Deuteronomio 22

1<<Marka mayikipa wäkan o uyshan o cabran pantakash puriykaqta rikar pipa kashqantapis musyarqa ämunman qatipaykuyanki. 2Say uywa pipa kashqantapis mana musyarqa ämun ashishqanyaq misiykäyanki. Ämun chämuptinqa <katay uywayki> niyanki. 3Saynöla runa mayikipa ashnunta, mödananta o ima oqrashqantapis tarir ämunta entregaykuyanki.

4<<Runa mayikipa ashnunta o wäkanta nänicho kuchpakash kaykaqta tarirqa kachariykur ama aywakuyankisu, saypa trukanqa sharkasinanpaq yanapanki.#Éxo. 23.4-5.

5<<Olqupa mödananta warmikuna ama jatikuyanqasu. Olqukunapis warmipa mödanantaqa ama jatikuyanqasu. Sayno rurarqa Tayta Diostami rabyanäsiyan.

6<<Puriykäyashqaykicho pishqupa qeshunta jachachöpis o pampachöpis tarirqa runtularaq kaptinpis ni pushapalaraq kaptinpis mamantintaqa ama apakuyankisu. 7Saypa trukanqa mamanta qarquskir wawalanta apakuyanki. Sayno rurayashpaykiqa aska wata alimi kawayanki.

8<<Mushuq wayita sharkasirqa janancho taksha murällata tumaypa sharkasiyanki.#22.8 Israel nacioncho say wisan wayita qatananpa trukanqa terrädu jananman saqlarkurmi mituwan tortarkuyaq. Say jananchönami warmikuna y runakuna awakuyaq, aqakuyaq y trïgutapis akrayaq. Sayno rurash kaykaptinpis wayikikuna jananpita pipis wanuqpaq jeqaptin manami jusayuqsu kayanki.

9<<Üva rurinman ima mikuytapis ama muruyankisu. Sayno mururqa say chakrapita lapan cosechayashqaykitapis Tayta Diospaq apayanki.

10<<Törutawan ashnuta yüguykur ama arusiyankisu.

11<<Milwapita y lïnupita awash mödanatapis ama jatikuyankisu.#22.11 Lïnupita y milwapita awash tëlaqa Tinkuna Tolduta qatananpaq y cürakuna jatikuyänalanpaqmi karqan. Saypita masta musyanaykipaq liyinki Éxo. 26.1, 31, 36; 28.5; Lev. 19.19.

12<<Jatiräyashqayki tünicaykikunapa chuskun kuchunman jïlukunata tanayanki.#Núm. 15.37-41.

Majasakashqanyaq jipashkuna virginla kayänanpaq nishqan

13<<Pï runapis jipashwan majasakaykur payta ajayashpan: 14<Manami kay jipashta virgintasu tarishkä> nir jitapaptinqa 15jipash majasakashqan sakay punuyashqan säbanasta mamanwan taytan apayanqa marka yaykunacho shuntakaq mayor runakuna rikayänanpaq. 16Rikasirmi jipashpa taytan ninqa: <Kay runatami surïta entregashkä warmin kananpaq. Kananqa surïta ajayäkurishnami. 17Saymi lulakushpan parlar nikan: <<Surikita manami virgintasu tarishkä>>. Sayno niptinpis kay säbanasta rikaykuyay surï rasunpaypa virgen kashqanta o mana kashqantapis musyayänaykipaq>.

<<Sayno nirmi say jipash majasakar punushqan säbanasta yawarlatana mayor runakunata rikasinqa. 18Sayno rikasiptinmi jipashpa runanta prësu sariykur astayanqa. 19Nirkurnami Israel jipashta mala fämaman churashqanpita honorninta pachak (100) yuraq qellayta pägasiyanqa. Say qellayta jipashpa papäninta entregaykur mana rakikaypami jipashwan wanushqanyaq tanqa.

20<<Isanqa runa nishqanno say jipash manaraq majasakar juk runawan punushna kaptinqa 21taytanpa wayi punkunman jorquykurmi samqaypa wanusiyanqa. Sayno wanusiyanqa Israel nacioncho lutanta rurashqanpita y manaraq majasakar jukwan punushpan taytanta penqayman churashqanpitami. Saynöpami mana ali ruraykuna qamkunacho kanqasu.#1Cor. 5.13.

22<<Pï runatapis runayuq warmiwan adulteriucho kaykaqta tarirqa ishkanta wanusiyanki. Saynöpami mana ali ruraykuna Israel nacioncho kanqasu.

23<<Mayqan jipashpis virgen kaykar runawan majasakänanpaq parlakush kaykaptin juk runa markacho saripakuptinqa 24ishkantami marka yaykuna punkuman apayanki. Saychöna samqaypa wanusiyanki.#Lev. 20.10; Juan 8.5. Say jipashta wanusiyanki markacho kaykar ausiliuta mana manakushqanpita. Say runatana wanusiyanki parlakushna kaykaptin saripakushqanpita. Saynöpami mana ali ruraykuna qamkunacho kanqasu.#1Cor. 5.13.

25<<Maqtawan majasakänanpaq parlakushna kaykaptin jäkuqcho tinkur saripakuptinqa say runalatami wanusiyanki. 26Jipashtaqa ama wanusiyankisu. Payqa manami jusayuqsu kanqa wanusish kananpaq. Say runa jipashta elaqpita saripakushqanqa juk runata wanusiq japuymi kanqa. 27Jipashta jäkuqcho saripakuptin qaparaptinpis manami pipis wiyanmansu.

28<<Piwanpis tänanpaq manaraq parlakush kaykaq jipashta juk runa saripakushqan musyakaptinqa 29jipashpa papänintami say runa päganqa pisqa chunka (50) yuraq qellayta. Saynöpis desonrashqanpitami say jipashta warminpaqna jorqur mana rakikaypa wanushqanyaq tanqa.#Éxo. 22.16-17.

30 30 (23.1) <<Pipis madrastanwan manami kakunmansu. Madrastanwan kakurqa papänintami manakaqman churaykan.#Lev. 18.8; 20.11; Deut. 27.20.

Currently Selected:

Deuteronomio 22: qvhB

Highlight

Copy

Compare