Deuteronomio 27

Ebal jirkacho wankakunata ichiykasir altarta perqayänanpaq nishqan

1Saymi lapan runakunata Moiséswan Israel mayor runakuna niyarqan: <<Kanan wilapashqä mandamientukunata lapanta cumpliyay. 2Jordán mayuta simpar Tayta Dios qoyäshunaykipaq kaykaq nacionman chäyashpayki jatusaq wanka rumikunata jawiykur iskuwan pintayanki. 3Say wankakunaman qelqayanki tantiyasishqä lapan leykunata. Sayno qelqayanki unay ayllunsikunata Tayta Dios promitishqan nacionman yaykuyashpayki. Saychöqa lichipis abëjapa mishkinpis yakunöraqmi aska kaykan. 4Say wankakunataqa Jordán mayuta simpaykur Ebal jirkaman jawiyanki. Kanan junaq nishqänöla say wankakunata iskuwan pintayanki.

5<<Nirkurnami Tayta Diospaq altarta saycho perqayanki. Say altarta perqayänaykipaqqa ama ima fiërruwanpis rumikunata laqlayankisu, saypa trukanqa laqläni rumikunalawan perqayanki.#Éxo. 20.25. 6Laqläni rumikunawan altarta perqarkurmi rupasina sacrificiuta Tayta Diospaq saycho rupasiyanki. 7Saynöpis say altarcho jawka kawakuy sacrificiuta rupasir lapayki Tayta Diospa nawpancho kushish mikuyanki. 8Say wankakunaman lapan nishqä leykunata shumaq qelqayanki>>.#Jos. 8.30-32.

9Saypitanami levita cürakunawan Moisés Israel mayinkunata niyarqan: <<Israel runakuna, shumaq wiyayämay. Kanan junaqpitaqa Tayta Dios akrashqan runakunami kaykäyanki. 10Sayno kaykarqa Tayta Diosta cäsukur kanan tantiyasiyashqä lapan mandamientunkunata y estatütunkunata cumpliyay>>.

Mana cäsukuq runakunapaq maldición imano kananpaqpis nishqan

11Say junaqmi Israel runakunata Moisés nirqan: 12<<Jordán mayuta simpaskiyaptikimi Simeón trïbu runakuna, Leví trïbu runakuna, Judá trïbu runakuna, Isacar trïbu runakuna, José trïbu runakuna y Benjamín trïbu runakuna Gerizim jirkaman wisäyanqa. Saypitami niyämunqa Israel runakuna Tayta Diosta cäsukur bendicionta chaskiyänanpaq kashqanta.#Deut. 11.29; Jos. 8.33-35.

13<<Ebal jirkamannami wisäyanqa Rubén trïbu runakuna, Gad trïbu runakuna, Aser trïbu runakuna, Zabulón trïbu runakuna, Dan trïbu runakuna y Neftalí trïbu runakuna. Paykunami saypita niyämunqa Israel runakuna Tayta Diosta mana cäsukur maldicionta chaskiyänanpaq kashqanta.

14<<Levitakunanami lapan Israel runakuna wiyayänanpaq fuertipa niyämunqa: 15<Pipis fiërruta sulusiypa o qeruta laqlaypa ïduluta ruraykur pakaylapapis adoraq kaqqa maldicionashqami kanqa.#Éxo. 20.4; 34.17; Lev. 19.4; 26.1; Deut. 4.15-18; 5.8. Sayno ruraqkunaqa Tayta Diostami rabyanäsin>. Saymi lapan runakuna niyanqa: <¡Niyashqaykino kasun!>

16<< <Pipis mamanta o taytanta mana respitaq kaqqa maldicionashqami kanqa>.#Éxo. 20.12; Deut. 5.16. Saymi lapan runakuna niyanqa: <¡Niyashqaykino kasun!>

17<< <Runa mayinpa chakranta qechuyta munar mujunninpaq jawiyashqan wankata witisiq kaqqa maldicionashqami kanqa>.#Deut. 19.14; Job 24.2; Prov. 22.28; Ose. 5.10. Saymi lapan runakuna niyanqa: <¡Niyashqaykino kasun!>

18<< <Nänipa qapra ali aywakuykaqta lutanpa pantakäsiq kaqqa maldicionashqami kanqa>.#Lev. 19.14. Saymi lapan runakuna niyanqa: <¡Niyashqaykino kasun!>

19<< <Jäpa runakunata, waksakunata y viüdakunata chikiq kaqqa maldicionashqami kanqa>.#Éxo. 22.21; 23.9; Lev. 19.33-34; Deut. 24.17-18. Saymi lapan runakuna niyanqa: <¡Niyashqaykino kasun!>

20<< <Pipis papäninta penqayman churar madrastanwan kakuq kaqqa maldicionashqami kanqa>.#Lev. 18.8; 20.11; Deut. 22.30. Saymi lapan runakuna niyanqa: <¡Niyashqaykino kasun!>

21<< <Ima uywawanpis kakuq kaqqa maldicionashqami kanqa>.#Éxo. 22.19; Lev. 18.23; 20.15. Saymi lapan runakuna niyanqa: <¡Niyashqaykino kasun!>

22<< <Mamalapita o taytalapita paninwan kakuq kaqqa maldicionashqami kanqa>.#Lev. 18.9; 20.17. Saymi lapan runakuna niyanqa: <¡Niyashqaykino kasun!>

23<< <Pipis suedranwan kakuq kaqqa maldicionashqami kanqa>.#Lev. 18.17; 20.14. Saymi lapan runakuna niyanqa: <¡Niyashqaykino kasun!>

24<< <Traicionpita runa mayinta wanusiq kaqqa maldicionashqami kanqa>.#Éxo. 20.13; 21.12-14. Saymi lapan runakuna niyanqa: <¡Niyashqaykino kasun!>

25<< <Wanusinanpaq päguta chaskipakur jusaynaq runata wanusiq kaqqa maldicionashqami kanqa>. Saymi lapan runakuna niyanqa: <¡Niyashqaykino kasun!>

26<< <Kay wilapäyashqä leykunata mana cumpliq kaqqa maldicionashqami kanqa>.#Jer. 11.3; Gál. 3.10. Saymi lapan runakuna niyanqa: <¡Niyashqaykino kasun!>

Currently Selected:

Deuteronomio 27: qvhB

Highlight

Copy

Compare