Deuteronomio 26

Primiciata apayänanpaq nishqan

1<<Tayta Dios qoykushunaykipaq kaykaq nacionman yaykur saycho täyashpayki 2muruyashqaykipita punta poquqta canastawan apayanki Tayta Diosta adorayänaykipaq akrashqan sitiuman. Sayqa primiciami kanqa.#Éxo. 23.19. 3Sayman chaykurmi saycho kaykaq cürata niyanki: <Unay ayllunsita promitishqanta cumplirmi kay nacionta Tayta Dios qomashkansi. Saymi kay primiciata apamushkä>. 4Sayno niyaptiki canastata cüra chaskiskirmi Tayta Diospa altarnin nawpanman churanqa.

5<<Churaykuptinnami Tayta Diospa nawpancho niyanki: <Unay ayllunsikunaqa kayläpa wakläpa purikuq arameo runakunami kayarqan. Sayno puriykäyashqanchömi Egiptuman aywakur askaman mirayarqan jatun nación rikakuyashqanyaq. 6Saychömi Egipto runakuna pasaypa nakasimashpansi maqa maqarkur fiyupa arusimarqansi. 7Saymi unay ayllunsikuna yärakuyashqan Tayta Diosta manakurqansi kuyapämänansipaq. Manakushqansita wiyarmi rikamarqansi fiyupa arushqansita y nakashqansitapis. 8Saymi Egipto runakunata mansariypaq castigashpan Tayta Dios munayninwan jorqamarqansi. 9Nirkurnami kay nacionman pushamarqansi aska lichipis abëjapa mishkinpis kashqanman. 10Saymi kananqa Tayta Dios kamaripämashqansi chakrakunapita primiciata apamushkä>.

<<Sayno nir canastata aptarkur altar nawpanman yapay churaykuyanki. Nirkurna Tayta Diospa puntanman qonqurpakuyanki. 11Saypitana qamtapis aylluykikunatapis Tayta Dios yanapäyäshushqaykipita kushikur fiestata rurayanki. Fiestata rurayashpayki markaykicho taq levitakunata y jäpa runakunatapis qayasiyanki.

Diezmuta apayänanpaq nishqan

12<<Cada kimsa watacho lapan muruyashqaykipita diezmuta aypuyanki markaykicho taq levitakunata, jäpa runakunata, waksakunata y viüdakunata. Saynöpami markaykicho pipis muchunqasu.#Deut. 14.28-29. 13Paykunata aypuskir Tayta Diosta manakur niyanki:

<< <Nimashqaykinölami wayïpita apaykur levitakunata, jäpa runakunata, waksakunata y viüdakunata rakipänäpaq kaqtaqa aypushkä. Imatapis mana qonqaypami lapan nishqaykikunata cumplishkä. 14Wanupakurpis impüru karpis say rakishqä diezmutaqa manami mikushkäsu. Wanushkunapaqpis saykunataqa manami täsikushkäsu. Nimashqaykitaqa lapantami rurashkä, Tayta Dios. 15Kananqa jana pasacho kaq templuykipita pasa lapan Israel runakunaman y qoyämashqayki nacionmanpis bendicionnikita churaykalämuy. Unay ayllükunata promitishqaykinölami yakunöraq aska lichipis abëjapa mishkinpis kashqan nacionta kamaripäyämashkanki>.

Israel runakuna Tayta Diosta imaypis cäsukuyänanpaq yäsishqan

16<<Kanan junaqmi estatütunkunata y leyninkunata cumpliyänaykipaq Tayta Dios niyäshunki. Sayno kaykaptinqa lapan shonquykikunawan y voluntänikikunawan cumpliyay. 17Kananmi niyashkanki Tayta Diosman yärakur y pay munashqanno kawar estatütunkunata, mandamientunkunata y leyninkunata imaypis cumpliyänaykipaq kashqanta. 18Tayta Dios promitiyäshushqaykinölami kuyashqan runakuna kayashqaykita kanan junaq niyäshushkanki.#Éxo. 19.5; Deut. 7.6; 14.2; Tito 2.14; 1Ped. 2.9. Sayno kaykaptinqa lapan mandamientunkunata cumpliyay. 19Lapan mandamientunta cumpliyaptikiqa Tayta Diosmi yanapäyäshunki lapan nacionkunapitapis mas respitash y reqish kayänaykipaq. Saynöpis promitishqannölami kuyashqan sagrädu nación kayanki>>.

Currently Selected:

Deuteronomio 26: qvhB

Highlight

Copy

Compare