1 Corintios 12

Espíritu Santu habilidäta qomashqansi

1Wawqi panikuna, Espíritu Santu habilidäta qomashqansipitami musyasiyta munaykä. 2Musyayashqaykinöpis Jesucristuta manaraq chaskikur mana tantiyakuyashpaykimi ïdulukunata adorar kawayarqayki. 3Saymi shumaq tantiyakuyänaykita munä. Espíritu Santuta chaskikush kaykarnaqa manami pipis <<Jesucristo maldicionädu kasun>> ninsu. Saynölami Espíritu Santuta manaraq chaskikurqa <<Jesucristo Señornïmi>> niyta kamäpakunsu.

4Espíritu Santupita jukno jukno habilidäta chaskikushqapis payqa juklaylami kaykan. 5Saynölami Señor Jesucristuta jukno jukno sirvishqapis#Efe. 4.11. payqa juklayla kaykan. 6Yanapämaqninsi Tayta Diosta sirvishqansi jukno jukno kaptinpis payqa juklaylami kaykan.

7Cada ünunsimi Espíritu Santupita habilidäta chaskinsi jukninsi jukninsipis yanapänakunansipaq. 8Wakinninsimi habilidäta chaskinsi shumaq tantiyakuykur wakinta tantiyasinansipaq. Wakinninsimi habilidäta chaskinsi yachakuykur wakin kaqtapis yachasinansipaq. 9Wakinninsimi habilidäta chaskinsi Tayta Diosman shumaq yärakunansipaq. Wakinninsimi habilidäta chaskinsi qeshyaqkunata aliyäsinansipaq. 10Wakinninsimi habilidäta chaskinsi milagrukunata ruranansipaq. Wakinninsimi habilidäta chaskinsi Tayta Diospa wilakuyninta wilakunansipaq. Wakinninsimi habilidäta chaskinsi pipis lutanta o rasun kaqta yachaykäsishqantapis tantiyakunansipaq. Wakinninsimi habilidäta chaskinsi mana yachashqansi idiömakunacho parlanansipaq. Wakinninsinami habilidäta chaskinsi say parlayashqanta wawqi panikunata tantiyasinansipaq. 11Jukno jukno habilidäta chaskiptinsipis Espíritu Santu juklaylami kaykan. Paymi kikin munashqanno cada ünunsita habilidäta kamaripämansi.#Rom. 12.6-8.

Jesucristupa cuerpun kashqansi

12Cuerpunsicho umansi, rikransi y chankansi kaptinpis juk cuerpulami kaykansi. Saynölami noqansipis Jesucristuwan juk cuerpula kaykansi.#Rom. 12.4-5; Efe. 4.15-16. 13Saymi Israel runa kashqapis y mana Israel runa kashqapis, ashmay kashqapis y mana ashmay kashqapis bautizakuptinsi lapansita Espíritu Santu churamashkansi paypa cuerpun kanansipaq. Say cuerpula kashqami lapansita Tayta Dios Espíritu Santuta qomashkansi.

14Cuerpuqa manami umalasu ni rikralasu ni chankalasu kaykan, sinöqa aska partiraqmi tananakush kaykan. 15Chakipis <<mana maki karqa manami cuerpupasu kä>> nirpis manami cuerpupitaqa yarqunsu. 16Saynölami rinripis <<mana nawi karqa manami cuerpupasu kä>> nirpis manami cuerpupitaqa yarqunsu. 17Cuerpunsi nawila kaptinqa ¿imawanraq wiyashwan? Saynöpis cuerpunsi rinrila kaptinqa ¿imawanraq mushkuytapis mayashwan? 18Isanqa Tayta Diosmi cuerpunsikunacho cada partikunata kamakäsish pay munashqannöla kayänanpaq. 19Intëru cuerpucho juk partila kaptinqa manami cuerpusu kanman. 20Saymi aska parti karpis rasunpaypaqa juk cuerpula kaykan.

21Manami nawinsipis makinsita ninmansu: <<Manami qamta nistäsu>>.

Umansipis chakinsita manami ninmansu: <<Manami qamta nistäsu>>.

22Saypa trukanqa cuerpunsicho mas pishi töpay kaq partikunatami mas nistansi. 23Cuerpunsicho mana rikasikushqansi partikunatapis ¿manaku mödanawan shumaq sapansi? 24Alayri rikakaq partikunataqa manami sapansisu. Cuerpunsicho mana rikasikunansipaq kaq partikunata sayno mas cuidanansipaqmi Tayta Dios kamakäsish. 25Sayno kamakäsiptinmi cuerpunsicho kaq partikuna chikinakuyansu, sinöqa jukninpis jukninpis yanapänakuyanmi. 26Cuerpunsicho juk parti nanaptinqa lapan cuerpunsimi lakikun. Cuerpunsicho juk parti ali rikash kaptinqa lapan partimi kushikuyan.

27Qamkunaqa Jesucristupa cuerpunmi kayanki. Cada ünuykikunami saycho juk parti kayanki. 28Saymi iglesiacho Tayta Dios puntata churash apostolkuna kayänanpaq, saypita profëtakuna kayänanpaq y saypita yachasiqkuna kayänanpaq. Saynöpis wakinta churash milagrukunata rurayänanpaq, wakinta churash qeshyaqkunata aliyäsiyänanpaq, wakinta churash muchuqkunata yanapäyänanpaq, wakinta churash imatapis ali kamakäsiq kayänanpaq y wakintanami churash mana tantiyayashqan idiömakunacho parlayänanpaq.#Efe. 4.11.

29Manami lapansu apóstol, ni profëta ni yachasikuq kaykäyan. Manami lapansu milagrukunata rurayan, 30ni qeshyaqkunata aliyäsiyan ni mana yachayashqan idiömakunacho parlayan. Say idiömakunacho parlayashqantapis manami lapansu tantiyasiyan. 31Sayno kaykaptinqa Tayta Diospita mas alinnin habilidäta chaskiyänaykipaq yarpachakuyay.

Kananqa mas alinnin kaqta tantiyasiyäshayki.

Currently Selected:

1 Corintios 12: qvhB

Highlight

Copy

Compare