Deuteronomio 18

Levitakunapa derëchun kananpaq nishqan

1<<Cürakunapa y lapan Leví trïbu runakunapapis manami chakrankuna kanqasu. Saymi levitakunaqa Israel mayinkuna Tayta Diospaq apayashqan sacrificiukunalawan y ofrendakunalawan kawayanqa. 2Israel nacioncho chakrata chaskiyänanpa trukan kikin Tayta Diosmi paykunata promitishqanno herencian kanqa.#Núm. 18.20.

3<<Törukunata, carnishkunata y cabrakunata sacrificiupaq apayashqanpitami cürakunapa derëchun kanqa palitillan, chakawlan y cuwäjun. 4Saynöpis paykunapaq kanqa primiciata apayashqan trïgu, vïnu, aceiti y uyshakunapa punta kaq rutuyashqan milwan. 5Sayno chaskiyanqa imaypis sirviyänanpaq Tayta Dios Israel trïbukunapita akrash kaptinmi.

6<<Mayqan levitapis tashqan markapita Tayta Dios akrashqan sitiuman aywarqa 7levita mayinkunanöla Tayta Diosta saycho sirvinqa. 8Mikuytapis wakinkuna chaskiyashqannölami chaskinqa. Taytan kamaripashqan jananmanmi saykunata chaskinqa.

Mana ali costumbrikunata mana rurayänanpaq nishqan

9<<Tayta Dios qoyäshunaykipaq kaq nacionman chäyashpayki saycho taq runakunapa mana ali costumbrinkunata ama yachakuyankisu. 10Mayqaykipis ama olqu surikita ni warmi surikitapis sacrificiupaq rupasiyankisu. Ama adivinapakuq ni brüju ni rikakuqpis kayankisu.#Éxo. 22.18; Lev. 19.26, 31. 11Majiquërupis ni chaqchapakuqpis ama kayankisu. Wanushkunapa almanta manakuqpis ni tapukuqpis ama kayankisu. 12Sayno ruraqkunaqa Tayta Diosta fiyupami rabyanäsiyan. Yaykuyänaykipaq kaq nacioncho taq runakuna sayno rurayashqanpitami Tayta Dios paykunata qarqur ushakäsinqa. 13Qamkunaqa Tayta Dios munashqanno jusaynaq kawayanki.#Mat. 5.48. 14Yaykuyänaykipaq kaq nacioncho taq runakuna brüju y adivinakuq kayaptinpis sayno kayänaykita Tayta Dios manami munansu.

Moiséspa trukan juk profëtata Tayta Dios churananpaq nishqan

15<<Tayta Diosmi qamkunapita juk runata churanqa noqano profëta kananpaq. Payta cäsukuyanki.#Hech. 3.22; 7.37. 16Yarpäyay Horeb jirkacho shuntakaykur Tayta Diosta manakur niyashqaykita: <Tayta Dios nina rupaykaqpita parlamushqanta wiyar pasaypami mansariyä. Sayta wiyarqa wanuyäshaqchir>.#Éxo. 20.19.

17<<Sayno niyaptikimi Tayta Dios nimarqan: <Alitami paykuna niyash. 18Sayno kaykaptinqa Israel mayinkunapitami juk runata churashaq qamno profëta kananpaq. Wilakuynïta shiminman churaptïmi lapan nishqäkunata wilakunqa. 19Say profëta jutïcho wilakushqanta pipis mana cäsukuptinqa kikïmi juzgashaq>.

20<<Mayqan runapis profëta tukushpan <Tayta Diospa jutinchömi wilakuykä> nir manakaqkunata wilakuptin o juk dioskunapa jutincho wilakuptinqa wanusiyanki. 21Sayno kaptinqa qamkuna capaz niyankiman: <¿Imanöpataq musyashwan juk runa wilakushqan Tayta Diospita kashqanta o mana kashqantapis?> 22Juk wilakuq runa ima päsananpaq kashqanta Tayta Diospa jutincho wilakuptinpis nishqanno mana päsaptinmi musyayanki Tayta Diospita mana kashqanta. Kikinpa yarpaylanpita wilakushqanta tantiyapashpayki ama cäsupäyankisu.

Currently Selected:

Deuteronomio 18: qvhB

Highlight

Copy

Compare