2 Corintios 5

Mushuq cuerputa chaskinansipaq nishqan

1Musyansimi kay cuerpunsi ushakaptinpis mana ushakaq mushuq cuerputa Tayta Dios qomänansipaq kashqanta. Kay pasachöqa cuerpunsi ushakaq suklanölami kaykan. Gloriachömi isanqa mushuq cuerpunsi Tayta Dios rurashqan ali wayinöna kanqa. 2Kay pasacho kawashqansiyaqqa mushuq cuerputa jukla chaskikuyta munarmi yarpachakur lakikunsi. 3Mushuq cuerputa chaskikurqa manami qarapächunösu kashun, sinöqa ali mödanashnönami.

4Kay pasacho cuerpunsi ushakaqla kaptin lakikurpis manami wanuyta munansisu, saypa trukanqa cuerpunsi mana ushakaq cuerpuman jukla tikranantami munansi. 5Mana ushakaq cuerpuyuq kanansipaqmi Tayta Dios kamamashkansi. Mushuq cuerputa chaskinansipaq kashqanta musyanansipaqmi Espíritu Santuta qomashkansi.

6Saymi Tayta Diosman imaypis yärakunsi. Musyansimi kay pasacho kashqansiyaqqa Tayta Diosta manaraq rikashqansita. 7Payta manaraq rikarpis paymanmi yärakunsi. 8Payman yärakurmi cuerpunsita kacharir nawpanman jukla chayta munansi. 9Saymi kawarpis o wanurpis imaypis yarpachakunsi Tayta Diospa shonqunpaqno kawanansipaq.

10Jesucristupa nawpanman chaptinsi lapansitami juzgamäshun.#Rom. 14.10. Kay pasacho kashqansiyaq alita o mana alita rurashqansiman tupumi premiutapis o castïgutapis chaskishun.

Tayta Dioswan runakuna amistayänanpaq wilakuyashqan

11Señor Jesucristo juzgamänansipaq kashqanta musyarmi payta mansapakur wilakuyninta imaykanöpapis wilakuykäyä. Rasunpaypa payta sirviykäyashqäta Tayta Dios musyanmi. Saytaqa qamkunapis tantiyayankimanmi. 12Sayno nikä manami yachaq kayashqäta sumäsirsu, sinöqa Tayta Diospa wilakuqnin kayashqäta tantiyar kushikuyänaykipaq y pipis conträ parlaptin favornï sharkuyänaykipaqmi.

Say conträ sharkuqkunaqa yachaq tukurpis janan shonqulami Tayta Diosta sirviyan. 13Löcu kayashqäta niyaptinpis Tayta Diosta sirviyänä raykumi löcu nishqapis kaykäyä. Ali yarpayyuq kayashqäta niyaptinpis qamkunata yanapäyänä raykumi ali yarpayyuq kaykäyä. 14Imano niyämaptinpis noqakunaqa Jesucristo kuyamashqansita tantiyarmi wanuy kaway payta sirviyä. Sayno sirviyä Jesucristo lapansi rayku wanushqanta musyarmi. Noqansi rayku wanuptinmi lapansipis jusalikuypaq wanushnöna kaykansi. 15Manami kikinsi munashlansita rurar kawakunansipaqsu Jesucristo wanush, sinöqa pay munashqannöna kawanansipaqmi. Payqa wanurpis noqansi raykumi kawarimush.

16Sayno kaptinmi Diosman mana yärakuq runakunanöqa pipaqpis lutanta yarpäyäsu. Nawpataqa noqakunapis mana yärakuq runakunanölami Jesucristupaq lutanta yarpäyarqä. Kananqa manami saynönasu yarpäyä. 17Pipis Jesucristucho karqa mushuq kamash runanami kaykan.#Gál. 6.15; Efe. 4.24; Tito 3.5; 1Ped. 1.3, 23. Unay kawayqa päsashnami. Kananqa lapanpis mushuqnami kaykan.

18Sayno kanansipaq kikin Tayta Diosmi kamakäsish. Paymi Jesucristo noqansi rayku wanuptin perdonamashkansi. Saynöpis lapan runakuna paywan amistayänanpaqmi wilakuyninta wilakuyänäpaq churayämash. 19Say wilakuyqa kaynömi nikan: Jesucristuchömi Tayta Dios karqan runakunata jusalikuyashqanpita perdonar kikinwan amistananpaq. Say wilakuyta wilakuyänäpaqmi churayämash.

20Saymi noqakunaqa Jesucristupa wilakuqninkuna kaykäyä. Wilakuqnin karmi Tayta Dios ruwakuykaqno Jesucristupa jutincho pïmaytapis kayno nir ruwakuyä: ¡Tayta Dioswan amistakuy! 21Jusaynaq kaykaptinpis lapan jusansitami Jesucristuta Tayta Dios jitapash. Saymi jusayuq runano noqansi rayku wanuptin paycho kaptinsi jusaynaqtano Tayta Dios chaskimansi.

Currently Selected:

2 Corintios 5: qvhB

Highlight

Copy

Compare