Tito 1
1
Pablopi, Titona Toyase'e
1Yë'ë Pablo, Maija'quëre quëacaiquë a'ë, Jesucristo jëjo daoquëpi. Maija'quë i̱ tse̱cohua'i pa'ija̱'cohua'ire ña nëosicohua'ire quëaquëna, asani Maija'quë pa'iji cajë mai sehuoyere nuñere pare sehuoni ti pani huesëyere utejë pa'ija̱'cohua'i a'ë caquë jëjo daopi, yë'ëre. 2Ja̱je pa'ina, Maija'quë ti cosoma'quëpi ja̱ pa'i ja̱'ñere ca nëoa'ji'i, yeja ja̱ pa'i huëoma'në. 3Maija'quë maire huasoquëpi, yë'ëpi de'hue quëacaija̱'quë api caquë nesiquëpi yë'ë quëaquëna, i̱ cocare yure i̱ñopi, maire i̱ cuasa nëosi maca ti̱'aëna. 4Yë'ë cui'ne më'ë te'e Maija'quëre pa'iji cuasa do'ire yë'ë mamaquëre pa'ë, Tito më'ë. Ja̱ do'ire iye toya ja'huana toyaquë cayë. Diusu Maija'quëpi cui'ne Jesucristo mamire huasoquëpi de'oye necaijëna, ai yo'oye peoye jo'cua pa'ijë̱'ë.
Tito Neñe
5Creta saodohuëna më'ëre je̱o dai maca je̱o daë'ë, ne jujase'ere më'ëpi ne de'hua saoja̱'quë cui'ne pa̱i daripë̱a ñape sehuosicohua'i ëjaohua'ire neja'quë caquë, yë'ë cua̱ñese'eje̱ pa'ye. 6Tayo yo'oquëna, ca quëcoye peoquërepa pa'iye pa'iji, sehuosicohua'i ëjaë. Nëjore te'ore paquëpi cui'ne mamajëre sehuosicohua'ire paquëpi, cui'ne co'aye yo'oma'cohua'ire de'oye sehuocohua'ire paquëpi pa'iye pa'iji. 7Sehuosicohua'i ëjaë cato Maija'quë co'amañare de'oyerepa ñacaija̱'quëpi pa'iji. Ja̱je pa'i do'ire nuñerepa de'oye pa'iye pa'iji. Ai jerepa pa'i a'ë cuasama'quëpi, jëaquë teni yo'oma'quëpi, co̱no cuepema'quëpi, huajo yëma'quëpi, cui'ne curiquë ai yë coa cosoquë nema'quëpi pa'iye pa'iji. 8Coa ai jerepa de'oye yo'oquë pa'iye pa'iji, i̱ huë'ena daicohua'i pa'ito si'anë de'oye pëpaquëpi, de'oye yo'oye yëquëpi, de'oye cui'ne co'aye pa'ito ta̱'ñe asaquë yo'oquëpi, nuiñerepa yo'oquëpi, Maija'quëna i̱ pa'iye i̱sisiquëpi, cui'ne i̱ pa'iyere co'ye ñaquëpi pa'iye pa'iji. 9Cui'ne nuñerepa coca ye'yase'ena tsioja̱isiquëpi yecohua'i yo'o jujahuë cuasacohua'ire jerepa yëjë yo'o ja̱'ñena co̱caiye pa'iji, de'o cocapi ye'yajë, cui'ne sa̱ñope cacohua'ireje̱ quëa ti̱'añe pa'iji, asaja̱'cohua'ire mai pa'iye.
10Jai pa̱i pa'iyë, hua saisicohua'ipi maire sa̱ñope cacohua'i, ca̱'ni tëaye pa'iji cajë cua̱ñecohua'i. Ja̱ohua'ipi do'i peo cocapi cajë pa̱ire cosoyë. 11Ja̱je cosocohua'ire ai ë̱seye pa'iji, ye'yama'pë pa'ija̱'cohua'ire, coa curiquëre neñu'u cajë i̱ohua'i tayo ye'yayepi jai tsëcapë̱a pa'icohua'ire si'aohua'ire ti̱ñe yo'oyena ye'yacohua'ire. 12Ja̱re i̱ti saodohuë Creta aquëpi, yequë mu'seña pa'i ja̱'ñe quëaquëpi, i̱ cajeohua'ire capi: “Creta pa̱i cato si'anë coa cosocohua'i a'ë, airo pa̱i a'ë, jai a̱ohua'i a'ë cui'ne jo̱saohua'i a'ë.” 13Ja̱je cani nuñerepa capi. Ja̱je pa'i do'ire më'ëpi ja̱ohua'ire tuturepa yëhuoquë quëajë̱'ë, nuñe pa'iohua'ipi Maija'quëre pa'iji cuasajë pa'ija̱'cohua'ire. 14Ja̱je pa'ijë judío pa̱i coa huëoni ca cocare asama'pë cui'ne nuñerepa cocare coejë je̱osicohua'i cua̱ñeñere sehuoma'pë pa'ija̱'cohua'ire.
15De'oye cuasajë pa'icohua'ire cato si'a co'amaña de'oyese'e pa'iji. Ja̱je pa'iquëta'are ëa joyo hue'ecohua'ire, cui'ne de'oye cuasama'cohua'ire cato ti peoji de'oye cuasaye, si'a i̱ohua'i cuasaye cui'ne i̱ohua'ire neñe quëa joyoje̱ si'sise'e pa'i do'ire. 16Ja̱je pa'iohua'ipi Maija'quëre sehuoyë cayë. Cajëta'are i̱ohua'i yo'oyepi nuñerepa yo'oye peoji. Ja̱je pa'ina, yecohua'ire coejë ñacohua'i pa'iyë. Hua saisicohua'i pa'iyë, cui'ne te'o macareje̱ de'oye yo'o ti̱'ama'cohua'i pa'iyë.
Currently Selected:
Tito 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.