1 Corintios 13

Imano kuyanakunansipaq tantiyasishqan

1Kay pasacho lapan idiömakunata parlarpis y angilkunapa idiömanta parlarpis kuyakuynï mana kaptinqa platïlluta lutala tukashqan chinchinyaqnölami parlashqäkuna kaykan. 2Profëta karpis, Tayta Dios yarpashqanta musyarpis y pïmay runapita mas yacharpis kuyakuynï mana kaptinqa manami imapaqpis välïsu. Tayta Diosman yärakur jirka witikunanpaq niptï witikuptinpis kuyakuynï mana kaptinqa manami imapaqpis välïsu.#Mat. 17.20; 21.21; Mar. 11.23. 3Muchuqkunata lapan imaykäkunata rakiparpis y Diosman yärakushqäpita rupasiyämaptinpis kuyakuynï mana kaptinqa manami imapaqpis välïsu.

4Kuyakuq karqa ima kaptinpis pacienciakunsimi y pïmaytapis alimi rikansi. Saynöpis runa mayinsita manami chikinsisu, manami alabakunsisu, manami pitapis manakaqman churansisu, 5manami manakaqkunata parlansisu, manami munashlansita rurayänanpaq obligansisu, manami rabyanansisu y pitapis manami nanaparansisu. 6Mana alikunata ruraptin kushikunansipa trukanqa alikunata ruraptinmi kushikunsi. 7Kuyakuq karqa ima kaptinpis perdonansimi. Imaypis criyinsimi, imaypis shuyaransimi y lapantapis awantakunsimi.

8Profëtakuna wilakuyashqanpis ushakanqami. Mana yachashqan idiömacho parlayashqankunapis ushakanqami. Yachaq kaypis ushakanqami. Kuyanakuymi isanqa imaypis ushakanqasu. 9Manami lapantasu musyansi. Manami lapantasu wilakunsi. 10Sayno karpis Jesucristo kutimuptinqa kanan musyashqansikunata ni wilakushqansikunatapis mananami nistäshunnasu.

11Noqapis wamra karqa wamranölami parlarqä, wamranölami yarpachakurqä y wamranölami tantiyarqä. Awkinyarnaqa mananami wamranönasu parlä ni yarpä. 12Saynöpis kananqa makwa espëjuwan rikakuqnöpis shumaqqa manaraqmi tantiyansiraqsu. Kay pasapita aywakurmi isanqa kikin Tayta Dioswanna tinkushun. Saymi kanan ichiklata musyarpis say junaqqa pay reqimashqansino noqansipis payta reqishun.#1Juan 3.2.

13Kananqa yärakur, shuyakur y kuyanakurmi kawaykansi. Lapanpitapis mas aliqa kaykan kuyanakushqansimi.

Currently Selected:

1 Corintios 13: qvhB

Highlight

Copy

Compare