Amós 3
3
Israel y Judá runakunata Tayta Dios juzgananpaq nishqan
1Israel y Judá runakuna, Egiptupita jorqamushuqniki Tayta Dios nishqanta wiyayay:
2<<Kay pasacho saysika runakuna kaykäyaptinpis qamkunalatami akrashkä kuyashqä runakuna kayänaykipaq.#Deut. 7.6.
Saymi jusalikuyashqaykipita castigayäshayki>>.
3Maypa iläyänanpaqpis ilaq mayinwan puntata wilanakunraqmi.
4Leonpis munticho qaparan uywata mikunanpaq tarirraqmi.
León malwapis machayninpita chikikamun mikunanpaq sarirraqmi.
5Pishqukunapis trampaman ishkiyan ima mikuytapis churapashqaraqmi.
Ima trampapis juchun uywa yaykuptinraqmi.
6 Cornëtatapis tukayan markacho imapis mansakaypaq kaptinraqmi.
Saynölami markacho ima desgraciapis päsan Tayta Dios castigaptinraq.#Job 2.10; Isa. 45.7.
7Sirviqnin profëtakunata manaraq wilarqa Tayta Dios manami imatapis mansariypaq kaqkunata ruransu.#Gén. 18.17-19; Jer. 7.25; Dan. 9.10.
8León qaparashqanta wiyar ¿piraq mana mansakunmansu?
Tayta Dios nishqanta wiyar ¿piraq mana wilakunmansu?#Jer. 20.9; 1Cor. 9.16.
9Wilakuqkuna, Asdod markaman aywaykur nishqäta palaciuncho reyta wilapäyay.
Egiptumanpis aywaykur nishqäta palaciuncho reyta wilapäyay.
Wilapar niyanki:
<<Samaria markaman y nawpan lömakunaman lapayki shayämuy.
Saychömi rikayanki markacho lutanta ruraykäyaqta y mana kuyapaypa runakunata nakaykäsiyashqanta.
10Paykunaqa ali kaqta rurayta manami yachayansu.
Suwakuyashlantami palaciunkunachöpis sararaykäyan>>.
11Sayno kayashqanpitami Samaria runakunata Tayta Dios nin:
<<Contraykikuna maysaypita shamurmi atacayäshunki.
Amparakuyänaykipaq sharkasiyashqayki jatusaq perqa murällakunatapis lapantami juchusiyanqa.
Palaciuykikunapitapis lapan tariyashqantami apakuyanqa>>.
12 Tayta Diosmi nin:
<<Uyshata leonpa shiminpita qechuptin chakilanpis o rinrilanpis quëdashqannömi Samariacho taq Israel runakunapis walkaqla quëdayanqa.
Damascupita rantiyämushqan kuyaylapaq sillëtacho jamaraq runakunapis walkaqlami quëdayanqa>>.
13Lapanta mandaq Tayta Diosmi nin:
<<Nishqäta shumaq wiyayay.
Jacobpita miraq lapan runakunata wilar niyay:
14<Jusalikuyashqanpita Israel runakunata juzganä junaq Bet-elcho kaykaq altarkunata lapantami ushakäsishaq.#2Rey. 23.15.
Ushakäsiptïmi altarpa esquïnancho kaykaq waqrankunapis pakikar pasaman shikwayanqa.
15Usya wisan täyänanpaq rurasiyashqan wayitapis y tamya wisan täyänanpaq rurasiyashqan wayitapis lapantami juchusishaq.
Marfilwan adornash wayikunatapis lapantami juchusishaq.
Lapan ali wayikunatami ushakäsishaq> >>.
Tayta Diosmi sayno nin.
Currently Selected:
Amós 3: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
