Deuteronomio 11

Tayta Dios munayyuq kashqan

1Saypita mastapis Moisés nirqan: <<Tayta Diosta kuyayashpayki yachasikuyninkunata, estatütunkunata, leyninkunata y mandamientunkunata imaypis cumpliyay. 2Kanan junaq yarpäyay Tayta Diosninsi castigakuq y munayyuq kashqanta. Manami surikikunasu saykunata rikayarqan, sinöqa kikikikunami. 3Saynöpis manami surikikunasu rikayarqan Faraónta y Egiptucho taq runakunata Tayta Dios munayninwan castigashqanta, sinöqa kikikikunami.#Éxo. 7.8—12.30. 4Saynöpis manami surikikunasu rikayarqan Egipto soldädukunata cawalluntinta carrëtantinta Tayta Dios Puka Lamarcho ushakäsishqanta, sinöqa kikikikunami.#Éxo. 14.28. 5Yarpäyay sunyaq jirkapa päsayämuptiki kayman chäyämunaykipaq Tayta Dios imano yanapäyäshushqaykitapis. 6Saynöpis yarpäyay runakuna rikaykäyaptin Rubén trïbu Eliabpa surinkuna Datánta y Abiramta Tayta Dios castigashqanta. Paykunata castigarmi lapan castankunata, toldunkunata y imaykankunatapis pasata kichakaskasir ultaskasirqan.#Núm. 16.31-32. 7Kikikikunami rikayarqayki poderninwan Tayta Dios sayno rurashqankunata.

Tayta Diospita bendicionta chaskiyänanpaq nishqan

8<<Saykunata rikash kaykarqa kanan wilapashqä lapan mandamientukunata cumpliyay. Lapanta cumpliyaptikiqa Canaánman yaykuyaptiki Tayta Diosmi kalpata qoyäshunki saycho taq runakunata ushakäsiyänaykipaq. 9Saynöpis awkinyäyashqaykiyaqmi saycho kushish kawayanki. Saycho kawayänaykipaqmi Abrahamta, Isaacta y Jacobta Tayta Dios promitirqan. Saychöqa lichipis abëjapa mishkinpis yakunöraqmi aska kaykan.

10<<Täyänaykipaq kaykaqchöqa chakra manami Egiptucho täyashqayki chakranösu kaykan. Egiptuchöqa muruyashqayki chakrakunatapis huertata parquqnömi parquyarqayki. 11Isanqa yaykuyänaykipaq kaykaq partichöqa imaypis tamyaptinmi jalqakunapis y raqrakunapis kuyaylapaq verdinraq. 12Saycho chakrakunataqa tamya tiempuchöpis usya tiempuchöpis kikin Tayta Diosmi mana qonqaypa rikaykan.

13<<Kanan junaq wilapashqä mandamientukunata cumplir Tayta Diosninsita kuyayaptiki y lapan shonquykikunawan y voluntänikikunawan payta sirviyaptikiqa 14punta kaq tamyata y qepa kaq tamyatapis tiempulanchömi tamyasimunqa. Saymi trïgupis ni vïnupis ni aceitipis pishïyäshunkisu. 15Qewapis intëru jalqakunachömi loqluypa loqlurraq uywaykikunapaq kanqa. Saynölami mikuyänaykipaq imayka mikuypis aska wayunqa.

16<<Sayno kaykaptinqa paqtaraq pipis engañayäshuptiki Tayta Diosta qonqaykur juk dioskunata adorayankiman. 17Juk dioskunata adorayaptikiqa Tayta Dios fiyupa rabyakushpan mana tamyasimuptinmi murupakuyashqaykikunapis wayunqanasu. Tayta Dios entregayäshushqayki ali nacioncho tarpis lapaykimi wanur ushakäyanki.#Deut. 28.1-14.

18<<Sayno kaykaptinqa lapan wilapashqä mandamientukunata chaskikur imaypis yarparäyanki. Mana qonqayänaykipaq say mandamientukunata qelqaykur rikraykikunamanpis urkuykikunamanpis watakuyay. 19Surikikunata mana qonqaypa yachasiyanki wayikikunachöpis, nänikunachöpis, punuyänaykipaq kamakarpis y punuyashqaykipita sharkurpis. 20Saynöla qelqayanki wayi punkupa quiciunninman y marka yaykuna punkukunamanpis.#Deut. 6.6-9. 21Saynöpami unay ayllunsikunata Tayta Dios promitishqan nacioncho qamkunapis y surikikunapis kay pasa y jana pasa ushakashqanyaq aska wata kushish kawayanki.

22<<Kanan junaq wilapashqä mandamientukunata cumpliyaptiki, Tayta Diosninsita kuyayaptiki y pay munashqanno kawayaptikiqa 23Tayta Diosmi yanapäyäshunki Canaánman yaykur saycho taq runakunata ushakäsiyänaykipaq. Sayno ushakäsiyanki qamkunapita mas askaq y mas munayyuq kayaptinpis. 24Saymi Canaáncho may markaman yaykuyashqaykipis qamkunapaqna kanqa. Lindëruykikunapis kanqa sunyaq jirkapita Líbano nacionyaq y Éufrates mayupita Mediterráneo Lamaryaqmi. 25Mayman chäyaptikipis Tayta Diosninsi promitishqanno yanapäyäshuptikimi runakuna mansakuyäshushpayki ichipäyäshunkisu.#Jos. 1.3-5.

26<<Bendicionta karpis o maldicionta karpis qamkuna kanan akrayay. 27Tayta Diosninsipa mandamientunkunata kanan junaq wilapashqäta cäsukurqa bendiciontami chaskiyanki. 28Tayta Diosninsita qonqaykur, mandamientunkunata mana cäsukur y imaypis mana adorayashqayki dioskunata adorarmi isanqa maldicionash kawayanki.

29<<Canaánman yaykuyänaykipaq Tayta Dios yanapäyäshuptikimi Gerizim jirkaman wisarkur sinchi niyämunki Tayta Diosta cäsukur bendicionninta chaskiyänaykipaq kashqanta. Saynöpis Ebal jirkaman wisarkur sinchi niyämunki Tayta Diosta mana cäsukurqa maldicionash kayänaykipaq kashqanta.#Deut. 27.11-14; Jos. 8.33-35. 30Say ishkay jirkakunaqa Jordán mayu simpan inti jeqanan kaqlächömi kaykäyan. Saynöpis say jirkakuna kaykäyan Gilgal marka simpancho y More encina jachakuna cercanchömi. Sayqa Arabá pampacho taq cananeo runakuna täyashqanchömi kaykäyan.

31<<Qamkuna Jordán mayuta simpäyänaykipaqnami kaykäyanki. Simpäyaptikimi say nacionman yaykur täyänaykipaq Tayta Diosninsi yanapäyäshunki. Saycho täyashpayki 32kanan junaq lapan wilapashqä mandamientunkunata y leyninkunata mana qonqaypa cumpliyanki>>.

Currently Selected:

Deuteronomio 11: qvhB

Highlight

Copy

Compare