1 Juan 5

A qnimbꞌil nimxix tipin tuꞌn tkubꞌ tiꞌj tkyaqil te twutz txꞌotxꞌ

1Kykyaqiljo ayeꞌ kchi xel niminte qa a Jesús Kolil, a Crist, a skꞌoꞌnxix tuꞌn qMan Dios, apente tkꞌwal Diosjo. Ex alkye k-okil kꞌuꞌjlin te jun manbꞌaj, il tiꞌj tuꞌn kyok tkꞌuꞌjlin tkꞌwaljo manbꞌaj anetziꞌn. 2Qa kꞌuꞌjlin qMan Dios quꞌn, ex qa nkubꞌ qnimiꞌn a ntqꞌmaꞌn, n-el qnikyꞌ te qa ajin qeꞌ tkꞌwal kꞌuꞌjlinqe quꞌn. 3Atzin tuꞌn kykubꞌ nimitjo tnukꞌbꞌil;#Jn. 14:15; 2Jn. 6. ex ayetziꞌn tnukꞌbꞌil, nya jun iqtzqe.#Deu. 30:11; Mt. 11:30. 4Quꞌn tkyaqiljo a o tzꞌok te tkꞌwal Dios, kꞌwel tiꞌjjo tkyaqil nya bꞌaꞌn tuꞌn, tzeꞌnku qe, noq tuꞌn qnimbꞌil tiꞌj, o kubꞌ tiꞌjjo tkyaqil nya bꞌaꞌn quꞌn. 5Ankye teꞌ kxel tnimin qa a Jesús Tkꞌwal Dios, apente kꞌwel tiꞌj tkyaqil nya bꞌaꞌn tuꞌn.

Jesús ax Diosjo

6Twutzx teꞌ qa a Klolqe Jesucrist ax Diosjo, a ul kanin tzaluꞌn twutz txꞌotxꞌ, ex kubꞌ tyekꞌin ikyxjo, tej kuꞌx toj aꞌ te jawsbꞌil aꞌ; ex tej tkyim twutz cruz. Ex ax te Xewbꞌaj Xjan attaq antza, ex atzin xqꞌonte tqaniljo, quꞌn a te Xewbꞌaj Xjan twutzxix. 7Quꞌn at oxe nqꞌonte tqanil qa ax Diosjo Jesús: 8A Xewbꞌaj Xjan, ex a jawsbꞌil aꞌ, exsin a tkyimlin twutz cruz, ex ayetzin oxe luꞌn mujle kyten junx, qa twutzxix. 9Tzunpe nxi qnimiꞌn tqanil tuꞌn xjal tiꞌj jun tiꞌ, a ma tli; ¿Yajtzilaꞌ teꞌ Dios? Ex atzin t-xilin tqaniljo tzaj tqꞌoꞌn Dios tiꞌj Jesús, a Tkꞌwal.#Jn. 5:32-37; 8:18.

10Tkyaqiljo a kxel niminte qa a Jesús Tkꞌwal Dios, kxel tiꞌn tqanil toj tanmin. Ex tkyaqiljo mi txi niminte, iky tzꞌelpine Diosjo toj twutz tzeꞌnku jun nikyꞌil yol, quꞌn ma tzꞌel tiꞌjlin tqanil, a tzaj tqꞌoꞌn Dios tiꞌj Tkꞌwal. 11Ex atzin tqaniljo lo: Qa ate Dios o tzaj qꞌoꞌnte qchwinqil te jun majx, ex atziꞌn chwinqil luꞌn a tzaj tqꞌoꞌn noq tuꞌn Tkꞌwal. 12Tkyaqiljo kꞌwel niminte Tkꞌwal Dios, at te chwinqil te jun majx, ex tkyaqiljo a mi nkubꞌ niminte, ntiꞌ teꞌ chwinqil te jun majx.#Jn. 3:36.

Tiquꞌnil kubꞌ ttzꞌibꞌin Juan uꞌj luꞌn

13Atzin jaꞌlin, ma kyij ntzꞌibꞌinjiꞌy uꞌj luꞌn te kyeꞌy, a ayiꞌy o chi nimiꞌn tiꞌj Jesús, a Tkꞌwal Dios, tuꞌnxixsin tel kynikyꞌa tiꞌj, qa at kychwinqila te jun majx.#Jn. 20:31. 14Tuꞌn ikyjo, at-xix qꞌuqbꞌil qkꞌuꞌj tiꞌj, quꞌn bꞌiꞌn quꞌn, qa ma txi qqanin jun tiꞌ te toj qnaꞌj Dios, a tzeꞌnkuxjo tajbꞌil, ok qo tzajil tbꞌiꞌn. 15Ex ikyxjo tzeꞌnkuꞌ bꞌiꞌn quꞌn, ntzaj tbꞌiꞌn Diosjo a qnaꞌj Dios, ex bꞌiꞌn quꞌn, qa ntzaj tqꞌoꞌn a nxi qqanin te.#Mt. 7:7-11; Lc. 11:9-13; Jn. 15:7, 16; 16:23-24; 1Jn. 3:21-22.

Qo naꞌn Dios kyiꞌj qerman

16Qa at jun kyeꞌ ma tzꞌok tkaꞌyin jun terman nbꞌinchin il, a nya nxi tiꞌn toj kyimin, bꞌaꞌn tuꞌn tnaꞌn Dios tiꞌj. Ikytziꞌn, ktzajile tqꞌoꞌn Diosjo tchwinqiljo erman anetziꞌn. Me a wejiꞌy nxi nqꞌmaꞌn tiꞌjjo il, a mi nqox tiꞌn toj kyimin, quꞌn at te il te kyimin, ex nya wejiꞌy nxi nqꞌmaꞌn tzaluꞌn tuꞌn qnaꞌn Dios tiꞌjjo il ikyjo. 17Twutzx tetz tkyaqil il, nya wen twutz Dios, me tuꞌn Jesús, at il, a mi nqox tiꞌn toj kyimin.

18Atzin jaꞌlin, bꞌiꞌn quꞌn, qa kykyaqiljo tkꞌwal Dios, a o chi nimin tiꞌj, mi nchi bꞌetl toj il, quꞌn ate Jesús nkolin kyiꞌj. Ex tuꞌn ikyjo, nlay chi ok tzyuꞌn tuꞌn tajaw il. 19Quꞌn bꞌiꞌn quꞌn, qa tkyaqiljo nya nimil tokx tjaqꞌ tkawbꞌil tajaw il. Me atzin qe, te Diosqoqe. 20Ex ikyxjo, bꞌiꞌn quꞌn, qa Jesús, a Tkꞌwal Dios, ul twutz txꞌotxꞌ tuꞌn ttzaj tqꞌoꞌn qnabꞌl, tuꞌn tel qnikyꞌ te Dios, a twutzxix. Ex nqo bꞌet mujle qten tukꞌa qMan ex tukꞌa Tkꞌwal, a Jesucrist. Atzin Jesús, ax Diosjo, a twutzxix ex qꞌolte qchwinqil te jun majx.#Jn. 17:3.

21Ayiꞌy, tal nkꞌwala; kykaꞌyinktzin kyibꞌa, tuꞌn mi tzꞌoke qe kykꞌuꞌja tiꞌj jun tiꞌla, tuꞌn tok te kydiosa.

Currently Selected:

1 Juan 5: mamC

Highlight

Copy

Compare