1 Corintios 5

Madrastanwan punuq runata qarquyänanpaq Pablo yäsishqan

1Qamkunacho juk runa madrastanwan taykashqantami musyashkä. Paywan tarqa pasaypa penqakuypaq fornicación jusatami jusalikuykan. Sayno runataqa Jesucristuta mana chaskikuq runakunapis seqaypami jamuräyan.#Deut. 22.30. 2Sayno kaykaptinqa ¿imanirtaq penqakuyankisu? Penqakuyänaykipa trukan kushikuykäyankimi. Say niraq runataqa ¿imanirtaq shuntakäyashqaykipita qarquyankisu?

3Qamkuna kaqcho mana kaykarpis nawpaykicho kaykaq japuymi kaykä. Saymi say runataqa mayna juzgashkä. 4Señor Jesucristupa jutincho shuntakäyaptiki noqapis qamkunawan kaykaq japuymi kaykäshaq y munayyuq Jesucristupis qamkunawanmi kaykanqa. 5Sayno kaykaptinqa say runata Satanáspa munayninman kachapaykuyay. Saycho nakar jusanta kachariptinraqmi Señor Jesucristo kutimur salvanqa.

6Say runata mana qarqurqa alabakurpis mana alitami ruraykäyanki. ¿Manaku musyayanki say jusaqa walka levadürala mäsata jakasishqanno kashqanta?#Gál. 5.9. 7Sayno kaykaptinqa qamkunacho kaykaq levadürata jitariqno say runata qarquyay. Saynöpami mushuq mäsapita rurash levadüraynaq tantano kayankipaq.#5.7 Pascua fiesta qalaykunanpaqmi Israel runakuna levadürata wayinkunapita jitarir levadüraynaq tantata rurayaq. Say costumbriman tinkusirmi wawqi panikunata Pablo nirqan jusalikuq runata shuntakäyashqanpita qarquyänanpaq. Shuntakäyashqancho jusalikuq runa mana kaptinnami mushuq mäsapita rurash levadüraynaq tantano wawqi panikuna kayanqa. Pascua carnishno Jesucristo [noqansi rayku] wanusish kaptinmi rasunpaypa levadüraynaq tantano kayanki.#Éxo. 12.15; 13.7; Deut. 16.3. 8Sayno kaykaptinqa Pascua fiestata rurar levadürata jitariqno jusalikuykunata y mana ali ruraykunata kacharishun. Sayno kacharir Tayta Diospa wilakuynin nishqanman tupu kawashun.

9Puntata cartakamushqächöpis#5.9 Say cartaqa oqrakashqami kaykan. Maycho kashqantapis manami musyansisu. maynami nishkä fornicación jusata jusalikuq runakunawan mana shuntakäyänaykipaq. 10Manami lapan sayno kawaq runakunapita witikuyänaykipaqsu sayno nikä. Saynöpis manami lapan wachakash runakunapita, suwakunapita y ïdulukunaman yärakuq runakunapita witikuyänaykipaqsu nikä. Paykunawan mana shuntakarqa ¿mayparaq aywayankiman? 11Sayno kaptinpis wakin runakunaqa <<Jesucristumanmi yärakü>> nikarmi fornicación jusacho kayan, imapaqpis wachakash kayan, ïdulukunaman yärakuyan, runapa washanta rimayan, borrächu kayan y suwakuyan. Paykunawan mana shuntakäyänaykipaqmi nikä. Paykunawanqa mikuyänalaykipaqpis ama shuntakäyaysu.

12Noqansi manami munayyuqsu kansi Jesucristuman mana yärakuqkunata juzganansipaq. Jesucristuta chaskikuq mayinsikuna jusalikuyaptinmi isanqa juzganansipaq y corriginansipaqpis munayyuq kaykansi. 13Jesucristuta mana chaskikuq runakunataqa kikin Diosmi juzganqa. Jesucristuta chaskikuq mayikikunata corrigiyänaykipaq munayyuq kaykarqa madrastanwan kakuq runataqa qarquyay. Saynöpami mana ali ruraykuna qamkunacho kanqasu.#Deut. 13.5; 17.7; 19.19.

Currently Selected:

1 Corintios 5: qvhB

Highlight

Copy

Compare