Deuteronomio 16

Pascua fiestata rurayänanpaq nishqan

Éxodo 23.14-17; 34.18-24

1<<Abib killacho Tayta Diosta adorar Pascua fiestata rurayanki.#Éxo. 12.1-20; Lev. 23.5-8; Núm. 28.16-25. Say killachömi Tayta Dios Egiptupita sakaypa jorqayämushurqayki. 2Pascua fiestata rurar maychöpis adorayänaykipaq akrashqan sitiucho Tayta Diospaq sacrificiuta rupasirqa wäkata karpis, uyshata karpis o cabrata karpis pishtayanki. 3Sacrificiupaq pishtayashqayki uywapa aysanta levadüraynaq tantatawan mikuyanki. Levadüraynaq tantata qanchis junaqnintin mikuyanki Egiptucho nakayashqaykipita apurä yarqamur mikuyashqaykino. Saynöpami imaypis yarparäyanki Egiptupita yarqayämushqaykita. 4Qamkuna täyashqayki intëru nacioncho qanchis junaqnintin wayikikunacho ima levadürapis ama kanqasu. Fiesta qalaykunan tardi sacrificiupaq pishtayashqayki uywapa aysantapis warayninpaqqa ama pusüsiyankisu.

5<<Tayta Dios qoyäshunaykipaq kaq nacionman char lutalaqa maychöpis Pascua fiestapaq sacrificiu mikuyta ama rurayankisu. 6Saypa trukanqa Tayta Diosta adorayänaykipaq akrashqan sitiulacho rurayanki. Inti jeqaykashqan höra uywata pishtar Pascua sacrificiuta rupasiyanki. Say hörami Egiptupita yarqayämurqayki. 7Sacrificiupaq pishtayashqayki aysataqa Tayta Dios akrashqan sitiulacho kankaykur mikuyanki. Waraynin tuta isanqa wayikikunapa kutikuyanki.

8<<Saypita soqta junaqnintin levadüraynaq tantata mikuyanki. Qanchis kaq junaqchöqa Tayta Diosta adorar lapayki shuntakäyanki. Say junaq ama aruyankisu.

Semäna fiestata rurayänanpaq nishqan

9<<Saki mikuy cosëchata qalaykuyashqaykipita qanchis semänata 10Semäna fiestata#Lev. 23.15-21; Núm. 28.26-31. Tayta Diosta adorar rurayanki. Bendicionninta churamushqan tupumi Tayta Dios akrashqan sitiuman voluntänikipita ofrendata apayanki. 11Saycho surikikunawan, ashmaynikikunawan, markaykicho taykaq levitakunawan, jäpa runakunawan, waksakunawan y viüdakunawan shuntakäyashpayki Tayta Diospa nawpancho fiestata rurar kushikuyanki. 12Egiptucho ashmay kayashqaykita yarpar kay tantiyasishqäkunata lapanta chaskikuyay.

Ramäda fiestata rurayänanpaq nishqan

13<<Trïgu cosëchata y üva cosëchata ushaskir qanchis junaq Ramäda fiestata rurayanki.#Lev. 23.33-36, 39-43; Núm. 29.12-38. 14Fiestata rurar kushikuyanki surikikunawan, ashmaynikikunawan, levitakunawan, jäpa runakunawan, waksakunawan y markaykicho taq viüdakunawanpis. 15Say fiestataqa akrashqan sitiulacho qanchis junaqyaq Tayta Diosta adorar rurayanki. Lapanchöpis Tayta Dios bendicionta churaykämuptinqa lapan shonquykikunawan kushikuyanki.

16<<Say kimsa fiestakunapaqmi cada watacho kimsa kuti lapan olqu kaqkuna Tayta Dios akrashqan sitiuman aywaykur paypa nawpancho shuntakäyanqa. Say fiestakuna kanqa Levadüraynaq Tantata Mikuna fiesta#16.16 Pascua fiestata y Levadüraynaq Tantata Mikuna fiestataqa juntulami rurayarqan., Semäna fiesta y Ramäda fiestami. Say fiestakunaman pipis jinaylaqa ama aywanqasu. 17Saypa trukanqa Tayta Dios bendicionninta churamushqan tupu ofrendata apayanqa.

Shumaq arreglayänanpaq juezkunata nishqan

18<<Tayta Dios qoyäshunaykipaq kaq markakunacho täyashpayki runakuna quejanakuyaptin shumaq tantiyakuykur arreglayänanpaq cada trïbupa juezninkunata y mandaqninkunata churayanki. 19Juez karqa pitapis mana jananpaylapa lapanta shumaq arreglayanki. Rïcutapis pobritapis mana chaskipakuylapa arreglayanki. Chaskipakuq juezqa manami shumaq arreglansu, saypa trukanqa chaskipashqan runapa favornin sharkurmi runakuna ali yäsiyashqantapis chaskinsu.#Éxo. 23.6-8; Lev. 19.15. 20Sayno kaptinqa imaypis shumaq tantiyaykur pitapis shumaq arreglayanki. Saynöpami Tayta Dios qoyäshunaykipaq kaq nacioncho ali kawayanki.

21<<Asera diösata adorayänanpaq raku qerukunatapis Tayta Diospa altarnin nawpanman ama jawiyankisu.#Éxo. 34.13. 22Adorayänaykipaq wanka rumitapis ama ichisiyankisu. Saykunata ichisiyaptikiqa Tayta Dios fiyupami rabyakun.#Éxo. 23.24; Lev. 26.1.

Currently Selected:

Deuteronomio 16: qvhB

Highlight

Copy

Compare