Daniel 4

Jatunkaray jachata rey Nabucodonosor sueñushqan

1 1 (3.31) Rey Nabucodonosormi maysay markakunaman, nacionkunaman y ima idiömata parlaq runakunamanpis cartakur nirqan:

Qamkunacho ali kaway kaykuläsun. 2 2 (3.32) Munayyuq Tayta Diosmi espantaypaq kaqkunata rurashpan shumaq tantiyasimash. Sayta musyayänaykipaqmi kay cartata apaykäsimü. 3 3 (3.33) ¡Pay rurashqanqa espantaypaqmi kaykan! ¡Milagru rurashqanpis kushikuypaqmi kaykan! ¡Paymi imayyaqpis mandaq kaykan! ¡Munayyuq kashqanqa imaypis manami ushakansu!

4 4 (1) Noqa Nabucodonosormi yarpashqäno lapanpis ali kaptin palaciücho kushish ali kawarqä. 5 5 (2) Juk sakay punuykashqächo mana alita sueñupäkuykurmi pasaypa mansakarqä. 6 6 (3) Saymi Babiloniacho lapan yachaq runakunata qayasirqä sueñushqä imapaq kashqantapis tantiyasiyämänanpaq. 7 7 (4) Musyakuqkuna, brüjukuna, qoyllarta estudiaqkuna y rikakuqkuna chaykayämuptinmi wilarqä sueñushqäta. Wilaptïpis manami tantiyasimayta kamäpakuyarqansu.

8 8 (5) Saypitanami Daniel chämurqan. Paypa jukaq jutinmi kaykan Beltsasar. Sayno jutinta churapashkä adorashqä diospa jutin kashqanno kananpaqmi. Payta lapan dioskuna yanapäyaptinmi imata sueñushqätapis wilar nirqä: 9 9 (6) <<Beltsasar, yachaq runakunapa mandaqnin kaptikimi musyä lapan dioskuna yanapäyäshushqaykita. Saymi qampaqqa imapis ajasu kaykan imata sueñushqätapis y sueñushqä imapaq kashqantapis wilamänaykipaq.

10 10 (7) <<Cämächo punuykarmi sueñuynïcho rikashkä kay pasa chawpincho jatunkaray jacha ichiraykaqta. 11 11 (8) Say jacha winaylanta rakuyar copösuyaptinmi ñökankunapis jana pasayaq chash. Saymi maysaymanpis rikakash. 12 12 (9) Say jachapaqa raprankunapis kuyaylapaqmi kash. Lapan runakuna mikuyänanpaqmi wayuyninpis saysika kash. Lapan jirka uywakunapis jachapa chakinchömi lantukuyash. Saynölami rämankunachöpis pishqukuna qeshunkunata rurayash. Say jachapa wayuynintami lapan uywakunapis mikuyash.

13 13 (10) <<Cämächo punuraykashqächömi sueñuynïcho rikashkä jana pasapita juk ángel uraykämuqta. 14 14 (11) Say angilmi qayakamur nimurqan: <Say jachata muturiyashpayki lapan rämankunata lawmayay. Raprankunatapis chipyaq sipichayay. Wayuyninkunatapis tapshiriyay. Saycho lantukuykaq uywakunatapis lapanta qarquyay. Pishqukunapis qeshunkunata kachariykur aywakuyäsun. 15 15 (12) Troncunta isanqa jaqwantinta#4.15 Wakin runakunaqa sapintinta o japintinta niyanmi. jinalancho fiërru y bronci cadinakunawan wataykuyay. Qewakunapa chawpilancho uywakunawan iwal kawasun. Shulyapis jinalancho ushmasun. 16 16 (13) Yarpayninpis uywapa yarpayninno rikakur qanchis watayaq sayno kasun>.

17 17 (14) <<Sayno kananpaq kaqtami angilkuna wilakuyash. Sayno päsaptinmi pïmaypis musyayanqa lapan mandaqkunapitapis Tayta Dios mas munayyuq kashqanta. Paymi nacionta mandananpaq pitapis munashqanta churan. Munarqa mas humildi kaqtapis mandaq kananpaq churanmi.

18 18 (15) <<Saykunatami noqa Nabucodonosor sueñushkä. Beltsasar, kanan wilamay imapaq saykunata sueñushqätapis. Kay mandashqä nacioncho manami mayqan musyakuqkunapis tantiyasimayta kamäpakuyansu. Lapan dioskuna yanapäshuptiki qammi isanqa tantiyasimanki>>.

Rey Nabucodonosor imapaq sueñushqantapis Daniel wilashqan

19 19 (16) Sayno wilashqä mansariypaq kaptinmi Beltsasar jutiyuq Daniel juk hörano pasaypa chiyakash wiyaräkurqan. Saymi nirqä: <<Beltsasar, ama mansakaysu say sueñushqäpita>>.

Sayno niptïmi Daniel nimarqan: <<Say sueñushqaykikuna contraykikunata päsananpaq kaykuläsun, taytay. 20-22 20-22 (17-19) Sueñuynikicho rikashqayki jachaqa kikikimi kaykanki. Say jacha winaylanta rakuyashqannömi qampis munayyuq rikakushkanki. Copösuyaptin rämankuna jana pasayaq chashqannömi qampis munayyuq rikakur jana pasacho kaykaq angilno kaykanki. Jachapa raprankuna kuyaylapaq kashqanno y wayuyninkuna lapan runakuna mikuyänanpaq aska kashqannömi qampis aska runakunata yanapaykanki. Jirka uywakuna jachapa lantuynincho lantukuyashqanno y rämankunacho pishqukunapis qeshunkunata rurayashqannömi lapan runakunapis munaynikicho kaykäyan. Say jacha kay pasacho maysaymanpis rikakashqannömi lapan nacionkunapis makikicho kaykäyan.

23 23 (20) <<Saynöpis sueñuynikicho rikashkanki jana pasapita wilakuq ángel uraykämuqtami. Paymi nirqan: <Say jachata muturir lapanta ushakäsiyay. Troncunta isanqa jaqwantinta jinalancho kachaykuyay. Nirkur fiërru y bronci cadinakunawan watarkur jirkacho qewakunapa chawpilancho kachaykuyay. Shulyapis jinalancho ushmasun. Uywakunawan iwal kawasun qanchis wata päsashqanyaq>.

24 24 (21) <<Tayta rey, munayyuq Tayta Dios sueñuynikicho rikasishushqaykiqa qamta päsashunaykipaqmi kaykan. Kanan wilashayki say sueñushqayki imapaq kashqantapis. 25 25 (22) Runakuna täyashqanpita qarquyäshuptikimi uywakunawan juntu kawanki. Törunömi qewata mikunki y shulyami ushmashunki. Qanchis watami sayno kanki Tayta Dios lapanpaq munayyuq kashqanta tantiyakushqaykiyaq. Paymi pitapis munashqan kaqta mandaq kananpaq churan.

26 26 (23) <<Jaqwantin troncu jinalancho quëdashqanqa mandaq kayman kutinaykipaq kashqanmi kaykan. Sayno kutinki Tayta Dios lapanpaq munayyuq kashqanta tantiyakushqayki hörami.

27 27 (24) <<Sayno mana päsashunaykipaq kanan yäsishayki, tayta rey. Jusalikuykunata kacharir runa mayikita shumaq rikay. Yaqa kayta kacharir pobrikunata yanapay. Sayno rurashpayki capazchir alipis kawaykunkiman>>.

28 28 (25) Daniel wilamashqannölami lapanpis päsamarqan. 29 29 (26) Say sueñushqäpita juk wata päsarkuptinnami Babiloniacho kaykaq palaciücho puriykar 30 30 (27) nirqä: <<¡Noqami munayyuq kar kay jatunkaray Babilonia markata sharkasishkä mandashqä nacionkunapa capitalnin kananpaq! Saynöpami maysay nacioncho munayyuq kashqäta musyayanqa>>.

31 31 (28) Parlaytapis manaraq ushaptïmi jana pasapita kayno nimushqan wiyakämurqan: <<Rey Nabucodonosor, nishqäta shumaq wiyamay. Kananpitaqa mananami reynasu kanki. 32 32 (29) Runakuna täyashqanpita qarquyäshuptikimi uywakunawan juntu kawanki. Törunömi qewata mikunki. Qanchis watami sayno kanki Tayta Dios lapanpaq munayyuq kashqanta tantiyakushqaykiyaq. Paymi pitapis munashqanta mandaq kananpaq churan>>.

33 33 (30) Jinan hörami nimushqanno yarpaynï upatakaskirqan. Saymi runakuna täyashqanpita qarqayämaptin törukunano qewata mikur qalaykurqä. Cuerpütapis shulyami ushmamarqan. Aqsäpis ankapa plümanno y shilüpis ankapa shilunnömi winarqan.

34 34 (31) Qanchis wata päsarkuptinmi noqa Nabucodonosor ciëlupa nukirkur Tayta Diosta perdonta manakurqä. Saymi yapay juiciüman kutirkur imayyaqpis kawaq munayyuq Tayta Diosta alabarqä y agradëcikurqä.

Mandaq kayninqa mana ushakaqmi kaykan.

Mandaq kaynintaqa manami pipis qechunqasu.

35 35 (32) Paypaqqa mayqan nacionpis manakaqlami kaykan.

Tayta Diosqa jana pasachöpis y kay pasachöpis munashqantami imatapis ruran.

Paytaqa manami pipis sapata churapansu.

Paytaqa manami pipis <<¿imanirtaq sayno ruraykanki?>> nir reclamansu.

36 36 (33) Say hörami nawpata kashqäno juiciüman kutirkurqä. Mandaq kayman yapay kutir nawpata munayyuq kashqänömi yapay munayyuq karqä. Saynami nawpata mandäsimaqkunapis yanapäyämänanpaq yapay kutiyämurqan. Trönüman kutiykurmi punta kashqäpita mas munayyuq rikakurqä. 37 37 (34) Saymi noqa Nabucodonosor jana pasacho kaykaq Tayta Diosta alabä. Pay rurashqanqa lapanpis alimi kaykan. Yachaq tukuqkunataqa penqaymanmi churan.

Currently Selected:

Daniel 4: qvhB

Highlight

Copy