Amós 2
2
Moab nación runakunata Tayta Dios juzgananpaq nishqan
1 Tayta Diosmi nin:
<<Moab nacioncho taq runakunapa jusankuna seqaypa poqushnami kaykan.#Isa. 15.1—16.14; 25.10-12; Jer. 48; Eze. 25.8-11; Sof. 2.8-11.
Paykunaqa Edom nacionpa mandaqnin reypa tulunkunata uchpayashqanyaqmi rupasiyarqan.
Sayno rurayashqanpitami fiyupa castigashaq.
2Saymi imaykatapis nina rupar ushashqanno Moab nacionta y Queriotcho palaciukunatapis ushakäsishaq.
Pelyacho qapararraq cornëtanta tukaykäyaptinmi moabita runakunata soldädukuna wanusir ushakäsiyanqa.
3Say nacionpa mandaqnin reytapis ushakäsishaqmi.
Mandäsiqninkunatapis wanusishaqmi>>.
Tayta Diosmi sayno nin.
Judá nación runakunata Tayta Dios juzgananpaq nishqan
4 Tayta Diosmi nin:
<<Judá nacioncho taq runakunapa jusankuna seqaypa poqushnami kaykan.
Paykunaqa mandamientükunata y leynïkunata mana cäsukurmi unay ayllunkuna adorayashqan ïdulukunata adoraykäyan.
Sayno rurayashqanpitami fiyupa castigashaq.
5Saymi imaykatapis nina rupar ushashqanno Judá nacionta y Jerusaléncho palaciukunatapis ushakäsishaq>>.#Ose. 8.14.
Israel nación runakunata Tayta Dios juzgananpaq nishqan
6 Tayta Diosmi nin:
<<Israel runakuna, qamkunapapis jusaykikunaqa seqaypa poqushnami kaykan.
Qamkunaqa jusaynaq runakunatami rantikuykäyanki.
Lanqipa chaninnöla jaqayki kaykaptinpis muchuq runakunata ashmay kayänanpaqmi rantikuykäyanki.
Sayno rurayashqaykipitami fiyupa castigayäshayki.
7Pobrikunata y humildikunatami munayashqaykita ruraykäsiyanki.
Juez kaykarpis manami quejakuyashqanta arreglayankisu.
Wakinnikiqa taytaykiwan say warmilatami manijaykäyanki.
Sayno rurar santu jutïta manakaqmanmi churaykäyanki.
8Prenda kachapäyäshushqayki mödana jananchömi altarkuna nawpanchöpis punuykäyanki.#2.8 Prendata kachapashqan mödanata pasa sakaptin kutisinanpaq nishqanta musyanaykipaq liyinki Éxo. 22.26-27; Deut. 24.12-13.
Saynöpis manakaqlapita condënata pägasiyashqayki vïnutami juk dioskunata adorayashqayki capillakunacho upyaykäyanki.
9<<Qamkunata kuyarmi amorreo runakunata ushakäsishkä.#2.9a Egiptupita Canaánman Israel runakuna charmi Tayta Dios yanapaptin amorreo runakunata ushayarqan. Nirkurmi paykuna täyashqan markakunacho Israel runakuna täyarqan.#Deut. 3.8-11.
Cedru qerukunano jatusaq kaykaqta y encina jachakunano anku kaykaqtami say runakunata asulashkä.
Jachapa wayuynintapis jaqwantapis#2.9b Wakin runakunaqa sapintapis o japintapis niyanmi. elaqäsiqnömi elaqäsishkä.
10Amorreo runakuna täyashqanman chäyänaykipaq kikïmi Egiptupita qamkunata jorqamurqä.
Kikïmi chusku chunka (40) wata sunyaq jirkakunapa pushamurqä amorreo runakuna täyashqan markakunata qoykunäpaq.#Éxo. 20.2; Deut. 8.2-16.
11Surikikunapitami wakinta akrashkä profëta kayänanpaq.
Wakintanami akrashkä nazareo runa kayänanpaq.#Núm. 6.1-8.
Israel runakuna, ¿manaku sayno kananpaq kamakäsishqäta tantiyakuyanki?>>
Tayta Diosmi sayno nin.
12<<Sayno akraptïpis qamkunaqa nazareo runakunata mana munaykaqtami vïnuta upusiyashkanki.
Saynölami profëtakunatapis michäyashkanki wilakuynïta mana wilakuyänanpaq.
13Sayno kayashqaykipitami wankayla chaqnash carrëta imatapis jarushqan kaqtaqa pakir ushashqanno qamkunatapis ushakäsiyäshayki.
14Noqapa makïpitaqa mayjina cörriq kayashpaykipis manami qeshpiyankisu.
Ni kalpasapa kayashpaykipis defiendikuyta manami kamäpakuyankisu.
Ni mayjina geniuyuq kayashpaykipis manami salvakuyankisu.
15Flëchayta munarpis manami kamäpakuyankisu.
Shiwyayla cörriq karpis manami ayqiyta kamäpakuyankisu.
Cawalluta loqakurkur#2.15 Wakin runakunaqa muntakurkur niyanmi. qeshpiq karpis manami salvakuyankisu.
16Say junaqqa mayjina geniuyuq karpis armaykikunata kachariykurmi qeshpiyankipaq>>.
Tayta Diosmi sayno nin.
Currently Selected:
Amós 2: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
