Deuteronomio 17

1<<Töruta karpis uyshata karpis däñashta o mana alitaqa Tayta Diospaq altarcho ama rupasiyankisu. Sayno rurayaptikiqa pasaypami rabyakun.

2<<Tayta Dios rurashqan pactuta manakaqman churashpan qoyäshunaykipaq kaq markakunacho olqupis o warmipis 3juk dioskunata adorar qonqurpakuptin o intita, killata o qoyllarkunata adoraptinqa 4shumaq musyapakuyanki rasunpaypa adorashqanta o mana adorashqantapis. Israel nacioncho rasunpaypa sayno adoraykashqanta musyarqa 5say runata o warmita marka yarqunancho samqaykälar wanusiyanki.#Éxo. 22.20.

6<<Sayno wanusiyänaykipaqqa ishkay o kimsa testïgukunaraqmi shimpiyanman. Manami juk testïgu nishlanwanqa wanusiyankimansu.#Núm. 35.30; Deut. 19.15; Mat. 18.16; 2Cor. 13.1; 1Tim. 5.19; Heb. 10.28. 7Say testïgukunaraqmi warmita o runata karpis puntata samqar qalaykuyanqa. Saypitanami lapan runakuna samqayanqa. Saynöpami mana ali ruraykuna qamkunacho kanqasu.#Deut. 13.5; 19.19; 1Cor. 5.13.

8<<Markaykicho aläpa aja arreglaypaq cäsukuna kanqami. Sayno cäsukuna kanqa runa mayinta wanusishqanpita, runa mayinwan rimanakuyashqanpita o runa mayinwan pelyashqanpitapis. Saykunata arreglayta mana kamäpakurqa Tayta Dios akrashqan sitiuman aywaykur 9saycho kaq levita cürakunata karpis o juezta karpis tapukuyanki. Paykunami tantiyasiyäshunki imano arreglayänaykipaqpis. 10Kutiykur paykuna tantiyasiyäshushqaykinöla arreglayanki. 11Paykuna yäsiyäshushqaykinöla imatapis mana qonqaypa lapanta arreglayanki.

12<<Tayta Diosta sirviykaq cüra o juez imano arreglananpaq nishqanta mana cäsukuq runataqa wanusiyanki. Saynöpami lutan ruraq runakuna Israel nacioncho kayanqasu. 13Sayno wanusiyashqanta musyayashpanmi runakuna mansakuyashpan cürakuna y juezkuna niyashqanta cäsukuyanqa.

Reykuna imano kananpaqpis nishqan

14<<Tayta Dios qoyäshunaykipaq kaq nacioncho täyashpayki wakin nación runakunapa mandaqnin reykuna kayashqanno qamkunapis rey kananta capaz munayanki.#1Sam. 8.5. 15Sayno munarqa Tayta Dios akrashqan Israel mayikita mandaqniki rey kananpaq churayanki. Jäpa runataqa ama churayankisu.

16<<Say rey ama rantinqasu aska cawallukunata ni Egiptumanpis ama kachakunqasu cawalluta rantimunanpaq.#1Rey. 10.28; 2Crón. 1.16; 9.28. Egiptuman mana kutinapaqmi Tayta Dios nirqan: <Egiptuman ama imaypis kutiyankisu>. 17Saynöpis aska warmiyuq manami kanmansu.#1Rey. 11.1-8. Aska warmiyuq karqa Tayta Diostapis qonqaykunmanmi. Ni qoritapis ni qellaytapis aläpa manami shuntanmansu.#1Rey. 10.14-22, 27; 2Crón. 1.15; 9.27.

18<<Rey kayman yaykuptin kay yachasishqä leykunata liyinanpaq levita cürakuna sararäyashqan röllupita juk rölluman copiasinqa. 19Say leykunatami rey wanunanyaq waran waran liyinqa. Saynöpami Tayta Diosta mansapakuyta yachakur lapan leyninkunata y estatütunkunata cäsukunqa. 20Saynöpis marka mayinkunata manami manakaqman churanqasu y ley nishqankunatapis manami qonqanqasu. Sayno karqa kikinpis, surinkunapis y surinkunapita miraqkunapis Israel nacioncho imaypis reymi kayanqa.

Currently Selected:

Deuteronomio 17: qvhB

Highlight

Copy

Compare