Deuteronomio 29

Israel runakunawan Moabcho pactuta Tayta Dios yapay rurashqan

1 1 (28.69) Moisés sayno niptinmi Horeb jirkacho pactuta rurashqannöla Israel runakunawan Tayta Dios Moab nacionchöpis pactuta rurarqan.

2 2 (1) Saymi lapan Israel runakunata qayaykasir Moisés nirqan: <<Egiptulachöraq kaykar rikayarqaykimi Faraónta, mandäsiqninkunata y Egipto runakunata Tayta Dios castigashqanta. 3 3 (2) Kikikikunami rikayarqayki milagrukunata, señalkunata y espantaypaq kaqkunata rurashqanta. 4 4 (3) Sayno kaptinpis Tayta Dios upatakäsiyäshuptikimi kananyaq tantiyakuyankiraqsu. Rikaykarpis mana rikaqnömi kaykäyanki y wiyaykarpis mana wiyaqnömi kaykäyanki.#Rom. 11.8.

5 5 (4) <<Chusku chunka (40) watami sunyaq jirkapa qamkunata pushamushkä. Say watakunacho manami mayqansipapis mödanansikuna ni lanqinsikunapis ushakarqansu. 6 6 (5) Mikunansipaq tanta mana kaptinpis upunansipaq vïnu ni aswa mana kaptinpis Tayta Dios maná nishqan mikuytami kamaripämarqansi. Sayno rurarqan Tayta Diosninsi kashqanta tantiyakur payta cäsukunansipaqmi.

7 7 (6) <<Kayman chaykamushnami soldädunkunawan atacamänansipaq shayämurqan Hesbón markacho taq rey Sehón#Núm. 21.21-30. y Basán nacionpa mandaqnin rey Og.#Núm. 21.31-35. Jina kaqtami paykunata ushakäsirqansi. 8 8 (7) Nacionninta qechurkurnami aypurqansi Rubén trïbu runakunata, Gad trïbu runakunata y pulan Manasés trïbu runakunatapis.#Núm. 32.33. 9 9 (8) Sayno kaykaptinqa Tayta Dios pactu rurashqanta mana qonqaypa cumpliyanki. Cumpliyaptikiqa ima rurayashqaykipis alimi yarqapäyäshunki.

10 10 (9) <<Cada trïbupa mandaqninkuna karpis, mayor runakuna karpis, autoridäkuna karpis o común runakuna karpis lapaykimi Tayta Diosninsipa nawpancho kaykäyanki. 11 11 (10) Saynölami surikikunapis y warmikikunapis kaycho kaykäyan. Yantayki y yakuyki apamuq ashmayniki jäpa runakunapis kaychömi kaykäyan. 12 12 (11) Lapaykimi kaycho kaykäyanki Tayta Dios rurashqan pactuta chaskiyänaykipaq. Imayyaqpis cumplinanpaq jurarmi say pactuta Tayta Dios kanan junaq noqansiwan ruraykan. 13 13 (12) Saynöpami unay ayllunsikunata Tayta Dios promitishqannöla kuyashqan runakuna kaykäyanki. Saynöpis qamkunapa Diosniki kikin Tayta Diosmi kaykan. 14-15 14-15 (13-14) Tayta Diosninsipa nawpancho kaykar paywan rurayashqayki pactuqa manami qamkunalapaqsu, saypa trukanqa surikikunapaq, wilkaykikunapaq y paykunapita miraqkunapaqwanmi kaykan.

16 16 (15) <<Qamkuna musyaykäyankimi Egiptucho imano kawashqansitapis. Saynöpis musyaykäyankimi kayman chämushqansiyaq aska nacionkunata imano päsamushqansitapis. 17 17 (16) Saynöpis rikayashkankimi qerupita, rumipita, qellaypita y qoripita rurash ïdulukunata say nación runakuna adorayashqanta. 18 18 (17) Sayno kaptinqa qamkunacho manami olqupis ni warmipis ni mayqan ayllupis ni mayqan trïbupis Tayta Diosninsita qonqaykur ïdulukunata adoranmansu. Ïdulukunata adoraqkuna kayaptinqa venënuyuq iwjiq jachanömi qamkunacho kayanqa.#Heb. 12.15.

19 19 (18) <<Kay pactuta rurar ama yarpäyaysu mana cumpliyaptikipis Tayta Dios mana castigayäshunaykipaq kashqanta. Mana cumpliyaptikiqa Tayta Dios lapaykitami ushakäsiyäshunki. 20 20 (19) Tayta Dios manami perdonayäshunkisu, saypa trukanqa fiyupa rabyashpanmi qamkunapita miraqkunapis ushakäyashqanyaq kay librucho qelqaraykaq lapan maldicionkunawan castigayäshunki. 21 21 (20) Lapan Israel trïbukunapita rakiyäshuptiki imayka desgraciami päsayäshunki. Lapanpis say maldicionkuna päsayäshunki kay pactu librucho nishqannölami.

22 22 (21) <<Täyashqayki nacionchöpis desgraciakunawan y qeshyakunawan Tayta Dios castigashushqaykitami qepa yuriq Israel runakunawan karu nacionpita shamuq jäpa runakunapis rikayanqa. 23 23 (22) Saymi pasaypa mansakäyashpan niyanqa: <¡Say chakrakunacho kachiwan azufrilami mashtaraykan! Manami imapis saycho wayunqasu ni qewalapis winamunqasu. Sodomata, Gomorrata, Admata y Zeboimta Tayta Dios castigar ushakäsiptin imapis mana quëdashqannömi saycho imapis quëdanqasu>.

24 24 (23) <<Lapan nación runakunami niyanqa: <¿Imanirraq kay nacionta sayno Tayta Dios castigaykush? ¿Imanirraq fiyupa rabyakush?> 25 25 (24) Niptinmi niyanqa: <Unay ayllunkuna yärakuyashqan Tayta Diosmi sayno castigash paykunawan pactu rurashqanta mana cumpliyashqanpita. Say pactuta rurarqan Egiptupita jorqamurmi. 26 26 (25) Say runakunaqa Tayta Diosta adorayänanpa trukanmi mana reqiyashqan y imachöpis mana yanapäkuq dioskunata adorayash. 27 27 (26) Saymi Tayta Diosta rabyanäsiyaptin kay librucho qelqaraykaq lapan maldicionkunawan say runakunata castigash. 28 28 (27) Nirkurmi rikashqansinöpis fiyupa rabyashpan juklä nacionkunaman qarqush>.

29 29 (28) <<Manami lapan yarpashqankunatasu Tayta Diosninsi musyasimansi. Leyninkunata y mandamientunkunatami isanqa musyasimashkansi kikinsipis surinsikunapis imayyaqpis cumplinansipaq>>.

Currently Selected:

Deuteronomio 29: qvhB

Highlight

Copy

Compare