1 Corintios 14

Mana tantiyayashqan idiömapita yäsishqan

1Sayno kaykaptinqa shumaq kuyanakur kawayay. Espíritu Santu habilidäta qoyäshunaykipaq#Rom. 12.6-8; 1Cor. 12.7-11. Tayta Diosta manakuyay. Saypita mas manakuyay wilakuyninta wilakuyänaykipaq.

2Espíritu Santu parlasishushqayki idiömapa parlarqa manami runakunatasu parlapaykäyanki, saypa trukanqa Tayta Dioslatami. Espíritu Santu parlasishuptikipis manami pipis tantiyayäshunkisu. 3Runakuna tantiyayashqan idiömapa wilakuyaptikimi isanqa lapan niyashqaykitapis tantiyar Tayta Dios munashqanno kawayanqa, shakyäsinakuyanqa y yanapänakuyanqa. 4Runakuna mana tantiyayashqan idiömapa wilakuq kaqqa kikilanmi kushikun. Runakuna tantiyayashqan idiömapa wilakuq kaqmi isanqa Tayta Diosman yärakuqkunata shumaq yachasiyan.

5Noqapitaqa alimi kanman Espíritu Santu parlasishqan idiömacho lapayki parlayaptikipis. Sayno kaptinpis mas alimi kanman runakuna tantiyayashqan idiömacho Tayta Diospa wilakuyninta wilakuyaptiki. Mana tantiyayashqan idiömacho wilakuyaptikiqa pilapis kanman tantiyasinanpaq. Sayno tantiyasiq kaptinqa alimi kanman juk idiömacho wilakuyaptikipis.

6Wawqi panikuna, shumaq tantiyakuyay. Watukakuq shamur mana tantiyayashqayki idiömacho yachasiptï ¿yachakuyankimansuraq? Tantiyayashqayki idiömacho yachasiptïmi isanqa revelación kaptinpis o yachasikuy kaptinpis lapanta tantiyar shumaq yachakuyanki.

7Pinkullutapis arpatapis lutala tukaptinqa manami tantiyansisu imata tukaykashqantapis. 8Saynöpis cornëtata lutala tukaptinqa soldädukunapis pelyaman aywayänanpaq manami kamarikuyansu. 9Saynölami kanqa mana tantiyayashqan idiömacho wilakuyaptiki. Imata niyashqaykitapis mana tantiyar manami imatapis yachakuyanqasu. Sayno wilakurqa walälami wilakuykäyanki.

10Musyashqansinöpis kay pasachöqa askami idiömakuna kaykan. Runakuna tantiyayashqan idiömacho parlapaptinsiqa pipis tantiyanmi. 11Sayno kaptinpis mana tantiyashqä idiömacho parlapämaq runaqa juklä nación runanömi noqapaq kanqa y noqapis juklä nación runanömi paypaq kashaq. 12Saynölami qamkunapaqpis wilakuyaptiki kaykan. Saymi Espíritu Santu habilidäta qoyäshunaykita munarqa wawqi panikunata tantiyayashqan idiömacho shumaq yachasiyänaykipaq payta manakuyänayki. 13Saynöla mana tantiyayashqan idiömacho wilakurqa Tayta Diosta manakuyay wilakushqaykita tantiyasiyänanpaq.

14Espíritu Santu parlasimaptin mana tantiyashqä idiömacho Tayta Diosta manakur kushikurpis manami tantiyäsu imata nikashqätapis. 15Sayno kaptinqa manami Espíritu Santu parlasimashqan idiömalachösu manakushaq, sinöqa tantiyashqä idiömachöpis manakushaqmi. Saynöpis manami Espíritu Santu parlasimashqan idiömalachösu Tayta Diosta alabashaq, sinöqa tantiyashqä idiömachöpis alabashaqmi. 16Qamkunapis runa mana tantiyashqan idiömalacho Tayta Diosta alabayaptikiqa wakin runakuna mana tantiyar qamkunawan manami alabayta kamäpakuyanqasu. 17Lapan shonquykiwan kushish alabayaptikipis upälalami rikaräyäshunki.

18Runa mana tantiyashqan idiömacho parlanäpaq qamkunapita masraq Espíritu Santu yanapämaptinmi Tayta Diosta agradëcikü. 19Sayno kaptinpis wawqi panikuna shuntakäyashqancho chunka waranqa (10,000) mana tantiyayashqan palabrakunata parlashqäpitapis mas alimi kanqa pisqa palabralatapis tantiyayashqan idiömacho parlaptï.

20Wawqi panikuna, wamrakuna mana tantiyakuypa yarpäyashqanno ama yarpäyaysu. Saypa trukanqa yäpa runakunano shumaq tantiyaykur yarpachakuyay. 21Tayta Diospa leyninchöpis kaynömi qelqaraykan:

<<Kay runakunata castigarmi mana tantiyayashqan idiömapa parlapäshaq.

Sayno castigaptïpis manami cäsukayämanqasu.

Noqa Tayta Diosmi sayno nï>>.#Isa. 28.11-12.

22Say nishqannölami runakuna mana tantiyayashqan idiömacho wilakuptinsi Jesucristuman mana yärakuqkuna Tayta Diospa wilakuyninta chaskikuyanqasu. Tantiyayashqan idiömacho wilakuptinsimi isanqa Jesucristuta chaskikuyanqa. 23Shuntakäyashqaykicho mana tantiyayashqan idiömacho lapayki parlayaptiki imanir sayno parlayashqaykita mana musyaq runa o mana criyiq runa yaykur löcuyash kaykäyashqaykitami yarpanqa. 24Tantiyayashqan idiömacho Diospa wilakuyninta wilakuyaptikimi isanqa yarpachakur jusayuq kashqanta tantiyakunqa. 25Saymi wilakuyashqayki shonqunman chaptin Tayta Dios qamkunawan kaykashqanta tantiyashpan qonqurpakuykur Tayta Diosta adoranqa.

Shuntakäyashqancho imanöpis kayänanpaq nishqan

26Sayno kaptinqa wawqi panikuna, shuntakäyashqaykicho salmukunata cantarpis, Jesucristupa wilakuyninta yachasirpis, Tayta Dios tantiyasiyäshushqaykikunata wilakurpis, runakuna mana tantiyayashqan idiömacho parlarpis y say parlashqanta tantiyasirpis lapanta rurayay yärakuq mayikikuna Tayta Dios munashqanno kawayänanpaq. 27Mana tantiyayashqan idiömakunacho parlarqa juk ishkayla trukanakuypa parlayäsun. Say parlayashqanta juk wawqina tantiyasisun. 28Pilapis tantiyasinanpaq mana kaptinqa upälakuyäsun. Parlananpa trukanqa shonqulanchöna Tayta Diosta manakuyäsun.

29Saynöla shuntakäyashqaykicho Diospa wilakuyninta juk ishkayla wilakuyäsun. Wiyaqkuna tantiyakuyäsun lutanta wilakuyashqanta o rasun kaqta wilakuyashqantapis. 30Imatapis wilakunanpaq juk wawqita Tayta Dios tantiyasiptinqa parlaykaq wawqi upälakusun jukaq wawqina parlamunanpaq. 31Saynöpami lapaykipis shuyänakuypa wilakuyanki lapanpis yachakuyänanpaq. 32Wilakuqkuna imay parlayänanpaqpis y imay upälakuyänanpaqpis tantiyayanmi. 33Salvashqan runakuna shuntakäyashqanchöqa Tayta Dios manami desordin kananta munansu, sinöqa lapanpis shumaq ordenädu kanantami munan.

34Shuntakäyashqaykicho warmikuna upälala kakuyäsun. Ama parlakuyäsunsu.#14.34 1 Corintios 11.5-cho nikan wawqi panikuna shuntakäyashqancho warmikuna manakuyashqanta y wilakuyashqantami. Saymi kay textucho upälakuyänanpaq nirqa warmikuna desordinta mana rurayänanpaq nikan. Moisés qelqashqan leykunacho nishqannöpis runanpa munaynincho kakuyäsun. 35Imatapis musyayta munarqa wayinkunaman kutiykur runankunata tapukuyäsun. Manami alisu kaykan shuntakäyashqaykicho warmikuna parlayaptinqa.

36¿Imanirtaq yarpaykäyanki qamkuna kaqcho Tayta Diospa palabran qalaykushqanta y qamkunalata wilayäshushqaykita? 37Tayta Diospa wilakuqninkuna y Espíritu Santu tantiyasishqan runakuna kayashqaykita yarparqa tantiyakuyankimanmi kay cartacho nishqäkuna Jesucristupa mandamientunkuna kaykashqanta. 38Kay cartacho nishqäkunata mana chaskikuq kaqtaqa Tayta Dios manami chaskinqasu.

39Sayno kaykaptinqa Tayta Diospa wilakuyninta runakuna tantiyayashqan idiömacho wilakuyay. Mana tantiyayashqan idiömacho parlayaptinpis ama michäyaysu. 40Isanqa shuntakäyashqaykicho Tayta Dios munashqannöla lapantapis ordenädu rurayay.

Currently Selected:

1 Corintios 14: qvhB

Highlight

Copy

Compare