Esusën Uan ismiaid 5

Dada uaidbëta Obecabimbuecquid chiaid

1Adshun isaquien aton tsadte dapan tsadquin Nuquin Papan Ambi Chiaid dada uaid aton mëdante abiucshun sanampec. Abiuc daëdi dada uaid bidicabanshun: Utsin isnushe, queshun 7ted icnuc bitaccatempin bëbitaccabanaid neposh.

2Adnubien Nuquin Papabëd icquidon chuiquid tapa cumapenec nadec onquec: ¿Tsuntsin nëid 7ted icnuc bëbitaccaid chicbanquin isquin chuibampatsiash? quedoneposh. 3Adoaquien ëcbedanenquio yec nëidtedi tabadposh. Nëidic Nuquin Papabëd tabadquidotedi. Nëidic nidaidën tabadquidotedi. Nëidic uënësaidotedi. Aidtedi dada uaid bedshun bëbitaccaid chicbanquin isquid nibëdposh. 4Adsho isashini shubiquiopoc: Aid dada uaid bedshun chicbanquin chuibanquid nibëdec, quiash. 5Adshobien ambocquid tsësio abentsëcshun: Otac. Shubienda. Dada uaid 7ted icnuc bëbitaccaid bedshun chicbanquin chuibanquid abi iqueque. Aidi Nuquin Papan matsesmequin chomiondaidquio nec. Aton tsusedpa Uda yampid bëdi dapa tëbu choquidbimbuecquid icsho dacuëdënampicpadquid icnuc aton tsusedpa utsi Dabidbimbuecquid chuiquid tapambo nec. Utsibon dëniactiapimbo icquid nec. Aidëmbi chieshtoenquio icquin Nuquin Papan chiacpadombuenuidi naquidquio icquin aid dada uaid bedshun bëbitaccaid chicbanquin chuibanendac, caposhi.#5.5 Aden Moisesën bëdi dapa quequin dada uapampic. Ene. 49.9-10 isbanta. Esus chuiquid tapa icte chuiquin Isayasën dada uapampic. Isa. 11.1, 10 isbanta.

6Adoac Nuquin Papa yacnombo Obecabimbuecquid ispombi. Aid nënantanquio icnuc abi dacuenadec dadanobi ëshëcquid 4ted tabadposh. Adecbidi aid cachoctsëc dacuenadec tsësiobo tabaduaposh. Obecabimbuec isadec tsadbuedi nidtoposh. Adsho isaquien Nuquin Papa matses cuidmenquio icnuec abided cuidadec uënësash uincuenaccondaidquio abi tsadnëdacnombo Nuquin Papabëd icpec. Aidi aton pais 7ted icnubi aton ëshë aidtedquiobidi icposh. Abitedishun Icbombo yec utsin dëniacadtiapimbo icquid nec, camenuen aden 7ted aton pais ismeposhi. Adecbidi Nuquin Papan Mayan 7ted icquid nidaid abichobi yacno nidmiaid iquec, camenuen aton ëshë 7ted ismeposhi.#5.6 Matses icsaid bedshunash abided cuidadec uënësondaidquio Esus nec, camenuec adec tsadposh. Utsibo dacuenadec tabadnuc nënantanquio Nuquin Papabëdquio icposh. Aid dayuntsëqui dadanobi ëshëcquido dacuenadec tabadnubi aid uquëctsëc tsësiobouidquio dacuenadec tabadposh. Esus nec, quequin Obecabimbuecquid ismepanëdash. 7Adnubien Obecabimbuec isadbued choquin aton tsadte dapan tsadquin Nuquin Papan mëdante abiucshun sananaid dada uaid bedshumposh. 8Aden bedshunsho istanequien dadanobi ëshëcquidobëd tsësiobo 24ted icquido Obecabimbuecquid ismec dannëshën tinquebudcuededposh. Aidon icbo icbuen tintincate sananquimbi utsiucshun maspanëmpin sandoaid bëdambo nuadnuc tauite sanamposh. Umbi tintincamequin Nuquin Papa cuishoncamiacbimbuec Nuquin Papa tantiaquido cuëdënaid iquec, quequin aden tintincate sananquin ismeposhi. Adembidi nëshunquio pichicac nëid pushudquid Nuquin Papa yacno nidacbimbuec: Abi tantiaquidon chianniaid iquec, quequin bëdambo nuadnuc pichicate sananquin ismeposhi. 9Adashic nadec cuëdënte chucan cuëdëncuededposh:

Mimbiuidtsëqui Nuquin Papan sananaid dada uaid bedshun bitaccaid chicquin isbanquin Nuquin Papan chiacpadombuen namendac.

Nuquin Papan chiacpadec matses cuidmenquio icnuec mibided cuidadec intac chididiquenuc uënës uaondaid mibi nec.

Nëbi icsambo icbuedombi abi icsaid bedshunquid tantiasho Nuquin Papan bëdambuen isendac nëidtedi:

Nëidic matses utsibo dadpenquio.

Nëidic onquete utsin utsinquiec onquequido.

Nëidic shubu daëdpactsëcquido utsi utsiec yacnocquido.

Nëidic nidaid utsi utsiec yacno tabadquido.

Aidtedishun abi tantiasho Nuquin Papan bëdambuen isendac.#5.9 Adembidi Isayasën cuëdënte chuca chuipampic. Aid istiadquio icquin Isa. 42.10 ista.

10Adoac mimbi namiaido yanshun mibi tabadte shubunshun mibi nashunenquio icbuedombi mibi nashunendac.

Adembidi nëish iua cuessunneshun pichicaquidobimbuec yanshun: Mibi bëdamboshë iquec, Papa, cadedcadedendac.

Mimbi tantiacpadën nidaidën icquidtedishun chuiquid tapabo mimbi icmendac,

quec cuëdëncuededposh.

11Adnubien Nuquin Papabëd icquido dadpenquioshë cuëdëncuededposh. Aido isac tamëdtiapimbo yec tabadec dadpenquioshë cumapenec cuëdëncuededposh. Nuquin Papabëd Obecabimbuecquid nënantanquio icnuc aid anoentsëqui dadanobi ëshëcquidouidquio dacuenadec tabadposh. Abi ëquëctsëc dacuenadec tsësiobouidquio tabadposh. Aid ëquëctsëc dacuenadequic Nuquin Papabëd icquido dadpenquioshë un michon udimboshë yec tamëdtiapimbo tabadposh.#5.11 Uan ismiacpadombuen Daniedtsen ismepampic. Dan. 7.10 ista. 12Adec tabadec naden chiec cumapenquiec cuëdëncuededposh:

Obecabimbuecquid yec matses icsaid bedshunash abided cuidadec uënësquid yec

Mibi bëdamboshëcquidquio nec.

Adquid icsho: Abitedishun Icbo icquin nadatiambocquin namequidquio mibi nec.

Adecbidi mimbi uaido yec mitsana abitedimbo nec.

Cumapenen tantiaquidquio mibi icnuc

mimbi tantiacmaid utsi nibëdec, abitedishun canuna.

Adembidi mibi bëdamboshëcquid icsho

Mibi tantiaquiembi, canuna.

Adembidi abitedishunquio: Mibi bëdamboshë iquec, canuna, quec cuëdëncuededposh.

13Adnubien Nuquin Papan uaido abitedimbo cuëdëndoposh. Abi yacnocquidotedi yec nidaidën icquidotedi yec uënësaid uincuenmiaidotedi yec acten icquidotedi yec quec cumapenec cuëdëncuededposh naden chiec:

Abitedishun Icbombo yec aton tsadte dapan Nuquin Papabëd tsadquid Obecabimbuecquid bëdamboshë iquec.

Aidi abided cuidadec uënësaid bëdamboshë iquec, canuna ënenquio icquin.

Aiduidtsëqui Nuquin Icbombo nec. Utsi adquid nibëdec.

Aidën nac nuqui bëdamboshë iquec.

Aidpadquid nadatiambocquid utsi nibëdec, canuna ënenquio icquin,

quec abitedimbo cuëdëncuededposh.

14Adsho tantiashien 4ted dadanobi ëshëcquido: Ai, abimbo caic, quec Amen, quenubi tsësiobo 24ted icquido: Nuquin Icbo bëdamboshë iqueque. Ismenuna, quetanec Nuquin Papabëta Obecabimbuecquid ismec dannëshën tinquebudcuededposh.

Currently Selected:

Esusën Uan ismiaid 5: mcfNT

Highlight

Copy

Compare