Daniel 7

Mansariypaq chusku uywakunata sueñuynincho Daniel rikashqan

1Babilonia nacioncho rey Belsasar juk wata mandaykaptinmi sueñuynincho revelacionta Daniel rikarqan. Rikashqankunata qelqaykurmi 2Daniel nirqan: <<Sueñuynïchömi rikashkä kay pasapa chuskun kuchunpita fiyupa wayrämuptin mansariypaq lamar yaku pulchaqyaykaqta. 3Say lamarpitami mansariypaq jukniraq jukniraq chusku jatusaq uywakuna yarqayämurqan.#Apoc. 13.1; 17.8.

4<<Punta kaq uywami karqan león niraq. Riprankunami#7.4 Wakin runakunaqa älankunami niyan. karqan ankapa ripranno. Rikaraykaptïmi riprankunata lukiriyarqan. Nirkurmi say uywata ichisiyarqan chakilanwan runano ichinanpaq. Saynöpis runano yarpachakunanpaqmi yarpayta qorqan.

5<<Ishkay kaq uywami ukumarya#7.5 Wakin runakunaqa ösu niyan. niraq karqan. Jukaqlä waqtanmi joqarikash kaykarqan. Shiminchömi amuraykarqan kimsa custillakunata. Say ukumaryatami nirqan: <¡Sharkur melanashqaykiyaq aysata mikuy!>

6<<Saypitanami rikarqä leopardu niraq uywata#Apoc. 13.2. waqtancho chusku riprayuq y chusku umayuq kaykaqta. Say uywami mandananpaq autoridä kayta chaskirqan.

7<<Saypitanami rikarqä chusku kaq uywata. Punta kaq rikashqä uywakunapita mas jukniraqmi karqan. Say uywa karqan pasaypa mansariypaq fiyu y kalpasapami. Waqunkunapis fiërrupita jatusaq kaptinmi pitapis tarishqan kaqtaqa mikur ushaq y pusupakushqan kaqtanami chipyaq jarukur ushaq. Say uywaqa chunka waqrayuqmi karqan.#Apoc. 12.3; 13.1.

8<<Say waqrankunata rikapaykaptïmi juk taksha waqra jeqamurqan. Say waqra winaptinmi kimsa kaq waqrankuna kiptukäkuyarqan. Say waqra karqan runapa nawinno nawiyuq y shimin tarishqantami pitapis ashliq.

Juzgananpaq trönuman Tayta Dios jamakushqan

9<<Saycho rikaraykaptïmi trönukunata kamariyarqan.

Juk trönumanmi imaypis kawaq Awkin jamakurqan.

Mödananpis rashtano seqaypa yuraqmi karqan.#Apoc. 1.14.

Aqsanpis yuraq milwano seqaypa yuraqmi karqan.#Apoc. 20.4.

Jamakunan trönun y trönunpa ruëdanpis rupaykaq ninanömi karqan.

10Paypa nawpanpitami bunyaypa bunyar nina yarquykarqan.

Waranqanpa waranqanpami payta sirviyarqan.

Yupaytapis mana atipaypaqmi nawpancho kayarqan.#Apoc. 5.11.

Juzgayta qalaykunanpaqmi librukunata kicharqan.#Apoc. 20.12.

11<<Say taksha waqra pitapis mansariypaq qayapashqanta wiyarmi mansakash rikaraykarqä. Sayno rikaraykaptïmi waqrayuq uywata wanusiyarqan. Nirkurnami pedäzu pedäzu kusuykur rupaykaq ninaman qaykuyarqan. 12Saynölami wakin kaq uywakunapa munaynintapis qechuyarqan. Qechurpis tiempun cumplishqanyaqlami kawaykaqta kachaykuyarqan.

Pukutay rurincho shamuq runa munayyuq rikakushqan

13<<Say sakaymi revelacioncho rikarqä runapa surinno jana pasapita pukutay janancho shamuykaqta. Paytami imaypis kawaq Awkinpa nawpanman pushayarqan.#Mat. 24.30; 26.64; Mar. 13.26; 14.62; Luc. 21.27; Apoc. 1.7, 13; 14.14. 14Say Awkinmi payta churarqan lapanta mandananpaq, lapanpaq munayyuq kananpaq y lapanpita respitash kananpaq. Saymi may markapita karpis, maysay nacionpita karpis y ima idiömata parlarpis payta sirviyarqan. Pay mandaykashqanqa imayyaqpis mana ushakaqmi kanqa. Munayyuq kashqantaqa manami pipis qechunqasu ni pipis ushakäsinqasu.#Apoc. 11.15.

15<<Noqa Danielmi saykunata rikar pasaypa mansarirqä. Rikashqäpita yarpachakur fiyupami lakikurqä. 16Saymi saycho ichiraykaqkunapa nawpanman witiykur jukninta manakurqä saykunapita tantiyasimänanpaq. Saymi tantiyasimar nimarqan: 17<Say chuskun jatusaq uywakunaqa chusku nacionkunami kaykäyan. Say nacionkunami munayyuq rikakur wakin nacionkunatapis munayninman churayanqa. 18Saypitanami munayyuq Tayta Diosman yärakuqkuna pay mandaykashqanta chaskiyanqa. Say mandashqanchömi imayyaqpis mana ushakaypa paykuna kayanqa>.#Apoc. 22.5.

19<<Saypitanami chusku kaq uywa imapaq kashqantapis musyayta munarqä. Say uywami imatapis sarishqan kaqtaqa pasaypa rachir mikurqan. Pusupakushqankunatapis jarukurmi usharqan. Waqunkunapis fiërrupita y shilunkunapis broncipitami karqan. Wakin uywakunapitapis mas jukniraq karmi seqaypa mansariypaq karqan.

20<<Saynöpis musyaytami munarqä say uywapa chunka waqrankuna imapaq kashqanta y taksha waqra imapaq winashqantapis. Say taksha waqra winaptin kimsa kaq waqrankuna kiptukaskiyarqan.Say waqra nawiyuqmi karqan. Saynöpis shimin tarishqantami imatapis parlaq. Saymi say waqra wakin kaq waqranpitapis mas espantaypaq karqan. 21Rikaraykaptïmi say waqra Tayta Diosman yärakuqkunata atacar vincirqan.#Apoc. 13.7. 22Sayno vincirqan imaypis kawaq Awkin shamur kuyashqan runakunapa favornin sharkushqanyaqmi.#Apoc. 20.4. Favornin sharkuptinnami Tayta Dios mandaykashqanta chaskikuyarqan.

23<<Saykunapita musyayta munaptïmi saycho ichiraykaq tantiyasimar nimarqan: <Say chusku kaq uywaqa juk nacionmi kaykan. Say nacionmi kay pasacho wakin nacionkunatapis munaynincho sararanqa. Wakin nacionkunapita mas jukniraq karmi jarukur lanquypa lanqur kay pasacho kaqkunata ushakäsinqa.

24<< <Say chunka waqrankunami say nacionpa chunka mandaqnin reykuna kaykäyan.#Apoc. 17.12. Paykuna wanuyaptinmi mas juk runa rey kayman yaykunqa. Paymi wakin reykunapitapis mas yaqa kashpan kimsa reykunata vincinqa. 25Saynöpis munayyuq Tayta Diospa contranmi parlanqa. Tayta Diosman yärakuqkunatapis fiyupami nakasinqa. Tayta Diospaq rurashqan fiestakunatapis y mandamientunkunatapis trukasiytami munanqa. Tayta Diosman yärakuqkunata kimsa wata soqta killami munaynincho sararanqa.#Apoc. 12.14; 13.5-6.

26<< <Sayno kaykaqta Tayta Dios juzgaptinmi say reyta munayyuq kashqanpita jorqur pasaypa ushakäsiyanqa. 27Saypitanami munayyuq Tayta Diosman yärakuqkuna kay pasacho lapan mandaqpitapis mas mandaq kayanqa. Saynölami munayyuqpitapis mas munayyuq kayanqa y respitash runapitapis mas respitash kayanqa. Tayta Dios mandaykashqan imaypis mana ushakaq kaptinmi kay pasacho lapan nacionkuna payta sirviyanqa>.

28<<Saytami sueñuynïcho rikarqä. Rikashqäkunapita yarpachakurmi noqa Daniel löcutar pasaypa almatakash rikakurqä. Isanqa say sueñushqäta manami pitapis wilaparqäsu>>.

Currently Selected:

Daniel 7: qvhB

Highlight

Copy