1 Corintios 11

1Jesucristo kawashqanno kawashqäta rikayämashqaykino qamkunapis kawayay.#1Cor. 4.16; Fil. 3.17.

Iglesiacho warmikuna shukutakuyänanpaq yäsishqan

2[Wawqi panikuna,] qamkuna imaypis yarparäyämaptiki y yachasishqäta mana qonqäyaptikimi kushikü.#2Tes. 2.15. 3Isanqa kay nishqäta tantiyakuyay: Jesucristumi olqu kaqpa uman kaykan. Olqu kaqnami warminpa uman kaykan. Tayta Diosnami Jesucristupa uman kaykan.#11.3 Kay versïculucho nishqanqa kaynömi nikan: Olqu kaqmi Jesucristupa munaynincho kaykan. Warmi kaqmi runanpa munaynincho kaykan. Jesucristunami Tayta Diospa munaynincho kaykan.

4Wawqi panikuna shuntakäyashqancho mayqan runapis Tayta Diosta manakur o wilakuyninta wilakur manami shukutakunmansu. Shukutakurqa Jesucristutami manakaqman churaykan. 5Warmimi isanqa Tayta Diosta manakur o wilakuyninta wilakur shukutakunman. Mana shukutakurqa runantami manakaqman churaykan. Sayno rurarqa aqsanta rutukur warmi penqaypaq kashqannömi penqaypaq kaykan. 6Shukutakuyta mana munaq warmiqa aqsanta qara putuypa rutukusun. Aqsanta rutukuyta penqakurqa umanta shukutakusun.

7Runata kamar Tayta Dios kikin niraqtami kamarqan. Saymi shuntakäyashqancho Tayta Dios respitash kananpaq runakunaqa shukutakuyanmansu. Warmikunami isanqa runan ali rikash kananpaq umankunata shukutakuyanman.#Gén. 1.26-27. 8Manami warmipitasu runata Tayta Dios kamarqan, sinöqa runapitami warmita kamarqan. 9Saynöpis manami warmi japala kaptinsu runata kamarqan, sinöqa runa japala kaptinmi warmita kamarqan.#Gén. 2.18-23. 10Saymi warmikunaqa runantapis y angilkunatapis respitar umanta shukutakuyanman.

11Sayno kaptinpis warmi mana kaptinqa runa manami yurinmansu. Runa mana kaptinqa manami warmipis kamashsu kanman karqan. Sayno kananpaqmi Tayta Dios kamakäsirqan. 12Musyansimi olqupita warmita Tayta Dios kamashqanta. Saynölami musyansi warmipita olqupis yurishqanta. Warmipis olqupis Tayta Diospitami kaykäyan.

13Mä, qamkuna yarpachakuyay. ¿Alisuraq kaykan warmikuna umanta mana shukutakuylapa Tayta Diosta manakuyaptin? 14¿Manasuraq maysaychöpis penqakuypaq kaykan runa aqsanta winasiptin? 15Warmikunami isanqa ata aqsayuq kar kuyaylapaq kaykäyan. Warmikunapa aqsanqa umanta shukutaraqnömi kaykan.

16Saykunapita capaz wakinnikiqa masta parlayta munaykäyanki. Isanqa noqakuna kaqcho y maysaychöpis wawqi panikuna shuntakäyashqancho panikuna umanta imaypis shukutakuyanmi.

Santa Cënata upur jaqayäsinakuyashqan

17Qamkuna shuntakäyashqaykicho alita rurayänaykipa trukanqa mana alitami ruraykäyanki. 18Shuntakäyashqaykicho jaqayäsinakuykäyashqaykitami#11.18 Wakin runakunaqa qallayäsinakuykäyashqaykitami o resientikasinakuykäyashqaykitami niyan. wilayämash. Qamkuna paqta rasunpaypapis sayno kaykäyanki. 19¡Achyä! Sayno jaqayäsinakur kawayashpayki Tayta Dios munashqannöchir kawaykäyanki ¿aw?

20Sayno jaqayäsinakush kaykar Santa Cënata upuyashqaykipis manakaqlapaqmi kaykan. 21Santa Cënata upuyänaykipaq shuntakarshi wakinnikiqa ali mikuyta apaykur mikuykäyanki. Wakinnikishi mikanaykäyanki. Wakinnikinashi shinkayashqaykiyaq upyaykäyanki. 22Sayno rurarqa Tayta Dios salvashqan kaqkunata manakaqman churaykäyanki y pobri kaqkunata penqaymanmi churaykäyanki. ¿Imanirtaq wayilaykikunacho mikukuyankisu y upukuyankisu? Sayno rurar mana alitami ruraykäyanki.

Santa Cënapita yachasishqan

Mateo 26.26-29; Marcos 14.22-25; Lucas 22.14-20

23Señor Jesucristo Santa Cënapita yachasishlantami noqapis yachaykäsï. Wanusish kananpaq entreganan sakaymi Señor Jesucristo tantata aptarkur 24Tayta Diosta agradëcikurqan. Nirkurmi tantata pakirir nirqan: <<[Mikuyay.] Kay tantaqa cuerpümi. Qamkuna rayku wanurmi cuerpüta Tayta Diosta entregashaq. Kay tantata mikur imaypis yarpäyämanki>>.

25Saynölami meriendayta ushaskir vïnuyuq väsuta aptarkur nirqan: <<Kay vïnuqa Tayta Dios mushuq pactuta rurananpaq jichashqä yawarnïmi.#Éxo. 24.6-8; Jer. 31.31-34. Kay vïnuta upur imaypis yarpäyämanki>>.

26Jesucristo sayno nish kaptinmi cadala Santa Cënacho tantata mikur y vïnuta upur yarpansi noqansi rayku Jesucristo wanushqanta. Saynöla imaypis ruraykäshun Jesucristo kutimushqanyaq.

Santa Cënata shumaq tantiyaykur upuyänanpaq yäsishqan

27Sayno kaykaptinqa pipis jaqayäsinakush o jusalikush kaykar Santa Cënacho tantata mikur o vïnuta upurqa Jesucristo wanushqanta y yawarninta jichashqanta manakaqmanmi churaykan. 28Sayno kaykaptinqa imano kawaykäyashqaykitapis shumaq tantiyakuskirraq tantata mikuyanki y vïnuta upuyanki. 29Señor Jesucristupa cuerpunta mana respitar tantata mikuqta y vïnuta upuq kaqtaqa Tayta Dios castiganqami. 30Qamkuna kaqcho sayno upuyashqanpitashi wakin mana aliyaypa qeshyaykäyan y wakinqa wanuyashna.

31Sayno kaykaptinqa imano kawaykäyashqaykitapis shumaqraq tantiyakuyay. Tayta Dios munashqanno kawayaptikiqa manami castigayäshunkisu. 32Castigamashpansipis jusalikuyta kacharinansipaqmi corrigimansi.#Deut. 8.5; Heb. 12.5-11. Saynöpami jusalikuqkunata infiernuman qaykurpis noqansitaqa qaykamäshunsu.

33Wawqi panikuna, sayno kaykaptinqa Santa Cënata upuyänaykipaq shuntakar shuyänakuyayraq. 34Mayqaykipis mikanarqa wayikikunacho imalatapis puntata mikukuyay. Saynöpami Santa Cënacho lutanta mana rurayaptiki Tayta Dios castigayäshunkinasu.

Shamurnami wakin arreglaypaq kaqtaqa arreglayäshayki.

Currently Selected:

1 Corintios 11: qvhB

Highlight

Copy

Compare