayankimi>> >.

7<<Lapan rurashqansichömi Tayta Dios bendicionta qomashkansi. Saymi chusku chunka (40) watantin sunyaq jirkapa purish imapis pishïmarqansisu. 8Sayno kaptinmi Jacobpa wawqin Esaúpita miraq runakuna taykäyashqan Seir jalqakunapa päsarqansisu. Saypa päsar Arabá pampapa aywaraq nänipa päsanansipa trukanmi Moab niyashqan sunyaq jirkapa aywaq nänipana tumarqansi. (Arabá pampaqa Elat y Ezión-geber markakunapitami qalaykun.) 9Moabpa päsashqami Tayta Dios nimarqan: <Lotpita#Gén. 19.37; Núm. 21.10-20. miraq moabita runakunata ama achäquita ashipaysu ni paykunawan pelyaysu. Paykunatami Ar partikunata qoykushkä. Saymi ni takshalatapis paykunapa nacionnintaqa qoshaykisu> >>.

10(Moabita runakuna nacionninman manaraq chäyaptin emita runakunami say partikunacho täyarqan. Paykunapa markankuna askami karqan. Anacpita miraq runakunanömi paykunapis jatusaq kayarqan. 11Say runakunata refaíta jutiwan wakin runakuna reqiyaptinpis moabita runakunanami emita jutiwan reqiyarqan. 12Saynöpis Seir partichömi horeo runakuna unay täyarqan. Paykunatami Esaúpita miraqkuna wanuykasir saycho taykäyan. Saynölami Israel runakunapis Tayta Dios qoykushqan nacionpita cananeo runakunata qarquyarqan.)

13<<Saypitami Tayta Dios nimarqan: <Kaypita aywakuyashpayki Zered mayuta päsayay>. Saymi Zered mayuta simparqansi. 14Cades-barneapita yarqamushqansi junaqpita Zered mayuta päsamushqansi junaqyaq kimsa chunka puwaq (38) watami päsarqan. Say watakunachömi guërraman aywayänanpaq censayashqan runakuna Tayta Dios nishqanno lapanpis sunyaq jirkacho ushakäyarqan.#Núm. 14.28-35. 15Tayta Diosmi paykunata castigashpan lapanta ushakäsirqan.

16<<Lapan wanur ushakaskiyaptinnami 17Tayta Dios nimarqan: 18<Moab nacionpa lindërunta päsayashpayki kanan Ar markaläman aywayay. 19Amonita runakunaman chäyashpayki ama wajupäyankisu ni paykunawan ama pelyayankisu. Lotpita#Gén. 19.36-37; Núm. 21.10-20. miraqkuna kayaptinmi amonita runakunata say partikunata qoykushkä. Saymi paykuna täyashqan nacionta entregayäshaykisu> >>.

20(Unayqa say nacioncho refaíta runakunami täyarqan. Paykunatami amonita runakuna niyarqan zomzomeo runakuna kayashqanta. 21Refaíta runakunapa markankuna askami kayarqan. Saynöpis Anacpita miraq runakunanömi jatusaq kayarqan. Sayno kayaptinpis amonita runakunatami Tayta Dios yanaparqan say runakunata ushakaykasir saycho täyänanpaq. 22Saynölami Esaúpita miraqkunatapis Tayta Dios yanaparqan Seircho taq horeo runakunata ushakaykasir saycho täyänanpaq. 23Caftorpita#2.23 Caftor karqan Creta islapa unay jutinmi. Caftor runakuna Canaánman chaptin filisteo jutiwan reqiyarqan. shamuq runakunami Gaza nawpankunapa taksha markakunacho taq aveo runakunata ushakaskasir saycho täyarqan.)

24<<Saymi Tayta Dios nimarqan: <Arnón mayuta jukla simpayay. Noqami qamkunapa munaynikiman churashaq amorreo runakunapa mandaqnin rey Sehónta y nacionnintapis. Payqa Hesbón markachömi taykan. Paykunata atacayashpayki nacionninman yaykuyay. 25Kananpitami maysaychöpis lapan runakunapa shonqunkunaman fiyupa mansariyta churashaq mansayäshunaykipaq. Saymi qamkunapaq parlaqta wiyayashpan fiyupa mansariywan suksukyäyanqa>.

Rey Sehónta vinciyashqan

Números 21.21-30

26<<Cademot niyashqan sunyaq jirkapita pasami kachakunata Hesbón markacho taykaq rey Sehónman kacharqä ali shimilanpa ruwakur niyänanpaq: 27<Nacionnikipa päsaq nänilaykipa päsakuykuyäläshaq, taytay. Maypapis mana yaqaykachaypami jatun nänilapa päsakuyäläshaq. 28Mikuynikita mikuyashqäpita y yakuykita upuyashqäpitapis pägayäshaykimi. Saymi ruwakü nacionlaykipa päsakuyänäpaq. 29Seircho taykaq Esaúpita miraq runakuna y Archo taykaq moabita runakunapis nacionninpa päsakuyänäpaq kachapäyämashqami. Saynöla qampis kachapaykayälämay ari, taytay. Tayta Diosnï promitiyämashqan posisionta Jordán mayu wak simpanchöraqmi chaskiyäshaq>.

30<<Sayno nir ruwakushqapis rey Sehón nacionninpa päsamunansita manami munarqansu. Sayno mana munananpaqqa Tayta Diosmi shonqunta chukruyäsirqan. Saymi soldädunkunawan atacamaptinsi Tayta Dios yanapämarqansi vinciykur kananyaqpis makinsicho sararänansipaq.

31<<Saymi Tayta Dios nimarqan: <Kananpitaqa Sehónta nacionnintinta ushakäsiyänaykipaqmi makikiman churaykämü. Nacionninman yaykuyashpayki posisionnikikuna kananpaq sarikuyay>.

32<<Nacionninpa päsamunansita mana munarmi soldädunkunawan Sehón shamurqan Jahazacho noqansiwan pelyananpaq. 33Sayno kaptinpis Sehónta, surinkunata y soldädunkunatapis makinsimanmi Tayta Diosninsi churamurqan lapanta ushakäsinansipaq. 34Saymi lapan markankunaman yaykur runatapis, warmitapis y wamratapis lapanta ushakäsirqansi. Kawaykaqtaqa manami juklaylatapis kacharqansisu. 35Uywankunatapis y imaykankunatapis väliq kaqlatami apakamurqansi. 36Arnón mayu nawpancho kaykaq Aroer markapita y mas uraqancho kaykaq markapita qalaykur Galaad partiyaq manami mayqan markacho taqkunapis ichipämarqansisu. Tayta Diosninsi poderninwan yanapämashqami lapanta ushakäsirqansi. 37Amonita runakuna täyashqanmanmi isanqa yaykurqansisu. Saymi Jaboc mayuta simparqansisu y jalqakunacho kaq markakunamanpis yaykurqansisu. Maymanpis mana yaykunansipaq Tayta Diosninsi nimashqansimanqa manami yaykurqansisu.

Currently Selected:

Deuteronomio 2: qvhB

Highlight

Copy

Compare