Amós 7
7
Revelacioncho chukluskunata Amós rikashqan
1Reypa cosëchanta shuntayta ushaskir kikinkunapa cosëchanta manaraq shuntayta qalaykuyaptinmi Tayta Dios revelacioncho rikasimarqan saysika chukluskunata kay pasaman kachamunanpaqna kamariykashqanta.#Joel 1.4; 2.2-11. 2Say chukluskuna lapan qewakunata ushaykäyaqtana rikasimaptinmi ruwakur nirqä: <<Tayta Dios, perdonaykayälämay. Mana perdonayämaptikiqa Jacobpita miraqkuna walka kaqlanpis lapächir ushakäyäshaq>>.
3Saymi Tayta Dios kuyapämashpan nimarqan: <<Ruwakaykämaptikiqa chukluskunata manami kachamushaqsu>>.
Revelacioncho ninata Amós rikashqan
4Saypitanami Tayta Dios revelacioncho rikasimarqan Israel nacionta ninawan castigashqanta. Say ninami pasa rurinpita pashtamuq yakuta sakisir intëru Israel nacionta usharqan.#Joel 1.19-20.
5Sayta rikarmi ruwakur nirqä: <<Tayta Dios, ama sayno ushakaykasiyälämaysu. Mana perdonayämaptikiqa Jacobpita miraqkuna walka kaqlanpis lapächir ushakäyäshaq>>.
6Saymi Tayta Dios kuyapämashpan nimarqan: <<Ruwakamashqaykipita manami saytapis rurashaqsu>>.
Revelacioncho plomädata Amós rikashqan
7Saypitanami revelacioncho Tayta Diosta rikarqä perqa murälla nawpancho plomädan aptash runa ichiraykaqta. 8Saymi tapumar nimarqan: <<Amós, ¿imatataq rikaykanki?>>
Nimaptinmi nirqä: <<Albañilpa plomädantami rikaykä, Taytay>>.
Saymi nimarqan: <<Plomädawan murälla derëchu o wiksu kashqantapis musyayashqaykinömi Israel runakuna imano kawayashqantapis musyashaq. Jusalikur kawayashqanpita mananami mas perdonashaqnasu.
9<<Isaacpita miraqkuna#7.9 Isaacpita miraqkunaqa Israel runakunami kaykäyan. rurasiyashqan altarkunatami ushakäsishaq.
Israel nacioncho lapan capillakunatapis juchusishaqmi.
Espädäta aptakurkurmi aywashaq rey Jeroboampita miraqkunata ushakäsinäpaq>>.
Cüra Amasías profëta Amóspa contran sharkushqan
10Amós sayno wilakuptinmi Bet-elcho kaq cüra Amasías Israel runakunapa mandaqnin rey Jeroboamman wilakasir nirqan: <<Qampa contrayki parlarmi Amós puriykan. Israel runakuna pay nishqanta cäsupäyaptinqa nacionninsi ushakanqami. 11Pay puriykan kayno nirmi: <Jeroboamqa espädawan wanusishqami kanqa. Saynöpis Israel runakunata juk nacionmanmi prësu apakuyanqa> >>.
12Saypitanami Amósta cüra Amasías nirqan: <<¡Profëta, kaypita jukla aywakuy! Wilakushqaykiwan gänapakuyta munarqa Judá nacionman kutiykur saycho wilakuy. 13Kay Bet-elcho Israel nacionpa templun kaptinmi reypis Diosta adoraq shamun. Sayno kaykaptinqa kaycho ama wilakuysu>>.
14Sayno niptinmi Amós nirqan: <<Noqa manami profëtasu ni profëtapa surinsu kä, sinöqa uyshakunata misipakur y munti hïguskunata shuntalar kawaqmi kä. 15Uyshakunata misikur puriykaptïmi Tayta Dios nimarqan: <Israel runakunaman aywar wilakuynïta wilapay>. 16Kanan shumaq wiyamay Tayta Dios qampaq nishqanta.
<<Qam nikanki: <Israel runakunapa contran ama wilakuysu.
Isaacpita miraqkunapaq imatapis ama parlakuysu>.
17<<Saymi Tayta Dios nin:
<Warmikimi kay markacho prostitüta rikakunqa.
Warmi surikikunata y olqu surikikunatami espädawan wanusiyanqa.
Chakraykikunatapis suertita jitayashpanmi rakipänakuyanqa.
Kikikinami Diosta mana cäsukuqkuna täyashqan nacioncho wanunki.
Israel mayikikunatami karu nacionman prësu apakuyanqa> >>.
Currently Selected:
Amós 7: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
