Daniel 8

Carnitawan chïvuta revelacioncho Daniel rikashqan

1Belsasar kimsa wata rey kaykaptinmi noqa Daniel yapay revelacionta rikarqä. 2Say revelacionchömi kaykarqä Elam provinciacho kaykaq Susa markacho y Ulai mayu kuchuncho. 3Rikachakushqächömi rikarqä ishkay largu waqrayuq carni mayu kuchuncho kaykaqta. Jukaq waqran qepataraq winamush kaykarpis mas largumi karqan. 4Saychömi rikarqä inti jeqanan kaqläpa, norti kaqläpa y sur kaqläpa say carni atacaykaqta. Manami ima uywapis ichipayta kamäpakurqansu. Saynöpis manami munayninpita pipis salvakurqansu. Say carni munashqanta rurarmi lapanpitapis mas munayyuq rikakurqan.

5Saykunapaq yarpachakuykaptïmi inti jeqanan kaqläpita juk yayan chïvu urkuncho jatunkaray waqrayuq yurirkamurqan. Say chïvumi pasatapis mana jaruylapa maysaypapis aywarqan. 6Mayu kuchuncho rikashqä ishkay waqrayuq carniman chaykurmi lapan kalpanwan rabyash takaykurqan. 7Rikaraykaptï takaykuptinmi carnipa ishkan waqran pakiskirqan. Chïvu saqtar pasaypa jarukur ushaptinmi carni ima ruraytapis kamäpakurqansu. Sayno atacaptin manami pipis washayta kamäpakurqansu.

8Saymi chïvuqa waranlanta waranlanta mas kalpayuq rikakurqan. Pasaypa munayyuq kaykaptinmi jatunkaray waqran pakikäkurqan. Say pakiq waqrapa trukanmi chusku jatusaq waqrankuna winamurqan. Say waqrankunami chuskunläpa toqriraykarqan.

9Jukaq waqrapitami taksha waqra winar mas jatunkaray rikakurqan. Say waqrami winarqan sur kaqläpa, inti jeqamunan kaqläpa y kuyaylapaq nacionninsi kaqläpa.#8.9 Say waqraqa Antíoco IV Epífanes jutiyuq reymi karqan. Pay mandayta qalaykurqan revelacionta Daniel rikashqanpita kimsa pachak qanchis chunka (370) watata qepataraqmi. 10Saynöpis jatunyarqan jana pasacho kaykaq angilkunayaqmi. Saymi wakin angilkunata y qoyllarkunata qarparamur jarur usharqan.#Apoc. 12.4. 11Angilpa mandaqninpita mas munayyuq kashqanta yarparmi sacrificiuta templucho waran waran rupasiyänanta consientirqansu y templutapis impüruyäsirqan.#8.11 Templuta impüruyäsin Tayta Dios prohibishqanta saycho rurarmi. Saypita masta musyanaykipaq liyinki Lev. 20.3; 21.12; Núm. 19.13, 20. Antíoco IV Epífanes jutiyuq rey templuta impüruyäsir imata rurashqanta musyanaykipaq liyinki 1 Macabeos 1.20-24, 44-50. 12Sayno kaptinmi waran waran rupasiyänanpaq kaq sacrificiuta rupasiyarqannasu y Diosman yärakuqkuna saycho adorayarqannasu. Say waqraqa Tayta Dios nishqantapis lapantami manakaqman churarqan. Waqra munashqannömi lapanpis karqan.

13Saypitami wiyarqä ángel mayinta juk ángel kayno tapuykaqta: <<¡Imayyaqraq waran waran rupasiyänanpaq kaq sacrificiuta rupasiyanqasu! ¡Imayyaqraq Tayta Diosta mana cäsukur templuta manakaqman churayanqa! ¡Imayyaqraq Tayta Diosman yärakuqkunata nakasiyanqa!>>

14Tapuptinmi jukaq ángel nirqan: <<Sayno kanqa ishkay waranqa kimsa pachak (2,300) tardiyaq y tutayaqmi. Saypitaraqmi templu purificash kanqa>>.

Revelacioncho Daniel rikashqan imapaq kashqanpis

15Noqa Daniel revelacionta rikashqäpita yarpachakur kaykaptïmi elaqpita nawpächo runa niraq yurirkamurqan. 16Saypitami wiyarqä Ulai mayupita say runa niraq kayno nimuqta: <<Ángel Gabriel, tantiyasiy rikashqan imapaq kashqantapis>>.#Luc. 1.19, 26.

17Ángel Gabriel nawpäman shamuptinmi pasaypa mansarir lätakaypa pasaman aywaskirqä. Saymi nimarqan: <<Runapa surin, shumaq tantiyakuy. Lapan rikashqaykiqa päsanqa ushanan tiempu chämuptinraqmi>>.

18Sayno parlapaykämaptinmi lätaraykashqächo desmayaskirqä. Sharkasimarmi 19nimarqan: <<Kananmi tantiyasishayki Tayta Dios rabyashpan castigashqan tiempu ima päsananpaq kashqantapis. Sayqa ushanan tiempuchömi kanqa.

20<<Ishkay waqrayuq carnita rikashqaykiqa Mediapa y Persiapa mandaqnin reykunami kaykäyan. 21Rikashqayki chïvuqa Grecia nacionpa mandaqnin reymi kaykan. Chïvupa urkuncho jatunkaray waqrata rikashqaykiqa Grecia nacionpa punta kaq mandaqnin reymi kaykan. 22Say waqra pakiptin chusku waqrakuna winayämushqanta rikashqaykiqa say nación chusku nacionman rakikänanpaqmi kaykan. Isanqa say nacionkunapa munaynin manami puntata kashqannönasu kanqa.

23<<Say chusku nacionkuna munayniynaq rikakuyaptin y runakunapa jusan ayparkuptinnami mana kuyapäkuq astütu runa rey kayman yaykunqa.#8.23 Say astütu runaqa Antíoco IV Epífanes jutiyuq reymi karqan. 24Say reyqa pasaypa munayyuqmi rikakunqa. Isanqa manami kikinpa munayninwansu sayno kanqa, sinöqa jukpa munayninwanmi. Caprïchunta rurarmi imaykatapis pasaypa ushakäsinqa. Saynölami munayyuqkunata y Tayta Diosman yärakuq santu runakunatapis ushakäsinqa.

25<<Pasaypa astütu kashpanmi pitapis engañanqa. Orgullösu kashpanmi aska runakunatapis elaqpita wanusinqa. Saynöpis mandaqkunapa mandaqnin Tayta Diospa contranmi sharkunqa. Sayno kaykashqanchömi castïguwan wanunqa. Say castïguqa manami runapitasu kanqa.

26<<Tutapa y tardipa sacrificiuta mana rupasiyänanpaq kashqanta revelashushqaykiqa rasunpaypami päsanqa. Isanqa ama pitapis sayta wilaysu. Aska wata päsarkuptinraqmi saykunaqa cumplikanqa>>.

27Sayno nimaptinmi noqa Daniel pasaypa mansarishpä kalpaynaq rikakur aska junaq qeshyarqä. Saypita aliyarkurnami rey nimashqanta yapay rurarqä. Isanqa say rikashqä imapaq kashqantapis mana tantiyarmi fiyupa lakikurqä.

Currently Selected:

Daniel 8: qvhB

Highlight

Copy