Deuteronomio 15

Jaqakunata perdonayänan watapita tantiyasishqan

1<<Pipis jaqayki kaptin cada qanchis watacho perdonar amana cobrayankinasu.#Lev. 25.1-7. 2Say wata chämuptin mayqaykipis Israel mayikita prestashqaykita perdonar amana cobrayankinasu. Say watami kanqa Tayta Diosta cäsukur jaqakunata perdonayänayki wata. 3Israel runa mayikita perdonarpis mana Israel runatami isanqa jaqaykita cobrayanki.

4<<Sayno rurayaptikimi qoykushunaykipaq kaykaq nacioncho Tayta Dios bendicionninta churamunqa. Saymi qamkunacho pobrikuna kanqasu. 5Bendicionninta Tayta Dios sayno churamunqa kanan wilapashqä mandamientukunata cumplilaptikimi. 6Promitishqanno bendicionninta qoshuptikimi wakin nación runakunata prestayänaykipaqpis kanqa. Qamkuna manami pipitapis manakuyankisu. Aska nacionkunatami munaynikicho sararäyanki. Qamkunataqa manami pipis munaynincho sararäyäshunkisu.

7<<Tayta Dios qoyäshunaykipaq kaq nacionchöna taykäyashpayki marka mayiki pobri kaptinqa yanapäyanki. Mana kuyapäkuqqa ama kayankisu. 8Saypa trukanqa manakuyäshuptiki nistashqanta manaykuyanki.#Lev. 25.35. 9Jaqakunata perdonayänan wata chämunanpaq kashqantana tantiyar ama yarpäyankisu manana prestayänaykipaq kashqanta, saypa trukanqa manakuyäshuptiki prestayanki. Mana prestayaptikiqa nisidächo kaykaq runa Tayta Diosman quejakuptin jusayuqmi rikakuyanki. 10Sayno kaptinqa lapan voluntänikikunawan muchuqkunata yanapäyanki. Sayraqmi Tayta Dios bendicionninta churamunqa lapan aruyashqaykikunaman. 11Kay pasachöqa muchuqkuna imaypis kayanqami.#Mat. 26.11; Mar. 14.7; Juan 12.8. Saymi noqa nï marka mayikikuna nisidächo kayaptin yanapäyänaykipaq.

Ashmayninkunata libri kachariyänanpaq nishqan

Éxodo 21.1-11

12<<Hebreo mayiki olqu o warmi karpis ashmayniki kananpaq qampita qellayta jorqush karqa#Lev. 25.39-46. soqta watayaqlami arupäyäshunki. Qanchis watachöqa librinami yarqukunqa. 13Yarqukuptin ama jinaylataqa despachayankisu. 14Saypa trukanqa Tayta Dios bendicionninta qoyäshushqaykipita uywatapis janchaparkuyanki y mikuytapis y vïnutapis qepiparkuyanki. 15Ama qonqäyankisu qamkunapis Egiptucho ashmay kayashqaykipita Tayta Dios jorqayämushushqaykita. Saymi qamkunata nï ashmaynikikunata librina kachariyänaykipaq.

16<<Isanqa ashmayniki qamkunawan y aylluykikunawan yachakash kar aywakuyta mana munaptinqa 17punkupa quiciunninman apaykur rinrinta alisnawan uchkupäyanki. Saynöpami wanushqanyaq ashmayniki kanqa. Saynöla rurayanki ashmayniki warmi kaptinpis.

18<<Ashmayniki librina aywakuptin ama rabyanäyankisu. Tantiyakuyay arupakuqta pägayänaykipaq kashqanpita mënusta pägayashqaykita. Barätulapaqmi soqta watantin arupäyäshushkanki. Ashmaynikikunata sayno kachariyaptikiqa Tayta Dios lapan aruyashqaykimanmi bendicionninta churamunqa.

Uywankunapa punta yuriq orqu wawankuna Tayta Diospaq nishqan

19<<Wäkaykikunapa, uyshaykikunapa y cabraykikunapa punta yuriq orqu wawantaqa Tayta Diospaq rakiyanki.#Éxo. 13.12. Wäkaykikunapa punta kaq orqu wawanta ama arusiyankisu. Uyshaykikunapa punta kaq orqu wawanpa milwantapis ama rutuyankisu. 20Say punta yuriqkunataqa Tayta Dios akrashqan sitiuman apaykur cada wata lapan castaykikunawan sacrificiuta rupasir paypa nawpancho mikuyanki. 21Weqruta, qaprata o imanpis däñash uywataqa Tayta Diospaq sacrificiuta ama rurayankisu. 22Saypa trukanqa markalaykicho mikuyanki.

<<Püru karpis impüru karpis tarushta y luychuta sarir mikuyashqaykino mikuyanki. 23Yawarninta isanqa mikuyänaykipa trukan yakutano pasaman jichariyanki.#Gén. 9.4; Lev. 7.26-27; 17.10-14; 19.26; Deut. 12.16, 23.

Currently Selected:

Deuteronomio 15: qvhB

Highlight

Copy

Compare