Deuteronomio 12

Tayta Dios akrashqan sitiulacho sacrificiuta rupasiyänanpaq nishqan

1Saypita mastapis Moisés nirqan: <<Unay ayllunsikuna yärakuyashqan Tayta Diospa mandamientunkunata y leyninkunata kanan tantiyasishayki. Qoyäshunaykipaq kaykaq nacioncho täyashpayki saykunata waran waran imaypis cumpliyanki.

2<<Say nacioncho taq runakunata ushakäsir jalqakunacho, patakkunacho y copösu jachakuna chakincho diosninkunata adorayashqan sitiukunatapis chipyaq ushakäsiyanki. 3Saynöla altarninkunatapis juchurasiyanki. Adorayänanpaq ichisiyashqan wankakunatapis shaluriyanki. Asera diösata adorayänanpaq jawiyashqan raku qerukunatapis rupasiyanki. Wakin diosninkunata adorayänanpaq laqlayashqan ïdulunkunatapis ushakäsiyanki. Sayno ushakäsiyaptikimi say dioskunapa jutinkunapis qonqakäkunqana.#Deut. 7.5.

4<<Tayta Diosninsita adoraykarqa say runakuna diosninkunata adorayashqannöqa ama adorayankisu. 5Saypa trukanqa Tayta Diosninsita adorayanki pay akrashqan sitiulacho. Say sitiucho tänanpaqmi lapan Israel trïbukuna kaykäyashqanpita akranqa. 6Saymanmi uywaykikunata apayanki rupasina sacrificiupaq y wakin sacrificiukunapaqpis. Saynöpis saymanmi apayanki diezmuykikunata, promitiyashqayki ofrendakunata, voluntänikipita kaq ofrendakunata, wakin kaq ofrendaykikunata y wäkaykikunapa, uyshaykikunapa y cabraykikunapa punta wawankunatapis. 7Saychömi Tayta Diospa bendicionninwan mikuynikikuna wayushqanpita lapan castaykikunawan Diospa nawpancho#12.7 Tayta Diospa nawpancho nirqa Tinkuna Tolducho kaykaq altarpa nawpanchömi nikan. kushish mikuyanki.

8<<Tayta Dios qoykuyäshunaykipaq kaykaq nacionman char manami kanan adorayashqaykinösu adorayanki. Kananqa puëdiyashqaykiman tupulami Tayta Diosta adoraykäyanki. 9Sayno adoraykäyanki Tayta Diosninsi qoykushunaykipaq kaykaq jamayman manaraq yaykur y herenciaykita manaraq chaskirmi. 10Jordán mayuta simpaykurnaqa qoykuyäshunaykipaq kaykaq nacionchönami täyanki. Contraykikunata Tayta Diosninsi ushakäsiptinmi mana mansariypa saycho jawkala täyanki. 11Tayta Diosninsi tänanpaq akrashqan sitiucho adorayänaykipaqmi lapan nishqäkunata apayanki. Saymi uywakunata y mikuykunata sayman apayanki rupasina sacrificiukunapaq y wakin sacrificiukunapaqpis. Saynöpis apayanki diezmuykikunata, promitiyashqayki ofrendaykikunata y voluntänikipita kaq ofrendakunatapis. 12Tayta Diosninsipa nawpanchömi olqu surikikunawan, warmi surikikunawan y ashmaynikikunawanpis shuntakaykur kushish adorayanki. Markaykikunacho taq levitakunatapis invitayanki shuntakaykur mikuyänaykipaq. Paykunapa manami chakrankunapis kanqasu.

13<<Cuidä maychöpis munayashqaykicho rupasina sacrificiukunata rupasiyankimantaq. 14Saypa trukanqa lapan trïbukunapita Tayta Dios akrashqan sitiulacho rupasiyanki. Payta adorayänaykipaq yäsishqäkunata saycho cumpliyanki.

15<<Aysanar imarqa Tayta Dios kamaripäyäshushqaykipita uywaykikunata pishtar maychöpis mikuyanki. Püru karpis impüru karpis aysata sayno mikuyanki tarushta y luychuta kanan mikuyashqaykino. 16Yawarninta isanqa ama mikuyankisu.#Gén. 9.4; Lev. 7.26-27; 17.10-14; 19.26; Deut. 15.23. Saypa trukanqa yakutano pasaman jichariyanki.

17<<Diezmukunata ama markaykikunacho mikuyankisu, trïgupita, vïnupita y aceitipita kaptinpis. Saynöla markaykikunacho mikuyankisu wäkaykikunapa, uyshaykikunapa y cabraykikunapa punta wawankunata, ni promitiyashqayki ofrendakunata, ni voluntänikipita ofrendakunata ni wakin ofrendakunatapis. 18Saypa trukanqa Tayta Dios akrashqan sitiuman aywaykur paypa nawpancho mikuyanki. Saycho mikuyanki surikikunawan, ashmaynikikunawan y markaykicho taq levitakunawanpis. Mikuyashpayki kushikuyanki mikuy ali wayushqanpita. 19Nacionnikichöna tarqa levitakunata mana qonqaypa imaypis yanapäyanki.

20<<Tayta Dios promitishqannöla tänaykipaq kaq nacioncho askaman mirar aysanar imarqa maychöpis aysata mikuyanki. 21Tayta Diosta adorayänaykipaq kaq sitiu markaykipita karu kaptinqa tantiyasishqänöla wäkaykita, uyshaykita y cabraykita pishtar taykäyashlaykicho mikuyanki. 22Püru karpis impüru karpis tarushta y luychuta kanan mikuyashqaykinöla say aysata mikuyanki. 23Yawarninta isanqa ama mikuyankisu. Lapan kawaqkunapaqa yawarninchömi vïdan kaykan. Sayno kaykaptinqa yawarnintinta aysata ama mikuyankisu. 24Saypa trukanqa yakutano pasaman jichariyanki.#Lev. 1.5; 17.10-14. 25Yawarta mana mikurqa qampis surikikunapis Tayta Dios munashqannömi ali kawayanki.

26<<Sacrificiupaq promitiyashqayki uywakunata y saki mikuy ofrendakunata isanqa Tayta Dios akrashqan kaq sitiumanraq apayanki. 27Saychömi uywakunata rupasina sacrificiupaq pishtaykur yawarninta y aysata Tayta Diospa altarnincho rupasiyanki. Wakin sacrificiukunapaq uywata pishtarqa aysanta mikurpis yawarnintaqa altarman saqsuyanki.

28<<Lapan kay wilapashqä mandamientukunata cumplirqa qampis surikikunapis Tayta Dios munashqanno kawarqa imayyaqpis alimi kawayanki>>.

Juk dioskunata mana adorayänanpaq nishqan

29Saypita mastapis Moisés nirqan: <<Canaánman chäyaptiki saycho taq runakunata Tayta Dios ushakäsinqami. Saychöna täyashpayki 30say runakuna adorayashqan dioskunata ama adorayankisu. Saynöla diosninkunata adorayta munar imano adorayashqantapis ama tapupäyankisu. 31Say runakunaqa diosninkunata adorarmi Tayta Diosta rabyanäsiyan. Diosninkunata adorayashpanmi olqu surinkunata y warmi surinkunatapis sacrificiupaq altarcho rupasiyan. Saynöqa Tayta Diosta ama adorayankisu.

32 32 (13.1) <<Lapan wilapashqä mandamientukunata cumpliyänaykipaq shumaq tantiyakuyay. Say mandamientukunamanqa ama ni juk mandamientutapis yapayankisu ni saykunapita juk mandamientutapis jorquyankisu.#Deut. 4.2; Apoc. 22.18-19.

Currently Selected:

Deuteronomio 12: qvhB

Highlight

Copy

Compare