2 Timoteo 4
4
1Pa̱i ëjaëje̱ pa'irepa dani ju̱'isicohua'ire cui'ne huajëcohua'ire pa̱i ñape yo'ose'eje̱ caja̱'quë Jesucristo cui'ne Diusu ña hue̱'ñana cua̱ñeñë, më'ëre, 2Maija'quë cocare quëajë̱'ë caquë. Pa̱ipi yëjë asa maca cui'ne pa̱ipi asaye coe macaje̱, ai cua̱ñequë quëajë̱'ë, më'ë caye asacaija̱'cohua'ire. Tayocohua'ire yo'o ma'ñe a'ë caquë yëhuojë̱'ë. Quëcoquë ye'yajë̱'ë, yo'o jujama'ë. 3Nuñerepa cocare pa̱i asaye coe mu'seña ti̱'aja'coa. I̱ohua'i yëyeje̱ pa'iye ye'yacohua'ini co'ejë asaja̱'cohua'i a'ë. 4Nuñerepa cocare jeteyo'jena o̱ani, si'aye pa̱i cayere i̱tire pa'ë cajë asaja̱'cohua'i a'ë. 5Ja̱je pa'iquëta'are më'ë cato si'anë më'ë pa'iyere ñare paquë de'oyese'e pa'ijë̱'ë. Ai yo'oye pa'ito quëcojë̱'ë. Huaso cocare quëaquë pa'ijë̱'ë, më'ë nesi'i cuasase'ere si'a yë'quë maca nequë.
6Yë'ë cato Maija'quëna yë'ë ca̱pë i̱sisiquëpi pa'iyë. Yë'ë ju̱'ija mu'se ja'yere pa'iji. 7De'oyepi uihuaquë huë'huë ti̱'ahuë, tëji du'rure pana, Maija'quë pa'iji cuasayere yo'o jujama'ë. 8Ja̱je pa'ina, yure cato yë'ëre de'oyerepa pa'iyepi uteji maroje̱ pa'iopi, ja̱ mu'serepa Ëjaë Jesucristo pa̱i yo'ose'e nuñerepa ca de'huaquëpi i̱si ja̱'ñepi. Yë'ëse'ere i̱siye pa̱ja'quë api, si'aohua'ire i̱ co'i co̱ñe ai yëjë utejë pa'icohua'ireje̱ i̱sija̱'quë api.
Timoteore Quëaye
9Esa dani yë'ëre ñañere caquë yo'ojë̱'ë. 10Demaspi iye yeja co'amañare ai yë do'ire yë'ëre je̱oconi saji'i, Tesalónicana. Crecentepi Galacia yejana saji'i. Cui'ne Titopi Dalmaciana saji'i. 11Satena, Lucase'e yë'ë ja̱'re co̱ni pa'iji. Ja̱je pa'ina, më'ëpi dai Marcore co'eni dajë̱'ë. Ja̱ëpi de'hue yë'ë co'amaña yo'oye co̱caija̱'quëre. 12Cui'ne Tíquico co̱ni Efeso daripëna jëjo saohuë. 13Më'ëpi dai dacaijë̱'ë, yë'ë dëi ju'i ca̱ Troas daripëna Carpo huë'ena je̱o daisicore. Toya pëpë̱a cui'ne ca̱'nina toyase'eje̱ dacaijë̱'ë, ja̱re ai cuasayë.
14Alejandro, quë̱na de'huaëpi ai co'aye yo'opi, yë'ëre. Ja̱ do'ire Ëjaëpi i̱ yo'ose'eje̱ pa'ye sa̱ija'quë api. 15Ja̱ë cato Maija'quë cocare, mai quëayere ai sa̱ñope yo'oquë api. Ja̱je pa'ina, i̱te de'hua ñajë'ë, më'ëreje̱ co'aye yo'oquë.
16Ëjaohua'i ña hue̱'ñana yë'ëre sa̱ñope cayere quëa maca ti te'i macaje̱ co̱caiye pa̱pi. Pa̱jë si'aohua'i yë'ëre je̱oconi saë'ë. Ja̱ohua'i yo'ose'e Maija'quëpi sa̱ima'ë pa'ija̱quë cuasaquë se̱ñë. 17Ja̱je pa'iquëta'are mai Ëjaëpi yë'ë ja̱'re pa'i si'aohua'i judío peocohua'ije̱ i̱ huaso cocare yë'ëpi quëaquëna, asaja̱'cohua'i a'ë caquë yë'ëre co̱cai i̱ tuture i̱sipi. I̱si maca quëacaë'ë, i̱ coca. Ja̱je jai yai yë'opona satira'siquëni Ëjaëpi huasopi, yë'ëre. 18Ja̱je cui'ne ñacaija̱'quë api, si'aye co'aye yë'ëre nesi'i cayeje̱. Ja̱je ñacai paquëpi i̱ cua̱ñe te̱'tena yë'ëre de'huaja̱'quë api. De'oquëre pa'ni, Maija'quë. Ja̱je pa'ija̱quë.
Pëpa Tëjiyere, Cui'ne De'oye Pa'i Ja̱'ñere Co̱caiye
19Pëpayë, Priscare, Aquilare cui'ne Onesíforo tsëcapëre. 20Erasto, Corintona pëapi, cui'ne Trófimoni ju̱'ina, Miletona je̱o daë'ë. 21Ja̱ yë'ta'a oco tëcahuë ti̱'ama'në ai cuasaquë daijë̱'ë, më'ëpi. Pëpayë, Eubulo, Pudente, Lino, Claudia, cui'ne si'aohua'i mai Ëjaë do'ijëreje̱.
22Ëjaë Jesucristopi më'ë ja̱'re co̱ni pa'ija̱quë Diusupi si'aohua'ire mësarute, de'oye necaina, pa'ijë̱'ë.
Currently Selected:
2 Timoteo 4: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.