Esusën Uan ismiaid 6

Bëbitaccaid chicbanquin 4ted ismiaid

1Adnubien Obecabimbuecquidën Nuquin Papan: Naden naindambi, quequin chiaid dada uaid 7ted bëbitaccaid tauaquin abentsëc bedshun chicposh chicabi icquid 6ted icnuc. Aid chicnubien Nuquin Papabëd icquid dadanobi ëshëcquid abentsëcshun abu cuëdacbimbuec cumapenec cuëdquin: Cho, caposh. 2Adoac isaquien cabachu ushumbocquid catsadec dada canti sanampambuec chosho ispombi. Adec chosho issun: Mibi chieshënquido dëniacquin cuessun secaquidquio mibi nec, quetanquin chuiquid tapan mauetembo mauemeposh. Adoac ambi nabocpadombuembidi abi chieshënquido cuessun secanuec nidposh.

3Adnubien Obecabimbuecquidën dada uaid bëbitaccaid utsitsen bedshun chicposh chicabi icquid 5ted icnuc. Aid chicnubien dadanobi ëshëcquid utsintsen: Cho, caposh. 4Adoac cabachu piumbocquid catsadec dada chosho ispombi. Matses cuessun secananenquio icsho Nuquin Papan tantiacpadombuen aidën nac matses abitedimbo matses utsibobëd cuessun secananendac, queshun chështe dapa meneposh.

5Adnubien Obecabimbuecquidën dada uaid bëbitaccaid utsitsen bedshun chicposh chicabi icquid 4ted icnuc. Aid chicnubien dadanobi ëshëcquid utsintsen: Cho, caposh. Adoac cabachu chëshëmbocquid catsadec dada chosho ispombi. Aid dadan pete daëdpactsëc yante tantiaquin iuë tante sananec choposh. 6Adnubien dadanobi ëshëcquido dacuenadec tabadaid nënantanuëshquio naden chiec onqueposh: Piucquid dadpenquio meniac aton iuë daëdpactsëcnuc tambanshun pete utsi utsien daëdpactsëc menianquid iquendac, quequin pete utsi utsiec nibëdte chuiposh. Adshumbic pete tidico caid ambocquido abentsëc utsi utsien nibëdmetanquin tiedën icquid pete ambocquido 3ted icnuc utsi utsien nibëdmenquio icquin nata, quequin chuiposh. Adoshombic bëchibëta uba chinaid paë uaid nibëdquio yanmenda, quequin chuiposh.#6.6 Nuquin Papan nac adec pete nibëdnuc matses bunquiote iquendac, quequin tantiamenuen aden ismepanëdash.

7Adnubien Obecabimbuecquidën dada uaid bëbitaccaid utsitsen bedshun chicposh chicabi icquid 3ted icnuc. Aid chicnubien dadanobi ëshëcquid utsintsen chuiquin: Cho, caposh. 8Adoac cabachu bëshpiu bëshpiucquid catsadec dada chosho ispombi. Catsadquid uënësmiante, quequin cuënsho tantiapombi. Uënësaid tabadte caidën aid chinumposh. Aid daëdshun Nuquin Papan tantiacpadombuen matses utsi utsiec yacno dadpenquioshë uënës uabudnendac. Aidon namiac cuessun secananec dadpen nibëdanendac. Bunambi aidtedbidi uënësbudnendac. Daicsaidëmbic aidtedbidi. Nënaidëntsen adecbidi uënësbudnendac. Aben icquid bëdi dapa uinsadpambo icquidën aidtedbidi acshun secaindac, quequin ismeposhi.

Bëbitaccaid chicbanquin ënquin daëd ismiaid

9Adnubien Obecabimbuecquidën dada uaid bëbitaccaid utsitsen bedshun chicposh chicabi icquid daëdquiobi icnuc. Aid chicnubi nëish iua pichicate dapa dayun abi chieshënquidon tëtequin cuessun secanëdaido Obecabimbuecquid tantiaquido tabadsho ispombi. Aido chieshtoenquio icquin Nuquin Papan Chiaidbëta Obecabimbuecquidën naid chuibanec bëdambuec tabadsho issun cuessun secanëdaido neposh. 10Adoaido icquin cumapenec cuëdquin Nuquin Papa chuidoneposh: Abitedishun Icbombo icquin mimbi tantiacpadombuen namequidquio mibi nec. Icsaisambo yec muesambo mibi neque. En chui, Papa. Nidaidën tabadquido ubi chieshënquin cuessun secambuedo ¿tedectsicshun mimbi aido cuidpe? quequin chuidoneposh. 11Adoaquien: Chiata. Iuec iuecpactsëcshun naindambi. Min utsibobimbuecquido ubi tantiaquido utsibo umbi tantiactedi chieshëmënquidon ma cuessun secabono. Adosho issun cuessun secanquido cuidendambi, quequin chuiposh. Aden chuitanquin Nuquin Papan: Ubëdi tabadmequin icsaisa mibi icmembi, queshun dashcute ënapen icquid ushumbocquid dasiuimbamposh.

Bitaccaid utsitsen chicaid

12Adnubien Obecabimbuecquidën dada uaid bëbitaccaid utsitsen bedshun chicposh chicabi icquid abentsëc icnuc. Aid chicnubien nidaid abichobi cumapenec uëdëquec ishcudposh. Adnuc badiadën uëshë dashcute chëshën bëpucacbimbuec inchëshquioshë yamposh. Inchëshën uëshëbic intacbimbuec piumboshë isadposh.#6.12 Aden chuiquin Oedën dada uapampic. Oed 2.10, 31; 3.15 isbanta. 13Uispabic cumapenec cunquequin ishcunac cute bacuë tididiquiacbimbuec nidaidën tididiqueposh. 14Abubic dada uaid bidicacbimbuec isadenquio yamposh. Macuësh tapabic abitedi mannëdcuededposh. Acte yacno nidaid nacnëdquidic abitedi mannëdcuededposh.#6.13-14 Adembidi Isayasën chuipampic. Isa. 34.4 ista. 15Adsho isashien nëidtedi: Ashibi cuidpec, quetanec ompodec cuemposh. Nëidic chuiquid tapabo dadpenquio. Nëidic aidobëtan chuiquid utsibo. Nëidic sondadon chuiquid tapabo. Nëidic atona dadpen dayun uaquido. Nëidic natiambocquin nabanquido. Nëidic matses iuabo. Nëidic matsesën iuacmaido. Aidotedi cumapenec dacuëdec ompodec cuemposh. Utsi utsiec nidaid shëcuë dapan ompodnobi utsi utsiec macuësh tapa yacno cuënote dapa dayun ompodposh. 16Adec ompodash tabadec: Macuësh tapa tiadbudnequidën mabëspashuni, quenubien utsibo: Cuënote dapa abucuësh paëdbudnequin ompopashuni. Nuquin Papabëtan Obecabimbuecquidën istuidshun nëishënquin cumapenen cuidnushe, queposh.#6.16 Adembidi Oseasën chuipampic Oseas 10.8 ista. 17Aidon: Ambi tantiacpadënquiobini nëbimbobi cuidchitec. Padtembo. ¿Tsutsi cuidenquio icpatsiash? queposh.#6.17 Nadombuen Nuquin Papan abi tantiaquido cuessun secaquido cuidendac, quequin tantiamenuen aden ismepanëdash.#6.17 Nëidtedishun adembidi Nuquin Papan matses cuidte chuipampic. Nëidtedi isbanta. Nëidic Oed 1.15. Nëidic Amos 5.18-20. Nëidic Mad. 3.2 Aidtedishun Nuquin Papan matses cuidte chuipampic.

Currently Selected:

Esusën Uan ismiaid 6: mcfNT

Highlight

Copy

Compare