Daniel 10

Chipipiykaq runata revelacioncho Daniel rikashqan

1Kimsa watana Persia nacionpa mandaqnin rey Ciro kaykaptinmi Beltsasar jutiyuq Danielta Tayta Dios revelarqan. Say revelacioncho wilashqankuna rasunpaypa päsananpaqmi kaykan. Aja tantiyay kaptinpis imapaq kashqanta Daniel tantiyarqanmi.

2Say wisanmi noqa Daniel yarpachakur kimsa semäna fiyupa lakikurqä. 3Sayno lakikurmi ali mikuyta ni aysatapis mikurqäsu ni vïnutapis upurqäsu ni perfümitapis winakurqäsu.

4Punta kaq killacho#10.4 Punta kaq killapa jutinmi karqan Nisán. Nisán killaqa aybësis qalaykun marzu ushanan junaqkunacho y aybësis qalaykun abril qalaykunan junaqkunacho. Say killachömi Israel runakuna Pascua fiestata y Levadüraynaq Tantata Mikuna fiestata rurayarqan. Say fiestakunapita masta musyanaykipaq liyinki Éxo. 12.1-20. ishkay chunka chusku (24) kaq junaqchömi Tigris mayu kuchuncho kaykarqä. 5Nukirkushqächömi rikarqä lïnu fïnu mödanash runa nawpächo ichiraykaqta. Paypa wachkunmi fïnu qoripita rurash karqan. 6Cuerpunpis berilo ruminöraqmi chipipirqan. Qaqlanpis elqukuynöraqmi chipipirqan. Nawinkunapis aksinöraqmi asikyarqan. Rikrankuna y chakinkunapis chipipiykaq broncinömi karqan. Aska runakuna parlaykaqnöraqmi parlashqanpis wiyakarqan.#Apoc. 1.13-15; 19.12.

7Noqa japalämi say revelacionta rikarqä. Noqawan kaykaq runakunaqa manami imatapis rikayarqansu. Mana rikarpis pasaypa mansarirmi pakakuyarqan. 8Say revelacionta rikashqä höra manami pipis walkimarqansu. Pasaypa almatakaptïmi kalpaqpis karqansu. 9Parlashqanta wiyarmi pitir pasaman uksikaypa ishkirqä.

10Say hörami nukirkasimaptin qonqurpakuykur suksukyashpä maki paltaläwan tuknakurqä.#10.10 Wakin runakunaqa tawnakurqä niyan. 11Saymi nimarqan: <<Daniel, sharkuy. Tayta Dios kuyashushpaykimi qamwan parlanäpaq kachamash. Kanan nishqäta shumaq wiyamay>>.

Sayno nimaptinmi suksukyaykar ichirkurqä. 12Saymi nimarqan: <<Daniel, ama mansariysu. Revelación rikashqaykita tantiyanaykipaq manakuyta y ayunayta qalaykushqayki junaqpita pasami Tayta Dios wiyashushkanki. Saymi shamushkä tantiyasinäpaq.

13<<Ishkay chunka juk (21) junaqmi Persia nacionpa mandaqnin ángel saparämash. Angilkunapa mandaqnin Miguel yanapämänanpaq shamuptinmi#Apoc. 12.7. Persia nacionpa mandaqnin angilwan pelyananpaq saycho kachaykushkä. 14Revelacionta rikashqaykiqa kaykan Israel runakunata ultimu tiempucho päsananpaq kaqkunami. Sayta tantiyasinäpaqmi shamushkä>>.

15Sayno parlapämaptin imatapis mana parlakuylapami uysuräkurqä. 16Sayno kaykaptïmi juk runa niraq elaqpita yurirkamur shimïta yataykamarqan. Saymi parlapaykämaq runata nirqä: <<Revelacionta rikashqäpita fiyupa lakikuptïmi kalpaqpis kannasu, taytay. 17Parlanäpaqpis manami valornï kannasu. Wanuy wanuytanami rikchakuykä>>.

18Saymi say runa niraq yapay yataykamaptin valornï yurirkurqan. 19Nirkurmi nimarqan: <<Tayta Dios kuyaykäshuptikiqa ama mansariysu. ¡Valorta sariy!>>

Sayno parlapaykämaptinmi kalpä yurirkurqan. Saymi nirqä: <<Taytay, kananqa valornï kannami parlapämashqaykita wiyanäpaq>>.

20Saymi nimarqan: <<Imapaq shamushqätapis ¿musyankiku? Kananqa Persia nacionpa mandaqnin angilwan pelyanäpaqmi kutishaq. Saypitanami Grecia nacionpa mandaqnin ángel shamunqa. 21Say mandaq angilkunawan pelyaptï qamkunata sapäshuqniki ángel Miguelmi yanapäman. Paypita masqa manami pipis yanapämänanpaq kansu. Pelyaq manaraq aywarmi Libru de la Verdadcho ima qelqaraykashqantapis tantiyasishayki>>.

Currently Selected:

Daniel 10: qvhB

Highlight

Copy