Deuteronomio 19

Amparakuyänanpaq markakunata akrayänanpaq tantiyasishqan

Números 35.9-28; Josué 20.1-9

1<<Qoyäshunaykipaq kaq nacioncho taq runakunata Tayta Dios ushakarkasiptin paykunapa markankunacho y wayinkunacho qamkunanami täyanki. 2Say nacioncho täyashpayki kimsa markakunata akrayanki.#Jos. 20.1-9. 3Say markakuna kanqa runa mayinta wanusiq runa qeshpir amparakunanpaqmi. Kimsa markakunata akrayänaykipaq Tayta Dios qoykuyäshunaykipaq kaykaq nacionnikita kimsaman rakiyanki. Nirkur cada particho juk markata akrayanki. Say markakunaman aywaraq nänikunatapis shumaq alsayanki.

4<<Contran mana kaykar wanusiq runa amparakuyänan markaman qeshpiptinmi venganzata ashirpis payta wanusinqasu. 5Sayno kaptinqa yantata mutuykaptin makinpita jächa yarqukar runata wanuykasiptinqa amparakuyänan markaman qeshpir aywakunqa.

6<<Amparakuyänan markaqa manami aläpa karuchösu kanman. Aläpa karu kaptinqa wanuq runapa ayllunkuna rabyash taripaykurmi wanusiyanqa. Mana yarpaypa wanusiq runakunaqa manami wanusishsu kayanqa. 7Sayno mana wanusiyänanpaq kimsa markakunata akrayanki.

8-9<<Lapan tantiyasishqä mandamientunkunata cumplir Tayta Diosta kuyar munashqanno imaypis kawayaptikimi unay ayllunsikunata promitishqanno nacionnikipa lindërunta jatunyäsinqa. Sayno jatunyäsiptinqa kimsa amparakuyänan markakuna kaykashqan jananman kimsa masta akrayanki. 10Amparakuyänan markakuna soqta kaptinmi runa mayinta mana yarpaypa wanusiq runa mayqan markamanpis qeshpikunanpaq cerca kanqa. Saynöpami Tayta Dios qoyäshunaykipaq kaq nacioncho say qeshpikuq runata wanusiyanqasu. Payta wanusirqa jusayuqmi kanqa.

11<<Pipis runa mayinta chikipashpan wanuykasir amparakuyänan markaman qeshpiptinqa 12say runapa markanpita mayor runakuna aywaykurmi apasiyämunqa. Nirkurmi wanuq runapa ayllunkunaman entregayanqa wanusiyänanpaq. 13Sayno runataqa mana kuyapaypa wanusiyanqa. Saynöpami Israel nacioncho runakuna tantiyakur runa mayinta wanusiyanqasu. Wanusikuq runa manana kaptinqa jawkanami kawayanki.

14<<Tayta Dios qoyäshunaykipaq kaq nacioncho täyashpayki vecïnuykipa lindërunkunata respitayanki. Unay aylluykikuna posisionta chaskir mujunninpaq jawiyashqan wankakunata ama witisiyankisu.#Deut. 27.17; Job 24.2; Prov. 22.28; Ose. 5.10.

Testïgukuna ishkay o kimsa kayänanpaq nishqan

15<<Ishkay o kimsa testïgukuna shimpiyaptinraqmi pipis jusayuq kashqan musyakanqa. Runata wanusishqanta o imatapis lutanta rurashqanta juk testïgula shimpiptinqa manami välinqasu.#Núm. 35.30; Deut. 17.6; Mat. 18.16; 2Cor. 13.1; 1Tim. 5.19; Heb. 10.28.

16<<Pipis chikipashpan imatapis manakaqta jitapaptinqa 17jitapaqpis y jitapaytukush runapis ishkanmi Tayta Diospa nawpancho kaykaq cürakunaman y juezkunaman aywayanqa. 18Saychömi juezkuna shumaq musyapakuyanqa rasunpaypa kashqanta o jitapaykashlantapis musyayänanpaq. Testïgu lulakushqanta tariparqa 19jitapaq runa castigasiyta yarpashqannölami kikintapis castigayanqa. Saynöpami mana ali ruraykuna qamkunacho kanqasu.#Deut. 13.5; 17.7; 1Cor. 5.13. 20Manakaqta jitapaykaq runata castigayashqanta musyarmi wakin runakunapis mansakur manakaqta pitapis jitapäyanqanasu.

21<<Jusayuq kaqtaqa mana kuyapaypa castigayanki. Pipis runa mayinta wanusiptinqa kikintapis wanusiyanki. Nawinta jorquptinqa kikinpa nawintapis jorquyanki. Kirunta jorquptinqa kikinpa kiruntapis jorquyanki.#Éxo. 21.23-25; Lev. 24.19-20; Mat. 5.38. Makinta pakiptinqa kikinpa makintapis pakiyanki. Saynöla chakinta pakiptinqa kikinpa chakintapis pakiyanki.#19.21 Nawpataqa runa mayinpa contran imatapis ruraptin runakuna aläpami castigayaq. Sayno kaptinmi Moisés qelqashqan leykunacho nirqan pipis jusalikushqanman tupu castïguta chaskinanpaq kashqanta.

Currently Selected:

Deuteronomio 19: qvhB

Highlight

Copy

Compare