Daniel 5

Tapiacho juk maki qelqashqan

1Babiloniapa mandaqnin rey Belsasar fiestata rurarmi waranqa (1,000) mandäsiqkunata qayasirqan juntu mikuyänanpaq. Saychömi paykunawan vïnuta upuyarqan shinkäyashqanyaq. 2-3Shinkakurkurmi rey Belsasar ordenarqan papänin Nabucodonosor Jerusalén templupita apamushqan qori y qellay väsukunata apayämunanpaq. Saykunata apasimurqan mandäsiqninkunawan, warminkunawan y concubïnankunawan upyayänanpaqmi. Ordenashqanno apayämuptinmi say väsukunawan upyayarqan. 4Vïnuta upyapaylapami qoripita, qellaypita, broncipita, fiërrupita, qerupita y rumipita rurash diosninkunata alabayarqan.

5Say hörami palaciupa sälancho runapa makin elaqpita rikakämur mechëru asikyaykaq qepan yuraq tapiacho qelqarqan. Say qelqaykaq makita rikaykurmi 6rey pasaypa mansakar almatakaskirqan. Qonqurninpis pasaypa suksukyaptinmi ichiränanpaq kalpanpis karqansu. 7Saymi brüjukunata, qoyllar estudiaqkunata y rikakuqkunata qayaykasir rey nirqan: <<Mayqaykitapis kay qelqaraykaqta liyir ima nikashqantapis tantiyasimaq kaqtaqa fïnu granäti mödanatami jatipäshayki. Saynöpis qoripita rurash walqatami walqapäshayki. Nirkurmi noqawan juntu mandanaykipaq churashayki>>.

8Qayasishqan yachaq runakunaqa tapiacho qelqaraykaqta liyirpis manami tantiyayarqansu. Saymi reyta ima niytapis kamäpakuyarqansu. 9Saymi Belsasarqa fiyupa mansakar pasaypa almatakarqan. Mandäsiqninkunapis manami ima ruraytapis kamäpakuyarqansu.

10Rey y mandäsiqninkuna mansakar qaparäyashqanta wiyarmi maman reina yaykurqan mikuykäyashqanman. Saychömi reyta nirqan: <<¡Qamla imayyaqpis rey kaykulay! Ama mansakaysu ni almatakaysu. 11Kay mandaykashqayki nacionchömi juk runata lapan dioskuna shumaq yanapäyan. Papäniki Nabucodonosor mandaq kashqan wisanpis dioskunanöraqmi say runaqa imatapis shumaq tantiyakuq karqan. Saymi papäniki payta churarqan lapan musyakuqkunapa, brüjukunapa, qoyllar estudiaqkunapa y rikakuqkunapa mandaqnin kananpaq. 12Paypa jutin Daniel kaptinpis papänikimi trukasirqan Beltsasar jutin kananpaq. Danielqa imatapis shumaq tantiyakuq karmi runakuna sueñuyashqan imapaq kashqantapis musyan. Saynölami ima aja kaptinpis shumaq arreglananpaq tantiyan. Payta qayasimuy tapiacho qelqaraykashqan imata nikashqantapis tantiyasishunaykipaq>>.

13Sayno niptinmi Danielta qayaykasimur rey tapurqan: <<¿Qamku kaykanki Judá nacionpita papänï prësu apamushushqayki runa? nir. 14Qampaqmi wilayämash dioskuna shumaq yanapäyäshushqaykita. Sayshi shumaq tantiyaptiki imapis qampaq ajasu.

15<<Tapiacho qelqaraykaqta liyir imapaq kashqantapis niyämänanpaqmi yachaqkunata y brüjukunata qayasimushkä. Qelqaraykaqta liyirpis manami musyayansu imata nikashqantapis. 16Qampaqmi wilayämash aja tantiyaypaq kaqkunatapis tantiyashqaykita y mayjina aja kaptinpis shumaq arreglashqaykita. Saymi manakü tapiacho qelqaraykaqta liyir imapaq kashqantapis tantiyasimänaykipaq. Tantiyasimaptikiqa granäti mödanatami jatipäshayki. Saynöpis qoripita rurash walqatami walqapäshayki. Nirkurmi mandashqä nacioncho noqawan juntu mandanaykipaq churashayki>>.

17Sayno niptinmi Daniel nirqan: <<Say qaramänaykipaq kaqkuna kikikipaq kakusun o jukta qaraykuy. Kananmi tapiacho qelqaraykaqta liyir imapaq kashqantapis tantiyasishayki.

18<<Tayta rey, papäniki Nabucodonosorta munayyuq Tayta Diosmi yanaparqan maysay nacionkunata munayninman churananpaq, respitash kananpaq y mandaq kananpaqpis. 19Papäniki munayyuq karmi pitapis munashqan kaqta wanusiq y mana munashqan kaqtana wanusiqsu. Wakintana mas mandaq kananpaq churaq y wakintanami mandaq kashqanpita qarquq. Sayno munayyuq kaptinmi maysay nacionkunacho y lapan markakunacho taq runakuna ima idiömata parlaq karpis payta mansapakuyarqan.

20<<Saypitanami orgullösu rikakur munashqanta ruraptin mandaq kashqanpita Tayta Dios qarqurirqan. 21Runa mayinkunapita qarquriptinmi yarpayninpis uywapano rikakurqan. Saymi chucaru ashnukunawan juntu tashpan töruno qewata mikur kawarqan. Cuerpuntapis shulyami ushmarqan. Sayno kawarqan Tayta Diosla lapan mandaqkunapaqpis munayyuq kashqanta tantiyakushqanyaqmi. Tayta Dioslami nacionta mandananpaq pitapis munashqan kaqta churan.

22<<Taytay, Nabucodonosorpa surin kaykar sayno lapan päsashqanta musyaykarmi orgullösu rikakushkanki. 23Jana pasacho kaykaq Tayta Diosta rabyanäsirmi templuncho manijashqan väsukunata apaykasimur vïnuta upyayashkanki kikikipis, mandäsishuqnikikunapis, warmikikunapis y concubïnaykikunapis. Nirkurmi alabashkanki qoripita, qellaypita, broncipita, fiërrupita, qerupita y rumipita rurash dioskunata. Say dioskunaqa manami rikayansu ni wiyayansu ni imatapis musyayansu. Munayyuq Tayta Diostami isanqa alabashkankisu. Payta rabyanäsishkanki paypitaraq lapantapis chaskiykarmi. Paymi rey kanaykipaqpis churashushkanki.

24<<Saymi makita Tayta Dios kachamush tapiacho qelqananpaq. 25Say qelqasishqanmi nikan: <Yupash, yupash, pësash, rakish>.#5.25 Arameo idiömachöqa nikan <<Mene, Mene, Tekel, Uparsin>>. 26<Yupash> nikan mandaq kashqayki junaqkuna yupashla kaptinmi. Say junaqkuna saylachöna ushakänanpaqmi Tayta Dios nish. 27<Pësash> nikan balanzacho Tayta Dios pësashuptiki pësuyki pasaypa pishiptinmi.#5.27 Pësuyki pasaypa pishiptin ninanqa pasaypa jusayuq kaptiki ninanmi. 28<Rakish> nikan mandashayki nacionta rakiskir Media y Persia runakunapa makinman churananpaq destinash kaptinmi>>.

29Sayno wilaptinmi Belsasarqa yanapaqninkunata nirqan granäti mödanata Danielta jatipäyänanpaq y qoripita rurash walqatapis walqapäyänanpaq. Saynöpis paywan juntu mandananpaqmi churarqan.

30Say sakaymi Babilonia#5.30 Hebreo idiömachöqa Caldea ninmi. Caldeaqa Babiloniapa jukaq jutinmi kaykan. runakunapa mandaqnin rey Belsasarta wanusiyarqan. 31 31 (6.1) Nirkurmi Mediapita kaq rey Darío Babilonia nacionta munayninman churarqan. Sayno rurarqan soqta chunka ishkay (62) watayuq kaykarmi.

Currently Selected:

Daniel 5: qvhB

Highlight

Copy