1 Corintios 3

Mana rimanakuypa kawayänanpaq nishqan

1Wawqi panikuna, sayno kaptinpis Espíritu Santu munashqanno mana kawayaptikimi Jesucristuta mana chaskikuq runakunatano qamkunata yachasirqä. Qamkunaqa pishi wamranölaraqmi kayarqayki. 2Mikuyta manaraq yachaq wamrata chuchulawan maman ashmashqannömi noqapis qamkunata qalaykunan kaq yachasikuykunalatarä yachasirqä. Kananyaqpis mana tantiyakuq karmi pishi wamranölaraq kaykäyanki.#Heb. 5.12-13. 3Chikinakur y rimanakur kawayashpayki ¿manaku Jesucristuta mana chaskikuq runakunanöla kawaykäyanki? 4Wakinnikishi nikäyanki: <<Noqakuna Pablutami qatiräyä>>. Y wakinnikinashi nikäyanki: <<Noqakunaqa Apolustami qatiräyä>>. Sayno niyashpayki ¿manaku Diosta mana cäsukuq runakunanöla kaykäyanki?#1Cor. 1.12.

5Sayno niyänaykipaqqa ¿pitaq Apolos? Saynöpis ¿pitaq noqa kä? Noqakunaqa Tayta Diosta sirviq runakunalami kayä. Tayta Dios churayämashqanno sirviyaptïmi Jesucristuta chaskikuyashkanki. 6Muruta muruq runanömi qamkunata wilapashkä Jesucristuta chaskikuyänaykipaq.#Hech. 18.4-11. Apolusnami mururaykaqta parquq japuy Jesucristupa wilakuyninta masta tantiyasiyäshushkanki.#Hech. 18.24-28. Muruta winasimuq japuymi Tayta Dios qamkunata shumaq tantiyasiyäshushkanki Jesucristuman yärakuyänaykipaq. 7Manami muruq kaqsu ni parquq kaqsu muruta winasimun, sinöqa Tayta Diosmi.

8Muruq kaqpis parquq kaqpis chakra ali wayunanpaqmi aruyan. Tayta Diosnami muruq kaqtapis parquq kaqtapis aruyashqanman tupu päganqa. 9Noqapis Apoluspis Tayta Diospa aruqninkunalami kaykäyä. Qamkunanami Tayta Dios aruykäsishqan chakrano kaykäyanki.

Saynöpis Tayta Dios sharkaykäsishqan wayinömi kaykäyanki. 10Tayta Dios kuyapämar churamash kaptinmi ali yachaq albañil sutashqan cimientuno arushqäkuna kaykan. Say cimientu janancho juk albañil perqata sharkasishqannömi wakin runakunapis aruyan. Isanqa shumaq tantiyakuyäsun imano aruyashqantapis. 11Manami pipis cimientu sutashna kaykaqta jitariykur juk cimientuta churanmansu. Jesucristumi cimientu kaykan.

12Wakin runakunaqa Tayta Dios munashqanno kawar say cimientu jananman qoriwan, qellaywan o kuyaylapaq chipipiykaq rumikunawanpis wayita sharkasishnömi kaykäyan. Wakin runakunanami isanqa Tayta Diosta mana cäsukur qeruwan, oqshawan o rämakunawanpis wayita sharkasishno kaykäyan. 13Mayqanwan sharkasishqapis juiciu final junaqnami lapan arushqansipita Tayta Dios juzgamäshun. Say junaq juzgamashpansimi lapan rurashqansikunata ninawan probanqa. 14Cimientu janancho sharkasishqansikunata nina mana ushaptinqa premiutami chaskishun. 15Cimientu janancho sharkasishqansikunata nina ushaptinmi isanqa ima premiutapis chaskishunsu. Sayno kaptinmi wayita nina rupaptin runa qeshpir salvakushqanno noqansipis salvakushun.

16¿Manaku musyayanki Tayta Diospa templun kayashqaykita? ¿Manaku musyayanki Espíritu Santu qamkunacho taykashqanta?#1Cor. 6.19; 2Cor. 6.16. 17Tayta Diospa templunta ushakäsiq kaqtaqa#3.17 Diospa templun payman yärakuqkuna kaptinmi templunta ushakäsinsi payman yärakuqkunata chikinakasir, jusalikasir o lutanta criyisir. Tayta Diosmi ushakäsinqa. Qamkunaqa Tayta Diospa templun karmi santu kaykäyanki.

18Shumaq tantiyakuyay. Wakinnikimi yarpäyanki Diosta mana chaskikuq runakunano yachaq kayashqaykita. Rasunpaypa yachaq kayta munarqa paykuna yarpäyashqanno ama yarpäyaysu. 19Diosta mana chaskikuq runakuna yachaq kayashqanqa Tayta Diospaq manakaqlami kaykan. Palabranchöpis kaynömi qelqaraykan:

<<Yachaq kashqanta runa yarpaptinpis manami rasunpaypasu yachaq kashqanta musyasin>>.#Job 5.13.

20Saynöpis kaynömi qelqaraykan:

<<Tayta Dios musyaykanmi yachaqkuna imata yarpäyashqantapis.

Pay musyaykanmi manakaqkunalaman umankuna churakash kayashqanta>>.#Sal. 94.11.

21Sayno nikaptinqa ama alabakuyaysu <<noqaqa Apoluspa o Pablupa qatiraqninmi kä>> nir. Tantiyakuyay lapanpis qamkunapana kashqanta. 22Saymi noqapis, Apoluspis, Cefaspis, kay pasapis, kawaypis, wanuypis, kanan tiempupis y shamuq kaq tiempupis qamkunapana lapan kaykan. 23Qamkunanami Jesucristupa kaykäyanki. Jesucristunami Tayta Diospa kaykan.

Currently Selected:

1 Corintios 3: qvhB

Highlight

Copy

Compare