1 Corintios 2

Jesucristo cruzcho wanushqanta Pablo wilakushqan

1Wawqi panikuna, qamkuna kaqman shamur manami yachaq runakuna parlayashqannösu ni paykuna yarpäyashqannösu Tayta Diospa wilakuyninta yachasirqä. 2Sayno yachasinäpa trukanqa Jesucristo noqansi rayku cruzcho wanushlantami yachasirqä.

3Qamkunaman chämur mana tantiyasinäpaq kashqanta yarparmi fiyupa lakikurqä. 4Yachaq runakuna parlayashqanno y yarpäyashqanno yachasinäpa trukanqa Espíritu Santupa munayninwanmi yachasirqä. 5Tayta Diospa munayninwan yachasiptï manami runakuna yachaq kayninmansu yärakuykäyanki, sinöqa Tayta Diosmanmi.

Tayta Dios yarpashqankunata Espíritu Santu tantiyasishqan

6Yachaq runakuna yarpäyashqanno mana yachasirpis Tayta Diospa wilakuyninta shumaq tantiyakurmi payman yärakuqkunata yachasï. Tayta Diospa wilakuyninqa manami yachaq runakuna ni munayyuq runakuna yarpäyashqannösu kaykan. Say runakunaqa ushakaqlami kaykäyan. 7Diospa yachayninta yachasiyashqäqa runakuna mana musyayashqanmi kaykan. Say yachaynintami imapis manaraq kaptin Tayta Dios churarqan gloriacho kushish kawanansipaq. 8Kay pasacho mandaqkunaqa manami mayqanpis sayta tantiyayarqansu. Tantiyarqa manami munayyuq Señor Jesucristuta cruzcho wanusiyanmansu karqan. 9Mana tantiyayashqantami Tayta Diospa palabranchöpis kayno qelqaraykan:

<<Pipis mana rikashqanta

ni mana wiyashqanta

ni mana yarpashqantami

kuyaqninkunapaq Tayta Dios kamarish>>.#Isa. 64.4.

10Say kamarishqantaqa Espíritu Santuwanmi Tayta Dios musyasimashkansi. Espíritu Santu lapanta musyarmi Tayta Dios yarpashqankunatapis musyan. 11Runa imata yarpashqanta shonqun musyashqannömi Espíritu Santupis Tayta Dios imata yarpashqantapis musyaykan. 12Noqansiqa manami kay mundupa espïrituntasu chaskishkansi#2.12 Sayno nirqa Pablo kaynömi nirqan: Manami Diosta mana chaskikuq runakuna yarpäyashqannösu yarpansi ni paykuna kawayashqannösu kawansi., saypa trukanqa Tayta Dios kachamushqan Espíritu Santutami. Saynöpami musyansi Tayta Dios salvamashqansita.

13Qamkunataqa manami runakunapita yachakushqätasu wilapaykä, saypa trukanqa Espíritu Santu tantiyasimashqantami. Saymi Espíritu Santuta chaskikush kayaptiki paypa yarpayninkunata tantiyaykäsï. 14Espíritu Santuta mana chaskikuqkunaqa paypa yarpayninkunata manami chaskiyansu. Paykunapaqqa upa yarpaylami kaykan. Espíritu Santu mana tantiyasiptinmi tantiyayta kamäpakuyansu. 15Espíritu Santuta chaskikuqkunami isanqa yachasishqankuna ali kashqanta tantiyar chaskikuyan. Imanir chaskikuyashqantapis wakinqa manami tantiyayansu. 16Tayta Diospa palabranchöpis kaynömi qelqaraykan:#2.16 Kay textuta yarpäsir Pablo kaynömi tantiyasirqan: Tayta Diosta runakuna juzgayta mana puëdiyashqannömi pay munashqanno kawaq runakunatapis juzgayta puëdiyansu. Saynölami Jesucristupa wilakuyninta wilakushqäpita noqatapis juzgayämanmansu.

<<Tayta Dios yarpashqankunata ¿pilaqa musyansuraq?

Yachaq kananpaq ¿pilaqa payta yachasinsuraq?>>#Isa. 40.13; Rom. 11.34.

Noqansipa yarpayninsimi isanqa Jesucristupa yarpayninno kaykan.

Currently Selected:

1 Corintios 2: qvhB

Highlight

Copy

Compare