Deuteronomio 20

Guërrata imano rurayänanpaqpis nishqan

1<<Guërraman aywayaptiki contraykikunapa soldädunkuna, cawallunkuna y carrëtankuna aska kayaptinpis ama mansariyankisu. Egiptupita jorqamaqninsi Tayta Diosmi paykunata vinciyänaykipaq yanapäyäshunki. 2Pelyayta qalaykuyänaykipaqqa cürami lapan runakunata shakyäsir 3ninqa: <Israel runakuna, wiyayämay. Contrayki soldädukunawan kanan junaq pelyashpayki mana mansapaypa y mana desvaloraypa pelyayay. 4Qamkunawanmi Tayta Diosninsi kaykan. Contraykikunawan kikin pelyashpanmi salvayäshunki>.

5<<Sayno nir cüra shakyarkasiptinmi mandaq runakunapis niyanqa: <Mayqaykipis wayi rurayta sayraq ushash karqa saycho taq kutikuy. Guërracho wanuyaptiki imaptikiqa wayikicho jukmi tanqa. 6Mayqaykipis plantashqayki üvapa wayuyninta manaraq provicharqa wayikiman kutikuy. Guërracho wanuyaptiki imaptikiqa jukmi üvaykita provichanqa. 7Mayqaykipis majasakänaykipaq jipashwan parlakush karqa wayikiman kutikuy majasakar tänaykipaq. Guërracho wanuyaptiki imaptikiqa jukmi say jipashwan majasakanqa>.

8<<Saypitanami mandaq runakuna yapay niyanqa: <Mayqaykipis jaka shonqu karqa wakin kaqta mana mansarïsiyäsinaykipaq wayikikunapa mejor kutikuyay>. 9Mandaqkuna sayno parlayta ushaskirmi runakunapa puntanta guërraman aywayanqa.

10<<May markamanpis atacayänaykipaq chäyashpayki puntata paykunawan parlayanki mana pelyayänaykipaq. 11Nishqaykita chaskikuyashpan markanman yaykuyänaykipaq kachapäyäshuptikiqa paykunawan amana pelyayankisu. Saypa trukanqa paykunata churayanki faynacho imaypis arupäyäshunaykipaq. 12Qamkunata mana chaskipäyäshushpayki atacayäshunaykipaq yarqayämuptinqa say markata jiruruypa sapaykur jukla atacayanki. 13Qamkunapa makikikunaman say markata Tayta Dios churamuptinqa saycho taq olqu runakunata espädawan chipyaq wanusiyanki. 14Warmikunata, wamrakunata, uywakunata y imaykankunata isanqa kikikikunapaqna apakuyanki. Say runakunapa mikuynintapis Tayta Dios kamaripaykäyäshuptikiqa apakuyanki.

15<<Manami yaykuyänaykipaq nacioncho kaykaq markakunata sayno rurayänaykipaqsu nikä, sinöqa mas karucho kaykaq markakunapaqmi. 16Tayta Dios qoyäshunaykipaq kaykaq nacionman yaykurqa pitapis kawaykaqta ama kachaykuyankisu. 17Saypa trukanqa Tayta Dios niyäshushqaykinöla heteo runakunata, amorreo runakunata, cananeo runakunata, ferezeo runakunata, heveo runakunata y jebuseo runakunata lapanta ushakäsiyanki. 18Mana ushakäsiyaptikiqa diosninkunata adorar lutanta rurayänaykipaqmi inkitayäshunki. Sayno rurarqa Tayta Diosninsitami fiyupa rabyanäsiyanki.#Deut. 13.15-16; Jos. 6.17.

19<<May markatapis pelyayänaykipaq aska killa atacarqa wayuq jachakunata ama mutuyankisu. Say jachakunata mutuyaptikiqa wayuyninta mikuyänaykipaq manami kanqasu. Jinachöpis jachakunaqa manami runasu kaykan atacayäshunaykipaq. 20Mana wayuq jachakunatami isanqa mutuyankiman escalërakunata ruraykur markaman pelyaq yaykuyänaykipaq.

Currently Selected:

Deuteronomio 20: qvhB

Highlight

Copy

Compare