Deuteronomio 21

Pï wanusishqantapis mana musyar imano rurayänanpaqpis nishqan

1<<Tayta Dios qoyäshunaykipaq kaykaq nacioncho taykäyashpayki maychöpis runapa ayanta tarir y pï wanusishqantapis mana musyarqa 2mayor runakunata y juezkunata wilayanki rikaq aywayänanpaq. Paykuna aywarmi aya jitaraykashqanpita mayqan marka mas cerca kashqantapis tantiyayanqa. 3Nirkurmi cercan markacho taq mayor runakunata wilayanqa manaraq yapyaq ternërata akraykur 4yakuyuq purun chakraman apayänanpaq. Say chakrachömi ternërapa kunkanta pakiyanqa.

5<<Levita cürakunapis saymanmi aywayanqa. Paykunatami Tayta Dios akrash payta sirviyänanpaq y jutincho runakunata bendicionta qoyänanpaq. Saynöpis paykunami kaykäyan runakuna rimanakuyaptin o imapis kaptin arreglayänanpaq.

6<<Nirkurnami aya jitaraykaq cercan markacho taq mayor runakuna kunkan pakish ternërapa jananman kamaykur makinkunata maylakuyashpan 7niyanqa: <Noqakuna manami say runata wanusiyashkäsu. Saynöpis manami rikayashkäsu pï wanusishqantapis. 8Tayta Dios, runata kaycho wanusiyashqanpita Israel runakunata perdonaykulay. Egiptupita jorqayämashqayki runakuna kaykäyaptïqa say runa wanushqanpita ama tumpaykayälämaysu>. Sayno ruwakuyaptinqa saycho taq runakunata Tayta Dios manami castiganqasu. 9Tayta Dios munashqanno rurayashpaykiqa runa saycho wanushqanpita manami jusayuqsu kayanki.

Guërrapita prësu apayämushqan warmipaq nishqan

10<<Aybësis cäsu kanmanmi contrayki runakunawan guërrata rurayaptiki Tayta Dios makikikunaman churamushqan prësukunacho 11kuyaylapaq warmita rikayashqayki. Warmikipaq munarqa 12wayikikunaman apayanki. Saychöna aqsanta qara putuypa rutusiyanki y shiluntapis rutusiyanki. 13Nirkur mödananta trukasiyanki. Saypita papäninpaqwan mamanpaq lakikur juk killa lüturkuptinraq say warmiwan majasakäyanki. 14Saypita say warmi mana gustayäshuptikiqa libri aywakunanpaq kachariykuyanki. Warmikina kash kaykaptinqa manami rantikuyankimansu ni ashmaynikipaqpis quëdasikuyankimansu.

Qechpa surinpa derëchun kananpaq nishqan

15<<Pï runapis ishkay warmiyuq kar mana kuyashqan warmicho qechpa surin kaptinqa 16say kaq surintami qechpa kay derëchunta qoykunqa. Kuyashqan kaq warmipa wawan qechpa mana kaptinqa manami qechpa wawqinpa derëchunta qoykunqasu. 17Sayno mana kananpaqmi mana kuyashqan warmipa wawan kaptinpis qechpa kay derëchunta payta qoykunqa. Say derëchunta chaskirqa wakin wawqinkuna chaskiyashqanpita ishkay kuti mastami chaskinqa.

Mana cäsukuq surinta wanusiyänanpaq nishqan

18<<Pipapis surin mana cäsukuq, mana wiyakuq, yäsiptinpis mana chaskikuq y astaptinpis mana wanakuptinqa#21.18 Wakin runakunaqa wiyakuptinqa niyan. 19taytanwan maman apayanqa marka yaykunacho shuntakaq mayor runakunaman. 20Chaykasirnami mayor runakunata niyanqa: <Kay surï manami wiyakayämansu ni cäsukayämansu. Saynöpis lutan ruraykunaman y upyalaman churakashqami kakun>. 21Sayno niyaptinmi markacho taq lapan runakuna shuntakar samqaypa say maqtata wanusiyanqa. Israel nacioncho say niraq runakunata sayno elaqäsiyashqaykita musyarmi lutankunata pipis ruranqanasu.

Wakin leykuna imano kashqanpis

22<<Pitapis jusalikushqanpita autoridäkuna wanuykasir qeruman warkasiyashlancho 23ama waräsiyäsunsu. Runapa ayan qerucho warkaraptin maldicionashqami kanqa.#Gál. 3.13. Sayno kaptin wanushqan junaq jukla pampayanki. Warkaraykaqta waräsirqa Tayta Dios qoyäshunaykipaq kaykaq naciontami impüruyäsiyanki.

Currently Selected:

Deuteronomio 21: qvhB

Highlight

Copy

Compare