Deuteronomio 28

Wiyakuqkuna bendicionta chaskiyänanpaq nishqan

Levítico 26.3-13; Deuteronomio 7.12-24

1<<Kanan junaq tantiyaykäsishqä mandamientukunata cumplir Tayta Diosta wiyakuyaptikiqa maysay nacioncho taq runakunata yanapashqanpitapis masmi yanapäyäshunki. 2Saynöpis niyäshushqaykita wiyakuyaptikiqa Tayta Dios bendicionninta imaypis qamkunaman churamunqami.#Deut. 11.13-17.

3<<Markacho kayaptikipis o chakracho kayaptikipis bendicionninta churamunqami.

4Surikikunamanpis mikuynikimanpis bendicionninta churamunqami.

Wäkaykikunamanpis, uyshaykikunamanpis, cabraykikunamanpis y wakin uywaykikunamanpis bendicionninta churamunqami.

5Canastaykikunapis sukuy sukuy kananpaq y artësaykikunapis püsay püsay kananpaqmi bendicionninta churamunqa.

6Wayikicho kayaptikipis o maypa aywayaptikipis bendicionninta churamunqami.

7<<Contraykikunata vinciyänaykipaqpis Tayta Diosmi yanapäyäshunki. Saymi atacayäshunaykipaq juk nänipa shamurpis qanchis nänipa mashtakaypa mashtakar qeshpikuyanqa.

8<<Qoyäshunaykipaq kaykaq nacionman chäyaptiki pirwaykikunamanpis y lapan aruyashqaykimanpis Tayta Diosmi bendicionninta churamunqa.

9<<Mandamientunkunata cumplir pay munashqanno kawarqa promitiyäshushqaykinölami Tayta Dios kuyashqan santu runakuna imaypis kayanki. 10Pay kuyashqan runakuna kayashqaykita musyarmi maysay nacioncho taq runakunapis mansayäshunki.

11<<Unay ayllunsikunata promitishqan nacionman chäyaptiki Tayta Diosmi bendicionninta churamunqa imaykaykikuna aska kayänanpaq, surikikuna askaq kayänanpaq, chakraykikuna ali wayunanpaq y uywaykikunapis askaman mirayänanpaq. 12Mikuynikikuna ali wayunanpaqmi tiempulancho tamyasimunqa. Lapan aruyashqaykikunamanpis bendicionnintami churamunqa. Saynöpami juklä nacionpita imatapis prestakayämunkinasu, saypa trukanqa paykunata prestayänaykipaqpis kanqanami.

13<<Kanan junaq tantiyasishqä mandamientunkunata chaskikur cumpliyaptikiqa wakin runakunata yanapashqanpita masmi Tayta Dios qamkunata yanapäyäshunki. 14Kanan junaq wilapashqä mandamientukunata mana qonqaypa cumpliyashpayki juk dioskunata ama adorayankisu ni respitayankisu.

Mana cäsukuqkuna maldicionash kayänanpaq nishqan

Levítico 26.14-46

15<<Tayta Diosta mana cäsukur kanan junaq wilapashqä mandamientunkunata y estatütunkunata mana cumpliyaptikiqa maldicionmi chäyäshunki.

16<<Wayikicho kayaptikipis chakracho kayaptikipis maldicionmi chäyäshunki.

17Canastaykikunapis y artësaykikunapis wayrala tumaykaq kananpaqmi maldición chanqa.

18Surikikunapis, muruyashqaykikunapis, wäkaykikunapis, uyshaykikunapis cabraykikunapis maldicionwanmi ushakanqa.

19Wayikicho kayaptikipis o maypa aywayaptikipis maldicionmi chäyäshunki.

20<<Tayta Dios maldicionayäshuptikimi ima rurayashqaykikunapis kamakanqasu ni rurakanqasu. Payta mana cäsukur lutankunata rurayashqaykipitami manapis aykälata lapayki ushakäyanki. 21Nacionnikiman yaykur posisionta chaskiyaptikipis tukuy niraq qeshyakunawanmi Tayta Dios ushakäsiyäshunki. 22Saymi fiyu qeshyawan, fiebriwan, qeri qeshyawan, aläpa usyawan, fiyupa shanaywan y guërrawan ushakäsiyäshunkipaq. Lapan murupakuyashqaykimanpis tukuy niraq qeshyakunatami kachamunqa. 23Tamyapis manami tamyamunqasu. Chakrachöpis manami mikuy wayunqanasu. 24Lapayki ushakäyashqaykiyaqmi tamyasimunanpa trukan Tayta Dios polvutawan arënalata ciëlupita shikwasimunqa.

25<<Contraykikuna vinciyäshunaykipaqpis Tayta Diosmi kamakäsinqa. Saymi atacayänaykipaq juk nänipa aywarpis qanchis nänipa mashtakaypa mashtakar qeshpikuyanki. Lapan nación runakunapitapis kuyapaypaqmi kayanki. 26Pipis wajakunanpaq mana kaptinmi ayaykikunatapis wiskurkuna y munti uywakuna mikur ushayanqa.

27<<Egipto runakunata castigashqannömi Tayta Dios castigayäshunki tukuy niraq qeriwan, chupuwan, qarachuwan y sheqshipäkuywan. Say qeshya sariyäshuptiki manami aliyäyankisu. 28Tayta Dios castigayäshuptikimi wakinniki löcuyäyanki, wakinniki qaprayäyanki y wakinniki pasaypa mansakur ima ruraytapis kamäpakuyankisu. 29Qaprayash karmi junaqpapis sakaypano lamkaykachar puriyanki. Ima rurayashqaykipis manakaqlapaqmi kanqa. Waran waranmi yana ashnuntano arusiyäshunki. Pipis favorniki mana sharkuptinmi suwakuna imaykitapis apakuyanqa.

30<<Majasakäyänaykipaq jipashwan parlakushna kaykaptikipis jukmi warminpaq apakunqa. Wayita sharkasirpis manami täyankisu. Üvata plantarpis wayuyninta manami mikuyankisu. 31Töruykita qechuyäshushpayki nawpaykicho pishtarpis manami yawasiyäshunkisu. Ashnuykita apakurpis manami kutisiyäshunkisu. Uyshaykita y cabraykita apakuyaptinpis manami pipis qechüsiyäshunkisu.

32<<Juk nacionpita shamurmi olqutapis warmitapis surikikunata apakuyanqa. Waran waran surikikunapaq fiyupa lakikurpis manami rikayankinasu. 33Mana reqiyashqayki jäpa runakuna shamur chakraykikuna wayushqanta apakuyaptin manakaqlapaqmi aruyashqaykipis kanqa. Waran waran mana kuyapaypa arusiyäshuptiki pasaypami nakayankipis. 34Lapan say päsayäshushqaykikunata rikarmi löcutäyanki. 35Tayta Diosmi qonqurnikikunachöpis chankaykikunachöpis qeriwan qeshyasiyäshunki. Saynölami qeri ushayäshunki chaki puntaykikunapita uma jirkaykikunayaq. Say qerita imawan jampirpis manami aliyäyankisu.

36<<Nacionnikipita Tayta Dios qarquyäshuptikimi qamkunatapis y mandaqniki reytapis karu nacionman prësu apayäshunki. Say nacionta manami qamkunapis ni unay ayllunsikunapis reqiyarqansu. Saychömi qerupita y rumipita rurash ïdulukunalata adorayanki.#Deut. 4.27-28; 2Rey. 17.4-6; 25.8-12. 37Sayno desgracia päsayäshuptikimi say karu markakunacho taq runakuna mansakash rikakuyanqa. Lapanpis asipäyäshushpaykimi manakaqman churayäshunki.

38<<Askata mururpis chukluskuna ushakurkuyaptin walkalatami shuntayanki. 39Üvata plantaykur shumaq uryarpis kurukuna ushakurkuyaptin manami imatapis cosechayankisu ni vïnuntapis upuyankipaqsu. 40Täyashqaykicho olïvu jachakuna saysika kaptinpis aceitünas marpuykar ushakaptin manami lushikuyänaykipaq aceitinpis kanqasu. 41Olqutapis warmitapis surikikunata karu markakunapa apakuyaptin manami mayqanpis nawpaykikunacho kanqasu. 42Plantayashqayki jachakunata y muruyashqayki mikuykunatapis chukluskunami lapanta ushakurkuyanqa.

43<<Markaykicho taq jäpa runakuna munayyuq rïcuyäyaptinmi qamkunaqa munayniynaq rikakuyanki. 44Say jäpa runakuna prestayäshunaykipaq kaptinpis qamkunapaqa manami paykunata prestayänaykipaq imaykikunapis kanqasu. Paykunami respitash runakuna kayanqa. Qamkunataqa manami pipis respitayäshunkisu.

45<<Tayta Dios nishqankunata mana wiyakur wilapashqä mandamientunkunata y estatütunkunata mana cäsukurmi lapan say desgraciakunawan chipyaq ushakäyanki. 46Sayta rikarmi pïmaypis tantiyakuyanqa qamkunaman y surikikunamanpis maldición imaypis chämushqanta. 47Sayno päsayäshunki Tayta Dios yanapaykäyäshuptikipis lapan shonquykikunawan kushi kushi payta mana sirviyaptikimi. 48Saymi contraykikunata Tayta Dios kachamuptin ashmaynöna paykunata sirviyanki. Lapan imaykikunatapis ushakäpakur pasaypa muchuq rikakuyaptikimi mikuyänaykipaqpis ni upuyänaykipaqpis ni jatikuyänaykipaqpis kanqasu. Sayno nakayanki ushakäyashqaykiyaqmi.

49<<Tayta Dios karu nacionpita kachamuptinmi soldädukuna ankanöraq elaqpita shamur ushakäsiyäshunki. Say runakuna parlayashqantapis manami tantiyayankisu. 50Paykuna yaqa runakuna kayashpan manami awkinkunatapis respitayanqasu ni wamrakunatapis kuyapäyanqasu. 51Say soldädukunaqa uywaykikunatapis mikuynikikunatapis chipyaqmi apakuyanqa. Lapanta apakur manami kachapäyäshunkisu trïgutapis, vïnutapis, aceititapis, ni ima uywaykipa wawankunalatapis. Lapanta ushayaptinmi pasaypa mikanaylawan wanuyanki.

52<<Tayta Dios qoyäshushqayki markaykikunatapis altuyaq murallash kaykaqtami say soldädukuna chipyaq juchusiyanqa. Say altu murallash markakuna sapäyäshunaykipaq kashqanta yarpäyaptikipis lapantami ushakäsiyanqa. 53Markaykikunacho soldädukuna jiruruypa saparäyäshuptikimi pasaypa muchuyanki. Saymi wanunayparaq mikanar surikikunata olqutapis warmitapis mikuyanki. 54Lapanpita mas kuyakuq runapis wawqinta ni warminta ni kawaykar quëdaq surinkunatapis mananami kuyapanqanasu. 55Saymi wanuq surinkunapa aysanta kikilan mikukurkunqa. Sayno kanqa contraykikuna lapan markaykikunata tumaypa saparäyaptin imapis mikuyänaykipaq mana kaptinmi. 56Lapanpitapis seqaypa kuyakuq warmipis runanta y wawankunata mananami kuyapanqanasu. 57Saymi wachashqan wawantapis pärishnintapis pakaylapa mikukurkunqa.#2Rey. 6.28-29; Lam. 4.10. Sayno kanqa contraykikuna markaykikunata tumaypa saparäyaptin imapis mikuyänaykipaq mana kaptinmi.

58<<Lapanpaq munayyuq Tayta Diosta mana mansapakur kay librucho qelqaraykaq mandamientukunata mana wiyakuyaptikiqa 59mansariypaq castïgukunawan y mana aliyaq qeshyakunawanmi qamkunatapis surikikunatapis nakasiyäshunki. 60Egipto runakunata mansariypaq castigashqannömi qamkunatapis castigayäshunki. 61Ushakäyänaykipaqmi kay librucho mana qelqaraq qeshyakunatapis castïgukunatapis yurisimunqa. 62Jana pasacho qoyllarkunanöraq saysika kaykarpis Tayta Diosta mana wiyakuyashqaykipitami walkaqlana rikakuyankipaq.

63<<Qamkuna ali kawayänaykipaq y askaman mirayänaykipaq yanapäyäshushpayki Tayta Dios kushikushqannölami mana cäsukuyashqaykipita ushakäsiyäshushpaykipis Tayta Dios kushikunqa. Mana munaykaqtami täyashqayki nacionpitapis qarquyäshunki 64maysay nacionkunaman mashtakäyänaykipaq. Say nacionkunachömi qerupita y rumipita rurash ïdulukunata adorayanki. Say ïdulukunata manami qamkunapis ni unay ayllunsikunapis reqiyarqansu. 65Say nacionkunacho täyaptikipis Tayta Dios manami jamayänaykipaqpis kachapäyäshunkisu. Saymi fiyupa lakikur, mansakur y waqalar täyanki.

66<<Ima desgraciapitapis manami librisu kayanki. Imapis cadala päsayäshuptikimi sakaypa junaqpapis mansa mansala kawayanki. 67Pasaypa mansakurmi pasa wararkuptinpis niyanki <¿imay höraraq sakaykunqa?> Pasa sakaptinnami niyanki <¿imay höraraq pasa waraykunqa?> 68Egiptupa imaypis mana kutiyänaykipaq Tayta Dios nish kaykaptinpis büquikunawanmi kutisiyäshunki. Chikiyäshuqnikikunaman chaykasiyäshushpayki ashmay kayänaykipaq rantikuyäshuptikipis manami pipis rantiyäshunkisu>>.

Currently Selected:

Deuteronomio 28: qvhB

Highlight

Copy

Compare