1 Corintios 4

Wawqi panikunata yachasinanpaq apóstol Pablo munayyuq kashqan

1Wawqi panikuna, Tayta Diospa wilakuyninta wilakur Jesucristupa sirviqlan kayashqäta tantiyakuyay. 2Ali sirviqqa yärakuypaqmi kanman. 3Saymi Jesucristuta mana sirvishqäta yarpäyaptikipis o wakin runakuna sayno yarpäyaptinpis lakiküsu. 4Noqapa tantiyakuynïpitaqa Jesucristuta alimi sirviykä. Sayno kaptinpis manami ali sirvishqäta tantiyashqäpitasu Tayta Dios <<alimi sirvimashkanki>> nimanqa, sinöqa ali sirvishqäta kikin tantiyarmi.

5Sayno kaykaptinqa manaraqpis hörancho pitapis ama juzgayaysu. Señor Jesucristo kutimurnami pakaylapa rurashqansikunata y shonqulansicho yarpashqansitapis juzgamäshun. Say höraraqmi ali o mana ali sirviqnin kashqansitapis nimäshun.

6Wawqi panikuna, Tayta Diospa palabrancho qelqaraykaqta cäsukuyänaykipaqmi Apoluspita y kikïpita kay cartacho nikämü. Cäsukurqa manami jukaq yachasishuqnikipa favornin sharkur jukaqpa contran sharkuyankimansu.#4.6 Sayno nirqa kikinta y Apolusta iwal-la chaskikuyänanpaq kashqantami nirqan. Sayno rurarqa yachaq tukuykäyankimi. 7Yachasishuqnikikunata sayno juzgayänaykipaqqa ¿pitaq kaykäyanki? Tantiyaq kayashqaykipis ¿manaku Tayta Diospita kaykan? Tayta Diospitaraqmi lapantapis chaskiyashkanki. Sayno kaykaptinqa ¿imanirtaq kikilaykikunapita tantiyaq kayashqaykita yarpar alabakuykäyanki?

8Qamkuna maynami lapan munayashqaykita chaskiyashkanki ¿aw? Maynami rïcu kaykäyanki ¿aw? Noqakuna manaraq chäyämuptïpis Jesucristuwan mandaykäyashqaykitami yarpäyanki ¿aw? Mandäsiyänäpaq ¡alimi kanman rasunpaypa mandayaptiki!

9Tantiyaynïpitaqa lapanpitapis mas nakayänäpaqmi apóstol kayman Tayta Dios churayämash. Imayka lutan ruraq runatanöpis noqakunata wanusiyämaytami munayäman. Sayno nakayashqätaqa lapan runakunapis angilkunapis rikaykäyämanmi. 10Qamkunaqa Jesucristuta sirvir aläpa yachaq y tantiyaq kayashqaykitami nikäyanki. Noqakunatami isanqa Jesucristuta sirviyaptï upatano rikayäman. Qamkunaqa puëdiq kayashqaykitami nikäyanki. Noqakunatami isanqa imatapis rurayta mana puëdiqtano rikayäman. Qamkunataqa alimi rikayäshunki. Noqakunatami isanqa mana väliq runakunatano rikayäman.

11Kananyaqpis noqakunaqa mikanar, yakunar, aläsikur y maqar ushashqami puriyä. Wayiläkunapis kikïkunapaqa manami kansu. 12Nistäyashqäkunapaq utikäyashqäyaqmi arukuyä.#Hech. 18.3. Runakuna ashliyämaptinpis Tayta Diostami manakuyä bendicionninta qonanpaq. Chikiyämaptinpis mana resientikuypami puriyä. 13Washäkunata rimayaptinpis ali shimiläpami parlapäyä. Kananyaqpis pasaypa mana väliqtano y manakaqtanömi rikayäman. 14Manami qamkunata penqayman churanäpaqsu sayno nir qelqaykämü, sinöqa kuyay surïtano yäsirmi.

15Chunka waranqa (10,000) yachasishuqnikikuna kayaptinpis Jesucristuta chaskikuyänaykipaq juklaylami puntata wilapäyäshushkanki. Say wilapäshuqnikiqa noqami kaykä. Saynöpami qamkunapa taytaykino kaykä. 16Saymi qamkunata yäsï noqa kawashqäno qamkunapis kawayänaykipaq.#1Cor. 11.1; Fil. 3.17. 17Qamkuna kaqcho imano kawashqätapis yarpäsiyäshunaykipaqmi Timoteuta kachamushkä. Imayka kuyay surïnömi pay kaykan. Saynöpis payqa Tayta Dios munashqannömi kawaykan. Lapan iglesiakunachöpis yachasishqänömi shumaq yachasiyäshunki.

18Wakinnikiqa mana kutimunäpaq kaqta yarparshi seqaypa yachaq tukuykäyanki. 19Sayno yarpäyaptikipis Tayta Dios munaptinqa watukaq shamushaqmi. Saychönami say yachaq tukuqkuna musyayämanqa. Paykunaqa mä rasunpakush Tayta Diospa munayninwan ruraykäyan o kikinpa yarpaylanpitakush parlaykäyan. 20Tayta Dios mandaykashqancho kawayqa manami yachaq tukur parlashqansisu, sinöqa pay munashqanta rurar kawashqansimi. 21¿Imano chämunätataq munayanki? ¿Rabyash chämunätaku o kushish chämunätaku?

Currently Selected:

1 Corintios 4: qvhB

Highlight

Copy

Compare