Deuteronomio 1

Libru qalaykunan

1Kay libruchömi qelqaraykan Israel runakunata Moisés nishqankuna. Say wisanmi Israel runakuna kaykäyarqan Jordán mayu simpan inti jeqamunan kaqlä sunyaq jirkacho. Say karqan Zuf simpan Arabá pampachömi. Say kinraymi Parán, Tofel, Labán, Hazerot y Dizahab markakuna kayarqan. 2Seir jalqakunapa aywaq nänipa aywarmi Horeb jirkapita Cades-barneaman chunka juk junaqta chäyaq.

3Egiptupita yarqayämushqanpita chusku chunka (40) wata päsarkuptinmi chunka killa qalaykunan junaqcho Tayta Dios nishqankunata Israel mayinkunata Moisés wilarqan. 4Say wisanqa amorreo#Núm. 21.21-30. runakunapa mandaqnin rey Sehónta Israel runakuna maynami vincish kayarqan. Sehónqa Hesbón markachömi tarqan. Saynöpis Israel runakuna Basán nacioncho taq runakunapa mandaqnin rey Ogta maynami vincish kayarqan. Ogqa Astarot y Edrei markakunachömi tarqan.#Núm. 21.31-35.

5Jordán mayu simpan inti jeqamunanlä Moab pampacho kaykarmi Israel mayinkunata Moisés nirqan: 6<<Horebcho kaykashqami Tayta Diosninsi nimarqansi: <Qamkuna aska killanami kay jirkacho täyashkanki. 7Kananqa imaykikunatapis apakurkur amorreo runakuna y cananeo runakuna taykäyashqan kaqman aywayay. Yaykuyay Arabá pampaman, jalqakunaman, Sefelaman, Neguevman y lamar kuchun pampakunamanpis. Saynöpami Líbanuyaq y Éufrates mayuyaq yaykuyanki. 8Qamkunatami lapan say partikunata qoykushkä saycho täyänaykipaq. Kananqa sayman yaykur posisionta chaskiyay. Say partikuna qamkunapa kananpaqmi noqa Tayta Diosniki promitirqä Abrahamta, Isaacta, Jacobta y paypita miraqkunatapis> >>.

Juezkunata Moisés churashqan

Éxodo 18.13-27

9Mastapis Moisés nirqan: <<Horebcho kaykashqami qamkunata nirqä: <Japalä manami lapaykita arreglayta kamäpaküsu. 10Tayta Diosninsipa bendicionninwanmi askaqman mirayashkanki. Saymi kananqa qoyllarkunanöraq saysika kaykäyanki. 11Abraham, Isaac y Jacob yärakuyashqan Tayta Dios promitimashqansino bendicionninta qoykuyäläshunki kanan kayashqaykipita waranqa (1,000) kuti masman mirayänaykipaq. 12Saysika kayashpayki rimanakur demandanakuyaptiki japalä manami arreglayta atipäsu. 13Saymi cada trïbupita akrayanki shumaq yachaqkunata, tantiyakuqkunata y yarpayyuq runakunata. Paykunatami quejakuyashqaykita arreglayäshunaykipaq churapäyäshayki>.

14<<Sayno niptïmi niyämarqayki yarpashqäkuna ali kashqanta. 15Saymi cada trïbupita churarqä yachaqkunata, tantiyakuqkunata y yarpayyuq runakunata jueznikikuna kayänanpaq. Wakinta churarqä waranqa (1,000) runakunata arreglayänanpaq, wakinta churarqä pachak (100) runakunata arreglayänanpaq, wakinta churarqä pisqa chunka (50) runakunata arreglayänanpaq y wakintana churarqä chunka runakunata arreglayänanpaq. Wakintanami churarqä cada trïbupa jueznin kananpaq.

16<<Paykunatami nirqä: <Quejakayämuptin Israel mayiki kaptinpis o jäpa runa kaptinpis pipapis favornin mana sharkuypa lapantapis iwal arreglayanki. 17Jusayuqtaqa ama jananpäyankisu rïcu kaptinpis muchuq kaptinpis. Ali arreglayänaykipaq Tayta Dios yanapaykäyäshuptikiqa pitapis ama mansayankisu. Arreglayta mana puëdiyashqaykita isanqa noqaman apasiyämunki>.

18<<Say wisanmi lapaykita shumaq tantiyasirqä imano juzgayänaykipaqpis.

Chunka ishkay rikapakuqkuna Canaánman yaykuyashqan

Números 13.1—14.4

19<<Tayta Diosninsi nimashqansita cäsukurmi Horebpita shakamurqansi amorreo runakuna täyashqan jalqakunaman. Mansakuypaq sunyaq jirkakunapa päsamurmi Cades-barneaman chämurqansi. 20Saychömi nirqä: <Kananqa chämushkansinami amorreo runakuna taykäyashqan jalqakunaman. Kay jirkakunatami Tayta Diosninsi qomäshun. 21Unay ayllunsikuna yärakuyashqan Tayta Diosmi nimarqansi kay jirkakunaman yaykur posisionta sarinansipaq. Sayno kaptinqa mana qelanaypa pitapis mana mansakuypa say jirkakunaman yaykuyay>.

22<<Sayno niptïmi niyämarqayki: <Saycho imano kaykashqantapis musyanansipaq rikapakuqkunata kachashun. Paykuna kutimurmi wilamäshun mayqan nänipa aywanansipaq y mayqan markakunaman yaykunansipaq kashqantapis>.

23<<Sayno niyämaptikimi cada trïbupita jukta akrar chunka ishkay runakunata akrarqä. 24Paykuna jalqakunapa aywayashpanmi chäyarqan Escol pampaman. Saychömi intërupa rikapakur puriyämurqan. 25Kutiyämushpanmi say markakunacho wayuq mikuykunata chäsimur wilamarqansi Tayta Diosninsi qomänansipaq kaq markakuna ali kashqanta.

26<<Sayno wilamashqapis Tayta Diosninsi nishqanta mana cäsukurmi say markakunaman yaykuyta munayarqaykisu.#Deut. 9.23; Heb. 3.16. 27Saypa trukanqa tolduykikunacho parlar niyarqayki: <Tayta Dios chikimashpansimi Egiptupita jorqamashkansi amorreo runakunawan ushakäsimänansipaq. 28Kanan ¿maymanraq aywashun? Rikapakuqkuna kutimur wilamashkansi say markakunacho taq runakuna noqansipita mas jatusaq y kalpasapa kayashqanta y markankunapis altuyaq murallash kayashqantami. Saynöpis wilamashkansi Anacpita miraq jatusaq runakuna saycho kayashqanta. Sayno wilamashpansimi pasaypa mansakäsimashkansi>.

29<<Saymi noqa nirqä: <Ama lakikuyaysu ni mansariyaysu. 30Tayta Diosninsimi nawpansita aywar favorninsi pelyanqa. Saymi Egiptupita yarqamunansipaq yanapämashqansinöla kananpis yanapämäshun. 31Juk runa surinta marqakurkur apaqnömi sunyaq jirkapapis Tayta Diosninsi kayyaq chäsimashkansi.#Hech. 13.17-18. Kikinsimi rikashkansi Tayta Dios maypa pushamashqansita>.

32<<Sayno niptïpis qamkunaqa manami Tayta Diosninsiman yärakuyarqaykisu.#Heb. 3.19. 33Paymi nawpansita aywashpan mayman chänansipaq y maycho campamentuta ruranansipaqpis tantiyasimarqansi. Sakaypa nina rupaykaqwan y junaqpana pukutaywanmi maypa shamunansipaqpis pushamarqansi.

Israel runakunapaq Tayta Dios rabyashqan

Números 14.20-35

34<<Contran parlayashqaykita wiyarmi Tayta Dios fiyupa rabyashpan nimarqansi: 35<Abrahamta, Isaacta y Jacobta promitishqä ali nacionmanqa manami mayqaykipis yaykuyankisu.#Heb. 3.18. 36Nishqäkunata cäsukushqanpita Jefonipa surin Calebmi isanqa rikapakamushqan chakrakunaman yaykunqa. Payta y paypita miraqkunatami say chakrakunata qoykushaq>.

37<<Qamkuna rabyanäsiyashqaykipitami Tayta Dios rabyakushpan noqatapis nimarqan: <Qampis say nacionman manami yaykunkisu. 38Nunpa surin ashmayniki Josuémi isanqa yaykunqa. Sayno kaptinqa payta shumaq shakyäsiy say nacionman yaykur lapan trïbu Israel runakunata posisionninta aypunanpaq. 39Israel mayikikunami yarpaykäyan say nacionman yaykuyaptin warmintapis surinkunatapis saycho taq runakuna apakuyänanpaq kashqanta. Sayno yarpäyaptinpis surinkunataraqmi say nacionta qoykushaq duëñun kayänanpaq. 40Qamkunaqa Puka Lamarpa aywaq nänipa sunyaq jirkaman kutikuyay> >>.

Israel runakunata Hormacho vinciyashqan

Números 14.39-45

41<<Tayta Dios sayno niptinmi niyämarqayki: <Tayta Diosta rabyanäsirmi jusalikuyashkä. Pay nishqannömi kananqa pelyaq jukla aywayäshaq>. Sayno nirmi fácil vinciy kashqanta yarpar armaykikunata apakurkur jalqakunapa pelyaq wisäyarqayki.

42<<Manaraq aywayaptikimi qamkunata nirqä: <Tayta Diosmi nimash pelyaq aywayaptikipis mana yanapäyäshunaykipaq kashqanta. Aywayaptikiqa saycho taq runakuna ushakäsiyämushunkimi. Sayno kaykaptinqa ama aywayaysu>.

43<<Tayta Dios sayno nishqanta wilaptïpis mana cäsukayämashpaykimi runa tukur jalqakunapa pelyaq aywayarqayki. 44Saycho taq amorreo runakuna vinciyäshushpaykimi avispakunano qatikachäyämushurqayki. Saymi Israel mayinsikunata wanusiyarqan Seirpita Horma markayaq. 45Kutiykamur Tayta Diospa nawpancho waqar lakikuyaptikipis manami wiyayäshurqaykisu ni cäsupäyäshurqaykisu. 46Saynöpami Cades partilacho unayyaq tarqansi.

Currently Selected:

Deuteronomio 1: qvhB

Highlight

Copy

Compare