Daniel 6
6
Leonkuna wichqaraykashqanman Danielta jitarpuyashqan
1 1 (2) Nacionnin ali mandash kananta munarmi rey Darío churarqan juk pachak ishkay chunka (120) mandäsiqninkunata. 2 2 (3) Say mandäsiqninkuna imata ruraykäyashqantapis rikayänanpaqmi kimsa ministrukunata churarqan. Say kimsanpitami juk ministru Daniel karqan. Say ministrukunami mandäsiqnin runakunata imatapis rey nishqanta rurasiyaq.
3 3 (4) Wakin ministrukunapitapis mas tantiyakuq Daniel kaptinmi rey yarparqan lapan nacionta mandäsinanpaq. 4 4 (5) Sayta musyaykurmi wakin ministrukuna y mandäsiqkuna Danielpa contran sharkuyashpan ima achäquilatapis ashiyarqan imatapis jitapäyänanpaq. Sayno kaptinpis Danielqa cäsukuq karmi imatapis lutantaqa rurarqansu ni qelanarqansu. Saymi imatapis jitapayta kamäpakuyarqansu. 5 5 (6) Sayta tantiyarmi niyarqan: <<Manami imatapis tarishunsu payta jitapänansipaq. Diosninta adorashqanwanmi isanqa qarpurishun>>.
6 6 (7) Sayno nirmi ministrukuna y mandäsiqkuna comisionta kachayarqan reywan parlaq aywayänanpaq. Chaykurmi niyarqan: <<Tayta rey Darío, ¡qamla imayyaqpis rey kaykulay! 7 7 (8) Lapä autoridäkuna shuntakaykurmi wilanakuyashkä juk leyta rurasinaykipaq. Pipis qamta adorashunaykipa trukan juk diosta o juk runata adoraptinqa leonkuna wichqaräyashqanman qaykush kasun. Say ley kasun kananpita kimsa chunka (30) junaqyaq. 8 8 (9) Say leyta qelqarkur wilakasiy lapanpis cäsukuyänanpaq. Mandashqayki Media y Persia nacionkunapa leynincho nikashqanno say rurashqayki leyta manami pipis anulanqasu ni trukasinqasu>>.
9 9 (10) Sayno niyaptinmi leyta qelqarkasir rey Darío firmarqan. 10 10 (11) Say ley qelqaraykashqanta musyaykurmi Danielqa punushqan cuartunman wisarkur Jerusalénläpa kaq ventänata kicharqan. Nirkurnami waran waran kimsa kuti imaypis manakushqanno qonqurpakuykur Tayta Diosta manakur alabarqan.
11 11 (12) Say acusaq runakuna chaykurmi Danielta tariyarqan Tayta Diosta manakuykaqta. 12 12 (13) Sayno tariykurmi reyman aywaykur niyarqan: <<Tayta rey, musyashqaykinöpis qamta adorashunaykipa trukan ima diostapis o pï runatapis pipis adoraptinqa leonkuna wichqaräyashqanman qaykush kananpaqmi nishkanki. Kimsa chunka (30) junaq sayno kananpaqmi leyta maysaymanpis apasishkanki>>.
Saymi rey nirqan: <<Aw, sayno cumpliyänanpaqmi ordenashkä. Mediapa y Persiapa leyninkunacho nikashqanno say rurasishqä leyta manami pipis anulanqasu ni trukasinqasu>>.
13 13 (14) Niptinmi niyarqan: <<Judá nacionpita prësu apayämushqan Danielqa manami cäsukushunkisu ni firmashqayki leytapis respitansu. Pay kashlanmi waran waran kimsa kuti Diosninta manakuykan>>.
14 14 (15) Sayno niyaptinmi rey pasaypa mansakar imaykanöpapis Danielta salvayta munar qoyayninpa yarpachakurqan. 15 15 (16) Saymi yapay kutiykur say runakuna reyta niyarqan: <<Musyashqaykinöpis Mediapa y Persiapa leynincho nikashqanno say rurasishqayki leyta manami pipis anulanqasu ni trukasinqasu>>.
16 16 (17) Saymi leonkuna kayashqanman jitarpuyänanpaq rey ordenarqan. Nirkurnami Danielta rey nirqan: <<¡Yärakushqayki Diosniki salvaykuläshunki!>>
17 17 (18) Jitarpuskirmi jatun rumiwan punkuta saparkuyarqan. Danielta sentenciar cumpliyashqanta musyayänanpaqmi reypis y autoridäkunapis sëllayarqan. 18 18 (19) Nirkur palaciunman rey aywakurmi mikuytapis munarqansu ni müsicata tukapäyaptinpis wiyayta munarqansu. Saynölami warati punuytapis tarirqansu.
19 19 (20) Saka sakala sharkuskirmi leonkuna wichqaraykäyashqan kaqman rey warakayla aywarqan. 20 20 (21) Chaykashqanchömi pasaypa lakish qayakurqan: <<Imayyaqpis kawaq Diosta sirviq Daniel, imaypis sirvishqayki Dios ¿leonkunapita salvaykushushkankiku?>> nir.
21 21 (22) Qayakuptinmi Daniel nimurqan: <<¡Qamla imayyaqpis rey kaykulay! 22 22 (23) Jusaynaq kashqäta musyarmi angilninta Tayta Diosnï kachamush leonkunapa shiminta sapaptin mana mikayämänanpaq. Tayta rey, qampa contrayki manami imatapis rurashkäsu>>.
23 23 (24) Saymi seqaypa kushikushpan Danielta jukla jorqasimurqan leonkuna wichqaraykäyashqanpita. Jipiskamur rikayaptin manami leonkuna aspiylapis aspiyashsu kash. Sayno sänu karqan Tayta Diosman yärakuyninpami.
24 24 (25) Saypitanami Danielpa contran sharkuq runakunata, warminkunata y surinkunatapis leonkuna wichqaräyashqanman jitarpuyänanpaq rey prësu apasimurqan. Manaraqpis pampaman chäyaptinmi leonkunaqa achkupakur tulunkunatapis chipyaq qapchuchuyla ushayarqan.
25 25 (26) Saypitanami rey Darío juk leyta qelqarkur apasirqan may markacho y may nacioncho taqkunaman y ima idiömata parlaqkunamanpis. Say leychömi nirqan:
<<Qamkunacho ali kaway kaykuläsun. 26 26 (27) Noqami kanan ordenä mandashqä lapan nacionkunacho Daniel adorashqan Diosta mansapakur adorayänaykipaq.
Paymi imayyaqpis kawaq Tayta Dios kaykan.
Mandaq kashqan manami imaypis ushakansu.
Munayyuq kayninpis imaypis kaykanqami.
27 27 (28) Paymi rikamansi y ima peligrupitapis sapämansi.
Paymi jana pasacho espantaypaq kaqkunata rikakäsimun.
Kay pasachöpis milagrukunatami ruran.
Paymi leonkunapitapis Danielta sapash>>.
28 28 (29) Saymi Persia nacionpa mandaqnin rey Darío mandashqan wisan y rey Ciro mandashqan wisan Danielqa respitash karqan.
Currently Selected:
Daniel 6: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
