Daniel 11

Siria nacionpa y Egipto nacionpa mandaqnin reykuna pelyayänanpaq kashqanta wilashqan

1Mastapis lïnu mödanash runa nimarqan: <<Media nacionpita kaq rey Darío juk watana mandaykänan wisanpis noqami ángel Miguelta yanapar shakyäsirqä.

2<<Kanan wilapäshayki imapis päsananpaq kaqkunata. Persia nacionchömi kayanqa kimsa reykuna. Paykunapa qepanmanpis mas juk reyraqmi kanqa. Say reymi kimsa kaq reykunapitapis mas rïcu kanqa.#11.2 Say reypa jutinmi karqan Jerjes. Paymi wata 480 a. C.-cho aska soldädukunawan Grecia nacionta vinciyta munarpis kamäpakurqansu. Rïcu kashpan munayyuq rikakurmi lapan mandashqan nacionkunawan Grecia nacionpa contran sharkuyanqa.

3<<Saypitanami mas munayyuq rey kanqa.#11.3 Say reyqa karqan Grecia nacionpa mandaqnin rey Alejandro Magnumi (336-323 a. C.). Paymi maysay nacionkunata vinciykur munaynincho sararanqa. 4Saynöpami aska nacionkunata juklayla kananpaq shuntanqa. Saypitanami chusku nacionman rakikanqa. Juk kanqa norti kaqläpa, juk kanqa sur kaqläpa, juk kanqa inti jeqamunan kaqläpa y juk kanqa inti jeqanan kaqläpa.

<<Say reypa trukan manami paypita miraqkunasu mandaq kayanqa, sinöqa jäpa runakunami. Paykunaqa manami say rey munayyuq kashqannönasu kayanqa. 5Sayno kaptinpis Egipto nacionpa mandaqnin rey#11.5a Egipto nacionpa mandaqninmi karqan Tolomeo I Sóter (323-285 a. C.). munayyuq rikakuptin soldädunkunapa capitanninmi paypita mas munayyuq rikakunqa.#11.5b Say capitanqa Seleuco I Nicátor jutiyuqmi karqan. Paymi Siria nacionpa mandaqnin rey rikakurqan. Sayno karmi aska markakunata munaynincho sararanqa.

6<<Saypita watakuna päsarkuptinnami Egipto nacionpa mandaqnin reyqa Siria nacionpa mandaqnin reywan ali kawayänan kash jipash surinta paywan majasakäsinqa. Sayno majasakäsiptinmi say warmita traicionpita wanusinqa wawantinta, runantinta y cuidaq soldäduntinta.#11.6 Say warmipa jutinmi karqan Berenice. Majasakashqan reypa jutinmi karqan Antíoco II Teos. Bereniciwan majasakänanpaqmi Antíoco II rakikarqan punta kaq warmin Laodicipita. Saymi pasaypa rabyashpan paykunata Laodice wanusirqan. 7Sayno wanusiptinmi say wanuq warmipa turin soldädunkunawan aywanqa Siria nacionpa mandaqnin reywan pelyananpaq. Murallash markaman yaykushpanmi vinciykur munayninman churanqa. 8Nirkurnami Egiptupa kutikur ïdulukunata y qellaypitawan qoripita rurash alhäjakunata apakunqa. Saypitaqa Siria nacionpa mandaqnin reywan aska wata manami wajupänakuyanqasu.

9<<Saypitanami Siria nacionpa mandaqnin rey aywar Egipto nacionpa mandaqnin reyta soldädunkunawan atacanqa. Sayno karpis vinciyta mana kamäpakuskirmi markanpa kutikunqa.

10<<Saypitanami surinkuna kamarikuyanqa Egiptuman kutir yapay atacayänanpaq. Saysika soldädukunata shuntaykurmi warakayla aywayanqa imaykatapis apaq cargash mayuno. Reypa murallash markanman chaykurmi atacayanqa. 11Saynami fiyupa rabyashpan Egipto nacionpa mandaqnin rey soldädunkunawan pelyananpaq yarqamunqa. Jina kaqtami vincinqa saysika soldäduyuq kaykaptinpis. 12Vincirkurnami say reyqa pasaypa ali chölu tukushpan contrankunata waranqanpa waranqanpa wanusinqa. Sayno karpis say reyqa walka tiempulami munayyuq kanqa.

13<<Watakuna päsarkuptinnami Siria nacionpa mandaqnin rey yapay shuntanqa aska soldädukunata. Say soldädukunaqa mas aska y mas ali kamarikushqami kayanqa. Paykunawanmi kutinqa Egipto nacionpa mandaqnin reyta atacananpaq.

14<<Say wisanmi Egipto nacionpa mandaqnin reypa contran askaq sharkuyanqa. Saynölami achäquita ashipäkuq Israel mayikikunapis paypa contran sharkuyanqa. Sayno sharkurpis mana vinciyaptinmi revelacioncho Tayta Dios tantiyasishqan cumplinqa.

15<<Siria nacionpa mandaqnin reynami soldädunkunawan aywaykur murallash marka waqtanman alpata qotuyanqa saypa yaykuykur atacayänanpaq. Atacaptinmi Egipto nacionpa soldädunkuna mayjina ali chölu karpis ichipayta kamäpakuyanqasu. 16Saynöpami atacaq aywaq soldädukuna say markata chipyaq ushakäsiyanqa. Nirkurmi kuyaylapaq Israel naciontapis munayninman churayanqa.

17<<Saypitanami Siria nacionpa mandaqnin reyqa Egipto nacionta imanöpapis vinciyta munar say nacionpa mandaqnin reywan warmi surinta majasakäsinqa. Sayno majasakäsinqa warmi surin rikapakurir wilaptin atacayta yarparmi. Sayno majasakäsiptinpis manami yarpashqannösu kamakanqa.

18<<Saymi Siria nacionpa mandaqnin rey jukläpa aywar#11.18a Say reyqa Asia provincialäpami aywarqan. lamar kuchuncho kaykaq aska markakunata vincinqa. Jina kaqtami juk nacionpita shamuq capitán#11.18b Say capitanqa Romapitami karqan. vincinqa. Saymi say reyqa pasaypa penqaytukush rikakunqa. 19Saypitanami kutikunqa murallash markanman. Saychömi desgracia päsaptin wanur ushakanqa.

20<<Say reypa trukannami juk rey yaykunqa. Paymi mandashqan nación mas munayyuq kananta munar impuestuta cobramunanpaq runata kachanqa. Guërra mana kaykaptinmi manapis aykälatana say reypis wanunqa.

Siria nacioncho yaqa runa rey kashqan

21<<Say reypa trukannami yaqa runa lulakuypa yaykunqa rey kananpaq.#11.21 Say runaqa Antíoco IV Epífanes jutiyuq reymi karqan. Sayno yaykunqa rey kananpaq mana töcaykaptinmi. 22Cargash mayu imaykatapis apaqnömi contran sharkuq runakunata lapanta wanusinqa. Nirkurmi wanusinqa Tayta Diosta sirviq mandaq cüratapis.#11.22 Say runaqa Onias III mandaq cürami karqan. Wata 171 a. C.-chömi payta wanusiyänanpaq Antíoco IV mandarqan. 23Say reyqa tukuyta promitiypami y engañaypami munayyuq rikakunqa. Sayno rikakunqa walkaqla runakuna favornin kayaptinmi.

24<<Say runami rïcu runakuna täyashqan markakunaman soldädunkunawan elaqpita yaykuyanqa imaykankunatapis apakuyänanpaq. Manami say nacioncho mayqan mandaqpis payno rurayta kamäpakushsu. Saynöpis guërracho vincirkur apashqankunatami yanapaqninkunata aypunqa. Pasaypami yarpachakunqa murallash markakunata imanöpapis atacananpaq. Sayno kaptinpis juk tiempulami sayno kanqa.

25<<Say reyqa kalpanman atiënikuykurmi Egipto nacionpa mandaqnin reyta aska soldädunkunawan atacanqa. Sayno atacaptinmi Egipto nacionpa mandaqnin reyqa aska soldädukunata shuntaykur ichipäyanqa. Sayno ichiparpis yärakushqan runakuna traicionaptinmi vinciyta kamäpakuyanqasu. 26Mikur upur shuntakäyashqan amïgunkunapis ushakänantami munayanqa. Say pelyachömi saysika soldädunkuna wanuyanqa.

27<<Saypitanami say ishkan reykuna wilanakuyänanpaq qorikarpis shonqulankunacho mana alita yarpaykäyanqa. Sayno kaptinpis ushakäyänanta Tayta Dios manaraq munaptinmi say reykuna munayashqannöqa kamakanqasu.

28<<Siria nacionpa mandaqnin reynami guërrapita shuntashqan riquëzakunata apakurkur markanpa kutikunqa. Markanman kutiqnömi Tayta Diosta adoraqkunata atacanqa. Sayno yarpashqankunata ruraskirmi markanman chanqa.

29<<Desgracia päsananpaq höra chämuptinmi say reyqa Egipto nacionta yapay atacanqa. Puntata vincish karpis manami yapay vincinqanasu. 30Sayno vincinqasu Quitimpita#11.30 Kay textucho Quitimpaq parlarqa Roma nacionpaqmi parlarqan. soldädukuna büquinkunawan shayämushpan ichipäyaptinmi.

<<Saymi ima ruraytapis mana kamäpakur fiyupa rabyashpan markanpa kutiykashqancho Diosta adoraqkunata yapay atacanqa. Diosta mana adoraqkunawanmi isanqa kuyanakuyanqa. 31Soldädunkunami templuman yaykur impüruyäsiyanqa.#11.31 Templuta impüruyäsin Tayta Dios prohibishqanta saycho rurarmi. Saypita masta musyanaykipaq liyinki Lev. 20.3; 21.12; Núm. 19.13, 20. Sacrificiuta Tayta Diospaq cürakuna waran waran rupasiyänantapis manami kachapanqanasu. Saypa trukanqa Tayta Dios pasaypa mana munashqan kaqtami templuman churanqa.#Mat. 24.15; Mar. 13.14.

32<<Yanapäyänanta munarmi say reyqa Tayta Diosta manana cäsukuqkunata tukuyta promitir engañanqa. Tayta Diosman yärakuqkunami isanqa mana mansariypa payta ichipäyanqa. 33Saymi tantiyakuq runakuna aska runakunata yäsiyanqa Tayta Diosta imaypis sirviyänanpaq. Sayno kaptinpis wakintami espädawan wanusiyanqa, wakintami rupasiyanqa, wakintami prësu apakuyanqa y wakinpatanami imaykantapis qechur apakuyanqa. 34Sayno nakaykäsiyaptinmi wakin runakunaqa say tantiyakuq runakunata yanapäyanqa. Wakinmi isanqa janan shonqula paykunawan shuntakäyanqa.

35<<Wakin tantiyakuq runakunata nakasiyaptinmi tantiyakuyanqa imano nakarpis Tayta Diosman yärakur mana jusalikuypa kawayänanpaq. Tantiyakuqkuna sayno nakayanqa tiempun cumplishqanyaqmi.

36<<Say reyqa munashqantami ruranqa. Saymi runa tukushpan lapan dioskunapita mas munayyuq kashqanta yarpar#2Tes. 2.3-4. lapanpaq munayyuq Tayta Diospa contran espantaypaq kaqkunata parlanqa.#Apoc. 13.5-6. Sayno kaptinpis Tayta Dios castigashqan hörayaqlami munayyuq kanqa. Päsananpaq kaqkunaqa päsanqami.

37<<Say reyqa ima diostapis mana respitarmi cäsupanqasu unay ayllunkuna adorayashqan dioskunata ni warmikuna adorayashqan dioskunatapis. Saypa trukanqa yarpanqa lapan dioskunapitapis mas munayyuq kashqantami. 38Isanqa unay ayllunkuna mana adorayashqan diostami adoranqa. Say diosqa murallash markakunata cuidaq diosmi kaykan. Payta adorananpaqmi apanqa qorita, qellayta, kuyaylapaq rumikunata y kuyaylapaq adornukunata.

39<<Unay ayllunkuna mana adorayashqan diosman yärakurmi ali murallash munayyuq markata atacanqa. Vincirkurmi favornin sharkuq runakunata churanqa aska markakunacho gobernador kayänanpaq. Saynölami yanapäyashqanpita kushikur chakrakunatapis qoykunqa.

40<<Höra chämuptinnami say reyta Egipto nacionpa mandaqnin rey atacanqa. Sayno atacaqtami cargash mayu imaykatapis apaqno carrëtankunawan, cawallun loqash#11.40 Wakin runakunaqa muntash niyan. soldädunkunawan y aska büquinkunawan atacar intëru nacionta vincinqa.

41<<Saynöpis Israel nacionman yaykurmi saysika runakunata wanusinqa. Edomcho y Moabcho taq runakunami isanqa Amóncho taq saysika runakunawan makipita qeshpiyanqa.

42<<Saynöpis say reyqa munayninmanmi churanqa aska nacionkunata. Egipto nacionpis manami qeshpinqasu. 43Nirkurmi Egiptupita apakunqa qorita, qellayta y lapan riquëzankunatapis. Munayninmanmi churanqa Libia nacionta y Etiopía naciontapis.

44<<Saypitanami inti jeqamunan kaqlächo y norti kaqlächo contran sharkuyashqanta wilayanqa. Saymi fiyupa rabyashpan contran sharkuqkunata pïmaytapis wanusiyta munar soldädunkunawan aywanqa. 45Lamarpita kuyaylapaq sagrädu lömaman aywaq nänichömi campamentunta sharkasinqa. Saycho kaykaptinmi pipis mana yanapaptin payta wanusiyanqa>>.

Currently Selected:

Daniel 11: qvhB

Highlight

Copy