Deuteronomio 13

1 1 (2) <<Qamkuna kaqcho juk runa profëta tukur o sueñushqanta wilakur capaz ninman: <Noqatami Tayta Dios sueñuynïcho tantiyasimash milagruta rikanansipaq kashqanta>. 2 2 (3) Say runa nishqanno milagru päsaptin <mana adorayashqayki dioskunatana adorashun> niyäshuptikiqa 3 3 (4) ama chaskipäyankisu. Say runata chaskipäyänaykipa trukanqa tantiyakuyanki Tayta Diosninsi pruëbaman churaykäyäshushqaykita. Paymi musyayta munaykan lapan shonquykikunawan y voluntänikikunawan payta kuyayashqaykita o mana kuyayashqaykitapis.

4 4 (5) <<Tayta Diosnilansita sirviyay, pay japalanta mansapakuyay y mandamientunkunata imaypis cumpliyay. 5 5 (6) Juk dioskunata adorayänaykipaq shimita qoyäshuqnikikunataqa wanusiyanki. Paykunaqa munaykäyan Egiptucho ashmay kayashqaykipita jorqamushuqniki Tayta Diosta kachariyänaykitami. Sayno kayashqanpita paykunata wanusiyay. Saynöpami mana ali ruraykuna qamkunacho kanqasu.#Deut. 17.7; 19.19; 1Cor. 5.13.

6 6 (7) <<Mana adorayashqayki ni unay ayllunsikunapis mana adorayashqan dioskunata adorayänaykipaq pipis pakaylapa inkitayäshuptiki ama chaskipäyankisu. Sayno ama chaskipäyankisu wawqiki kaptinpis, suriki kaptinpis, warmiki kaptinpis, o yachanakuyashqayki amïguyki kaptinpis. 7 7 (8) Saynöla ama chaskipäyankisu cercacho taq runakuna o karucho taq runakuna adorayashqan diosninkunata adorayänaykipaq niyäshuptikipis. 8 8 (9) Sayno inkitashuqnikikunata mana kuyapaypa, mana perdonaypa, favornin mana sharkuypa 9 9 (10) wanusiyanki. Say runata o warmitaqa kikikikunami puntata samqar qalaykuyanki. Saypitanami lapan runakunana samqayanqa. 10 10 (11) Egiptucho ashmay kashqansipita jorqamaqninsi Tayta Diosta kachariyänaykipaq inkitakuq runakunataqa samqaypa wanusiyanki. 11 11 (12) Sayno wanusiyaptikimi Israel runakuna mansakuyashpan runa mayinta sayno inkitayanqanasu.

12 12 (13) <<Tayta Dios qoykuyäshushqayki nacioncho täyashpayki capaz musyayankiman mayqan markachöpis 13 13 (14) runa mayinta <mana adorashqansi juk dioskunata adorashun> nir inkitayashqanta. 14 14 (15) Sayta pipis niyäshuptiki shumaq musyapakuyanki say markacho rasunpaypa juk dioskunata adorayashqanta o mana adorayashqantapis. Juk dioskunata rasunpaypa adorayaptinqa 15 15 (16) say markacho taqkunata espädawan uywantinta chipyaq wanusiyanki.#Deut. 20.16-18; Jos. 6.17. 16 16 (17) Imaykantapis shunta shuntarkur pläzaman qotuykur lapanta rupasiyanki. Nirkur markantapis kayayanki. Say kayayashqaykimi Tayta Diospaq rupasina sacrificiu kanqa. Say marka imayyaqpis raqälana quëdaptin pipis mananami sharkasinqanasu.

17 17 (18) <<Cuidä say shuntayashqaykikunata rupasiyänaykipa trukan quëdasikuyankiman. Lapanta rupasiyaptikiqa Tayta Dios manami castigayäshunkisu. Saypa trukanqa unay ayllunsikunata promitishqanno kuyapäyäshushpaykimi yanapäyäshunki askaman mirar jatun nación kayänaykipaq. 18 18 (19) Sayno kuyapäyäshunaykipaq Tayta Diospa lapan mandamientunkunata kanan junaq wilapashqäta imaypis cäsukur pay munashqannöla kawayanki.

Currently Selected:

Deuteronomio 13: qvhB

Highlight

Copy

Compare